MEMUCAN

Ang pangunang tigpamaba sa pito ka prinsipe sa Medo-Persia labot sa okasyong si Vasti midumili sa pagsunod kang Haring Ahasuero. (Est 1:13-15) Ang opinyon ni Memucan mao nga si Vasti nakasala dili lamang sa hari kondili usab sa mga prinsipe ug sa mga tawo sa imperyo ug busa siya angayng tangtangon sa pagkarayna aron ang tanang asawa diha sa imperyo makakat-on sa pagkamasinugtanon sa ilang mga bana. Ang hari ug ang ubang mga prinsipe miuyon kang Memucan, ug tungod niini usa ka harianong mando ang gisulat uban sa dili-mausab nga mga balaod sa mga Medianhon ug mga Persianhon.​—Est 1:16-22.

Kining “pito ka prinsipe sa Persia ug sa Media” maoy “batid sa balaod ug sa mga legal nga kaso.” Sila maoy labing suod nga mga tigtambag sa hari, nga “naglingkod sa unang puwesto diha sa gingharian.” (Est 1:​13, 14) Ang Esdras 7:14 nagpamatuod nga may pito ka magtatambag ang palasyo sa Persia.