NABOT

Usa ka Jezreelinhon nga tag-iyag parasan ug biktima sa daotang laraw ni Rayna Jezebel. Ang parasan ni Nabot sa Jezreel duol ra sa palasyo ni Haring Ahab. Gibalibaran ni Nabot ang tanyag ni Ahab nga paliton ang parasan o bayloan kini sa usa ka mas maayong parasan sa ubang dapit, tungod kay gibaod ni Jehova nga dili ibaligya hangtod sa kahangtoran ang usa ka panulondon sa banay. (1Ha 21:1-4; Lev 25:23-28) Apan, giplano sa asawa ni Ahab nga si Rayna Jezebel nga pinaagi sa duha ka saksi butangbutangan si Nabot nga nagpasipala sa Diyos ug sa hari. Busa si Nabot ug ang iyang mga anak nga lalaki gipamatay (2Ha 9:26), nga tungod niana napanag-iya ni Ahab ang parasan. Tungod niini nga pagbuno, gitagna ni Elias nga dili lamang kan-on sa mga iro si Jezebel kondili tilaan usab ang dugo ni Ahab diha sa samang dapit nga gitilaan sa mga iro ang dugo ni Nabot. Pagaputlon usab ang kaliwat ni Ahab. (1Ha 21:5-23) Kini nga pahayag gikan sa Diyos natuman.​—1Ha 22:​34, 38; 2Ha 9:​21, 24-26, 35, 36; 10:1-11.