NAHOR

1. Amahan ni Tera ug apohan ni Abraham. Si Nahor anak ni Serug ug kaliwat ni Sem. Siya nabuhi ug 148 ka tuig (2177 hangtod sa 2029 W.K.P.).​—Gen 11:22-26; 1Cr 1:24-27; Luc 3:34-36.

2. Anak nga lalaki ni Tera; apo ni Nahor (Num. 1); ug igsoon ni Abraham. (Gen 11:26; Jos 24:2) Si Nahor naminyo kang Milca nga igsoong babaye ni Lot ug anak sa laing igsoon ni Nahor nga si Haran, busa pag-umangkon ni Nahor. Pinaagi kaniya siya nakabaton ug 8 ka anak nga lalaki, ug sa iyang puyopuyo nga si Reuma siya nakabaton ug 4 pa ka anak nga lalaki, tanantanan 12, ug ang pipila kanila nahimong mga pangulo sa tribo. (Gen 11:​27, 29; 22:20-24) Pinaagi sa iyang anak nga lalaki nga si Betuel, si Nahor nahimong apohan ni Laban ug Rebeca, ug apohan-sa-tuhod ni Lea, Raquel, Jacob (Israel), ug Esau.​—Gen 24:​15, 24, 47; 29:​5, 16; 1Cr 1:34.

Ang asoy sa Genesis bahin sa pagbiya ni Tera ug Abraham sa Ur sa mga Caldeanhon wala maglakip sa ngalan ni Nahor sa listahan sa mga mipanaw. (Gen 11:31) Hinunoa, siya lagmit miadto sa ulahi, kay ang alagad ni Abraham, nga nangitag asawa alang kang Isaac, mipanaw ngadto sa Haran, diin si Tera nagpuyo ug namatay, ug diin ang apo ni Nahor nga si Laban nagpuyo sa dihang si Jacob miadto kaniya. (Gen 11:​31, 32; 12:4; 27:43) Ang alagad ni Abraham miadto “sa siyudad ni Nahor,” ngadto sa Haran mismo o sa usa ka dapit nga duol niini, lagmit mao ang Nahur nga kanunayng gihisgotan sa lainlaing mga papan sa Mari sa ikaduhang milenyo W.K.P. (Gen 24:10; 29:4; The Biblical Archaeologist, 1948, p. 16) Ug sa dihang si Jacob mibulag kang Laban, si Laban mitawag sa “diyos ni Abraham ug sa diyos ni Nahor” aron mohukom tali kanila.​—Gen 31:53; tan-awa ang HARAN Num. 4.