NAIN

Usa ka siyudad sa Galilea diin si Jesu-Kristo nagbanhaw sa bugtong anak nga lalaki sa usa ka babayeng balo. (Luc 7:11-17) Ang Nain gituohan nga mao ang balangay sa Nein (Naʽim) sa AK nga kiliran sa Jebel Dahi (Givʽat Ha-More; ang bungtod sa More), mga 10 km (6 mi) sa HHS sa Nasaret. Kini nahimutang sa dapit nga giingon ni Jerome ug Eusebius nga mao ang karaang nahimutangan niini. Nag-umbaw sa Patag sa Jezreel (Esdraelon), ang Nein nahimutang sa usa ka maanindot nga kinaiyanhong dapit. Dugang pa, ang katubigan gikan sa usa ka tubod didto nagsustento sa malamboong mga kahoyng olibo ug mga igos. Karong adlawa gamay ra kini nga balangay, apan ang mga kagun-oban sa maong dapit nagpakita nga kini mas dako niadtong unang mga siglo.​—HULAGWAY, Tomo 2, p. 738.

Niadtong 31 K.P., panahon sa iyang unang panaw sa pagsangyaw sa Galilea, si Kristo Jesus miadto sa Nain gikan sa kasikbit nga dapit sa Capernaum. (Luc 7:1-11) Ang duha ka lugar may distansiyang mga 35 km (22 mi) gikan sa usag usa. Ang “ganghaan” tingali maoy usa lamang ka agianan taliwala sa mga balay nga niini may usa ka dalan nga pasulod sa Nain, kay walay ebidensiya nga dihay usa ka paril nga naglibot sa siyudad. Lagmit didto sa sidlakang ganghaan sa Nain nga nasugatan ni Jesus ug sa iyang mga tinun-an ang prosesyon sa paglubong, nga tingali nagpaingon sa lubnganan sa kiliran sa bungtod nga nahimutang dapit sa HS sa modernong Nein. Kay giabot ug kaluoy sa babayeng balo nga wala nay anak niining tungora, miduol si Jesus sa andas ug gibanhaw ang anak nga lalaki sa babayeng balo. Ang balita bahin niini nga milagro mikaylap sa tibuok nga rehiyon ug miabot pa gani sa Judea. Ang maong hitabo tingali mao ang gipunting sa mga pulong nga “ang mga patay gipamangon,” nga lakip sa tubag ni Jesus ngadto sa mga mensahero nga gipadala sa ulahi sa nabilanggong si Juan nga Tigbawtismo.​—Luc 7:11-22.