NEKO

Usa ka paraon sa Ehipto sa panahon sa Judeanhon nga si Haring Josias. Sumala sa Gregong historyador nga si Herodotus (II, 158, 159; IV, 42), si Nekos (Neko) maoy anak nga lalaki ni Psammetichus (Psammetichos, Psamtik I) ug mipuli sa iyang amahan ingong magmamando sa Ehipto. Bisan tuod gisugdan ang pagtukod sa usa ka kanal nga magkonektar sa Nilo ug sa Pulang Dagat, wala niya humana ang maong proyekto. Hinuon, siya nagpadala ug usa ka Fenicianhong panon sa mga barko nga molawig libot sa Aprika. Kini nga panaw malamposong natapos sulod sa tulo ka tuig.

Sa naghinapos ang 31-ka-tuig nga paghari ni Josias (659-629 W.K.P.), si Paraon Neko nagpaingon na aron tabangan ang mga Asiryanhon didto sa suba sa Euprates. Nianang panahona si Josias wala manumbaling “sa mga pulong ni Neko gikan sa baba sa Diyos” ug grabeng nasamdan sa dihang misulay sa pagpasibog sa Ehiptohanong kasundalohan balik sa Megido. Mga tulo ka bulan sa ulahi, gibihag ni Paraon Neko si Jehoahaz, ang manununod ni Josias sa trono, ug gihimo niyang basalyo ang 25-anyos nga si Eliakim, ug giilisdan niya ug Jehoiakim ang ngalan niining bag-o nga magmamando. Gipahamtangan usab ni Neko ug dakong multa ang gingharian sa Juda. (2Cr 35:20–​36:4; 2Ha 23:​29-35) Sa Carkemis, tali sa tulo ug upat ka tuig sa ulahi (625 W.K.P.), ang kasundalohan ni Neko nakaagom ug kapildihan sa mga kamot sa mga Babilonyanhon ilalom sa pagpanguna ni Nabucodonosor.​—Jer 46:2.