KULENTAS

Usa ka pahiyas nga kadenita o tinuhog nga mga lobitos, bulawan, plata, korales, mutya, ug mga susama niini, nga ikulentas sa liog. Ang mga kulentas dugay na kaayong gisul-ob sa mga babaye (Aw 1:10; 4:9; itandi ang Eze 16:11) ug bisan sa mga lalaki, ilabina niadtong tag-as ug katungdanan. (Gen 41:​41, 42; Dan 5:​7, 16, 17, 29) Ang mga Midianhon sa adlaw ni Gideon nagbutang ug mga kulentas diha sa mga liog sa ilang mga kamelyo, ug diha niini nga mga kulentas lagmit gisab-it ingong pabitay ang pormag-bulan nga mga dayandayan. (Huk 8:​21, 26) Ang samag-kulentas nga mga kadena usahay gigamit ingong pangdayandayan, sama niadtong gigamit alang sa mga haligi sa templo nga gitawag ug Jakin ug Boaz.​—2Cr 3:15-17.

Bahin sa hambogiro, daotan nga katawhan gikaingon nga “ang pagkamapahitas-on nagsilbing ilang kulentas.” (Sal 73:​3, 6) Sa laing bahin, ang disiplina sa usa ka amahan ug ang balaod sa usa ka inahan maoy sama sa usa ka maanindot nga kulentas diha sa liog sa anak.​—Pr 1:​8, 9.