DAGOM

Usa ka yagpis nga himan nga talinis ug tumoy ug may bangag o mata sa pikas tumoy; gamiton kini alang sa pagtahi uban ang hilo (o usahay ginamit ang mga tanod nga panit) ug sa pagborda. (Ex 28:6; 35:​34, 35; Ecc 3:7; Luc 5:36) Bisan tuod ang mga dagom nga bukog ug ang pipila nga ginama gikan sa garing nadiskobrehan sa karaang mga lugar, ang bronse nga mga dagom maoy kasagarang gigamit. Kini susama kaayo sa presenteng-adlaw nga mga dagom. Ang bronseng mga dagom nga nagkalainlain ug gitas-on gikan sa mga 4 hangtod sa 14 sm (1.5 hangtod sa 5.5 pul.) nakaplagan didto sa Palestina. Ang ubang bronseng mga dagom sa Ehipto maoy gikan sa 8 hangtod sa 9 sm (3 hangtod sa 3.5 pul.) ang gitas-on.