NEPTOA

Ang ngalan nga nalangkit sa usa ka tubod duol sa utlanan tali sa Juda ug Benjamin. (Jos 15:​1, 9; 18:​11, 15) Kini nga tubod sagad gituohang mao ang tubod sa Lifta (ʽEn Neftoah), dapit sa S sa Kiriat-jearim ug mga 4 km (2.5 mi) sa KAK sa Patukoranan sa Templo didto sa Jerusalem. Bisan tuod kini nga kahubitan mosibo sa Josue 15:​9, ang Josue 18:​15, 16 daw nagpakita nga ang “tubod sa katubigan sa Neptoa” nahimutang sa K sa Kiriat-jearim. Lainlain ang paagi sa mga maghuhubad sa Bibliya sa pagsulbad niining daw panagsumpaki. Sa pagsunod sa hubad sa Gregong Septuagint, ang pulong nga “pakasadpan” giilisdan sa The Jerusalem Bible ug “paingon sa Gasin.” Diha sa Revised Standard Version kini nga teksto giilisdan nga kaharmonya sa Josue 15:9 ug mabasa nga “ngadto sa Epron” inay nga “pakasadpan.” Si Ronald A. Knox naghubad sa Hebreohanong pulong nga yamʹmah (pakasadpan) sumala sa literal nga kahulogan niini ingong “paingon sa dagat” ug, diha sa nota o footnote, nagpahayag: “Kini angayng magkahulogan nga pakasadpan, paingon sa Mediteranyo, apan daw tataw kaayo nga diha niining dapita ang utlanan sa Benjamin miliso nga pasidlakan; ug ang dagat lagmit mao ang Patayng Dagat, ang utlanan niini pasidlakan.”