OBED-EDOM

[nagkahulogang “Alagad ni Edom”].

1. Usa ka Gitihanon diin ang arka sa pakigsaad gibilin sa iyang balay sulod sa tulo ka bulan human nga kini hapit malintuwad ug maoy hinungdan sa kamatayon ni Uzah. Samtang kini atua didto, gipanalanginan ni Jehova si Obed-edom ug ang iyang panimalay. Ug pagkasayod ni David niini, iyang giisip kini nga ilhanan nga giuyonan ni Jehova ang pagdala sa sagradong kaban ngadto sa Jerusalem.​—2Sa 6:10-12; 1Cr 13:​13, 14; 15:25.

Si Obed-edom maoy usa ka “Gitihanon.” Kining pulonga sagad nagtumong sa usa ka Filistehanon nga nagpuyo sa Gat, apan mahimong magtumong usab kini sa usa ka tawong gikan sa Gat-rimon nga usa ka Levihanong siyudad sa Dan nga gihatag sa mga Kohatnon. (Jos 21:​20, 23, 24) Kay siya gipiyalan sa pag-atiman sa Arka, siya gayod usa ka Levihanon ug busa usa ka Gitihanon gikan sa Gat-rimon imbes nga usa ka Filistehanong Gitihanon gikan sa Gat.

Sa panahon ni David, ang pipila ka Levihanong mga maghohoni ug mga magbalantay-sa-ganghaan ginganlan usab ug Obed-edom. Labing menos duha sa maong mga indibiduwal ang gihisgotan (1Cr 15:​21, 24; 16:38), apan sa ubang mga teksto dili matino kon kinsa niining duha ang gitumong, o kon nagtumong ba kini sa laing indibiduwal nga nabuhi sa maong panahon. Busa, si Obed-edom nga Gitihanon, lagmit mao ra ang Num. 2 o Num. 3.

2. Usa ka maghohoni ug magbalantay-sa-ganghaan nga apil sa parada nga nagdala sa Arka ngadto sa Jerusalem. (1Cr 15:​18, 21) Lagmit siya ang maghohoni nga nagpadayon sa pag-alagad atubangan sa tolda sa Arka didto sa Jerusalem. (1Cr 16:​4, 5, 37, 38a) Lagmit mao ra ang Num. 1.

3. Usa ka magbalantay-sa-ganghaan nga apil sa maong parada. (1Cr 15:24) Hayan siya mao usab ang “anak nga lalaki ni Jedutun.” (1Cr 16:38b) Lagmit mao ra ang Num. 1 o Num. 4.

4. Usa ka Korehanon nga sakop sa permanenteng dibisyon sa mga magbalantay-sa-ganghaan ug kauban sa 62 ka paryente gitudlo sa pagbantay sa H nga bahin sa nataran sa sangtuwaryo sa Jerusalem.​—1Cr 26:​1, 4-8, 13, 15; tan-awa ang Num. 3.

5. Tig-atiman sa bulawan, plata, ug sa ubang mga butang sa balay ni Jehova panahon sa paghari ni Haring Amazias. Sa dihang si Jehoas sa Israel misulong sa Jerusalem tali sa mga tuig 858 ug 844 W.K.P., kining mga butanga, ug lagmit si Obed-edom usab, gidala ngadto sa Samaria.​—2Cr 25:​23, 24.