OG

Ang gamhanan nga Amorihanong hari sa Basan (1Ha 4:19) nga gipildi sa mga Israelinhon sa wala pa sila motabok ngadto sa Yutang Saad. Usa si Og sa mga higanteng Repaim. Gani, ang iyang dakong andas nga puthaw (tingali usa ka lungon nga gama sa itom nga basalto) misukod ug 4 por 1.8 m (13.1 por 5.8 p). (Deu 3:​11, ftn sa Rbi8) Siya ug si Sihon nagmando sa mga Amorihanon sa S sa Jordan. (Deu 3:13; 4:​46, 47) Ang dominyo ni Og maoy gikan sa Bukid sa Hermon hangtod sa Jabok, nga usa ka teritoryo sa S sa Jordan nga adunay 60 ka kinutaang siyudad ug daghang lungsod sa banika. (Deu 3:3-5, 8-10; Jos 12:​4, 5; itandi ang Num 21:​23, 24.) Ang iyang duha ka pangunang siyudad mao ang Edrei ug Astarot.​—Deu 1:4; Jos 13:12.

Ang kapildihan ni Og sa mga kamot sa Israel nahitabo sa hapit nang matapos ang 40 ka tuig nga paglatagaw sa Israel, sa wala pa sila magkampo sa Kapatagan sa Moab. Human mapildi si Sihon, ang Israel nakiggubat sa kasundalohan ni Og didto sa Edrei. Sa dakong kadaogan nga gihatag sa Diyos kanila, ilang gipatay si Og ug ang tanan niyang kasundalohan ug gisakop ang iyang mga siyudad ug mga lungsod. (Num 21:33–​22:1; Deu 3:1-13) Ang teritoryo ni Og nahimong bahin sa panulondon ni Manases. (Num 32:33; Deu 3:13; Jos 13:29-31) Ang maong kadaogan nakapahadlok sa mga molupyo sa Canaan ug nakaaghat kini kang Rahab ug sa mga Gabaonhon nga makigdait sa Israel mao nga sila wala laglaga. (Jos 2:​10, 11; 9:​9, 10) Kini usab nakadasig pag-ayo sa Israel ug ilang nahinumdoman kini bisan sa daghang kasiglohan sa ulahi.​—Deu 31:4; Neh 9:22; Sal 135:10-12; 136:17-22.