SIDLAKAN, TAGA-

Ang katawhan niining mga yutaa giisip sa Hebreohanong mga magsusulat ingong naggikan “sa Sidlakan.” Kini nga dapit maoy saylo sa utlanan sa Israel dili lamang sa sidlakan kondili hangtod pa usab sa amihanan-sidlakan ug sa habagatan-sidlakan paingon sa Arabia. (Gen 25:6; Jer 49:28) Busa sa dihang si Jacob miadto sa panimalay ni Laban didto sa Haran, siya miadto “sa yuta sa mga taga-Sidlakan,” sa AS sa Canaan.​—Gen 29:1.

Si Job gitawag nga “ang labing bantogan sa tanan nga taga-Sidlakan [sa literal, mga anak nga lalaki sa Sidlakan].” (Job 1:​3, ftn sa Rbi8) Ang kasundalohan nga nanghasi sa Israel sa wala pa si Gideon motindog ug maglaglag kanila gilangkoban sa mga Amalekanhon ug mga Midianhon dugang pa sa “mga taga-Sidlakan,” nga wala ipaila dinhi. (Huk 6:​3, 33; 7:12; 8:10) Apan ang mga taga-Sidlakan, nga nabantog sa ilang kaalam, nalabwan ni Solomon niining bahina. (1Ha 4:30) Ang gitawag nga mga maalamong tawo, o mga Mago, kinsa miduaw sa bata nga si Jesus maoy “mga astrologo gikan sa sidlakang mga bahin.”​—Mat 2:​1, 2, 11.