PAHAT-MOAB

[Gobernador sa Moab].

Gigikanan sa usa ka banay sa Israel. Kon siya usa ka opisyal sa Moab, ingon sa gipasabot tingali sa iyang ngalan, lagmit nga panahon kadto sa dihang ang Moab ubos pa sa pagmando sa Juda. Apan, ang iyang paghupot sa maong katungdanan nagpabiling dili-piho sanglit walay gisulti bahin kaniya ang rekord sa Kasulatan.

Ang tanang kaliwat ni Pahat-moab nga gitala sa Esdras ug sa Nehemias nabuhi human sa yugto sa pagkadestiyero. Ang pipila kanila maoy sakop sa ikaduha sa labing daghang banay nga namalik kauban ni Zorobabel niadtong 537 W.K.P. (Esd 2:​1, 2, 6; Neh 7:11) Sa panahong mibalik si Esdras niadtong 468 W.K.P., nga may dugang pang mga kaliwat ni Pahat-moab nga mikuyog kaniya, ang pipila sa unang grupo (o sa ilang kaliwat) nagkuhag langyawng mga asawa, apan misanong sila sa tambag ni Esdras sa pagpapahawa kanila. (Esd 8:​1, 4; 10:​30, 44) Ang lain pang sakop niini nga banay, si Hasub, mitabang kang Nehemias sa pag-ayo sa paril sa Jerusalem, ug ang usa ka kaliwat o ilang hawas nagpamatuod usab pinaagi sa timbre sa kasabotan sa pagkamatinumanon nga gipatuman wala madugay human niadto.​—Neh 3:11; 9:38; 10:​1, 14.