PAFOS

Usa ka siyudad sa K nga baybayon sa pulo sa Cipro. Dinhi si Pablo, human makatabok sa pulo uban kang Bernabe ug Juan Marcos, nakahibalag sa barangan nga si Bar-Jesus (Elimas), kinsa misupak sa ilang pagwali ngadto sa prokonsul nga si Sergio Paulo. Tungod niini siya sa milagrosong paagi temporaryo nga gibutaan ni Pablo. Kay nakasaksi niini, si Sergio Paulo nakombertir sa Kristiyanidad.​—Buh 13:6-13.

Duha ka siyudad sa Cipro ang ginganlag Pafos, ang “Daang Pafos” ug ang “Bag-ong Pafos.” Ang Bag-ong Pafos, ang siyudad nga gihisgotan sa asoy sa Mga Buhat, mao ang kaulohan sa lalawigan sa Cipro nga ilalom sa senado sa dihang si Pablo miduaw sa pulo panahon sa iyang unang misyonaryong panaw. Gituohan nga ang siyudad mao ang mga kagun-oban sa karaang dunggoanan sa Pafos, nga nahimutang mga 15 km (9 mi) sa AK sa “Daang Pafos” (Kouklia). Ang kinaiyanhong dunggoanan didto, nga nagsilbing base nabal sulod sa Grego ug Romanhong kapanahonan, tino nga mao ang dapit nga gigikanan ni Pablo ug sa iyang mga kaubanan sa ilang paglawig sa AAK paingon sa Perga sa Asia Minor. Ang dagkong mga bato sa karaang dunggoanan sa Pafos anaa pa gihapon, maingon man ang mga nahibilin sa lainlaing pangpubliko ug pangpribado nga mga tinukod ug ang usa ka paril sa siyudad.

Walay duhaduha nga si Bernabe ug Marcos miduaw pag-usab niining dapita niadtong mga 49 K.P.​—Buh 15:36-39.