PEOR

Diha sa asoy bahin sa pagpaningkamot ni Haring Balak nga tunglohon sa manalagna nga si Balaam ang Israel, ang ikatulong bantaaw nga dapit nga gidad-an kang Balaam giingon nga didto sa “kinatumyan sa Peor, nga nag-umbaw sa Jesimon.” (Num 23:28) Gikan dinhi makita ni Balaam ang mga tolda sa Israel nga nagkatag diha sa Kapatagan sa Moab sa ubos.​—Num 22:1; 24:2.

Giisip sa pipila nga ang Peor maoy pinamubo sa ngalang Bet-peor. (Deu 4:46) Apan, kining ulahing dapit dayag nga maoy usa ka lungsod, sanglit gilakip kini sa pahat nga teritoryo sa Ruben. (Jos 13:​15, 16, 20) Busa, ang uban nagtuo nga ang Peor maoy usa ka tumoy sa bukid, o tayuktok, ug nag-ingon nga ang lungsod sa Bet-peor ginganlan sa ingon tungod kay kini nahimutang diha sa mga bakilid sa maong tumoy sa bukid. Ang Peor ug Bet-peor mopatim-aw nga nalangkit sa paganong pagsimba “sa Baal sa Peor” (Num 25:1-3, 18; 31:16; Jos 22:17), ug posible nga ang tayuktok sa Peor maoy usa ka sentro sa maong imoral nga pagsimba.​—Tan-awa ang BAAL Num. 4; BAAL SA PEOR.

Si Balaam unang gidala didto sa Bamot-baal, dayon sa “tumoy sa Pisga,” ug sa kataposan didto sa “kinatumyan sa Peor.” (Num 22:41; 23:​14, 28) Ang direksiyon sa ilang pagtungas maoy gikan sa H ngadto sa A ug daw nagpakita nga ang Peor maoy sa A sa Pisga ug sa Bukid sa Nebo. Pinasukad sa giingon ni Eusebius ug Jerome, sa ikatulo ug ikaupat nga siglo K.P., ang tumoy sa bukid sa Peor gituohan nga mao ang usa sa mga tayuktok nga maoy utlanan sa Wadi Husban.​—Tan-awa ang BET-PEOR.