PUA

Kining ngalana naghawas sa duha ka parehong Hebreohanong ngalan nga magkalahi ang gender ug kahulogan apan pareho ang espeling sa mga hubad nga Grego ug Iningles.

1. [Pu·ʼahʹ]. Ikaduhang anak nga lalaki ni Isacar.​—1Cr 7:1; tan-awa ang PUVA.

2. [Pu·ʽahʹ]. Usa ka Hebreohanong mananabang nga, kauban sa mananabang nga si Sipra, gimandoan ni Paraon nga patyon ang tanang batang lalaki nga ipanganak sa mga Hebreohanon. Hinunoa, tungod kay siya nahadlok sa Diyos, iyang gitipigang buhi ang mga batang lalaki ug siya gipanalanginan ni Jehova pinaagi sa pagkabaton ug kaugalingong pamilya.​—Ex 1:15-21.

3. [Pu·ʼahʹ]. Amahan ni Maghuhukom Tola ug anak nga lalaki ni Dodo; sa tribo ni Isacar.​—Huk 10:1.