TAGDUMALA SA MGA LAWAK

Lagmit mao ang opisyal nga tinugyanan sa mga rasyon ug mga suplay alang sa kasundalohan. Ang literal nga hubad sa Hebreohanong sar menu·chahʹ maoy “prinsipe sa dapit-pahulayan” ug lagmit nagtumong sa usa ka tinugyanan sa mga lawak nga puy-anan sa hari sa dihang siya anaa sa usa ka pakiggubat o panaw. Si Seraias ingong tagdumala sa mga lawak ni Haring Zedekias sa Juda mikuyog kaniya sa panaw paingon sa Babilonya sa ikaupat nga tuig sa paghari ni Zedekias, nga nagdala sa sinulat nga tagna ni Jeremias batok sa Babilonya. Human kini basaha sa makusog diha sa maong siyudad, si Seraias naghikot niini sa usa ka bato ug naglabog niini ngadto sa Euprates ingong simbolo sa umalabot nga pagkapukan sa Babilonya, nga dili na mobangon pa pag-usab.​—Jer 51:59-64.