PAGLUGOS

Ang paglugos gihubit ingong supak sa balaod nga pagpakigsekso nga walay pagtugot sa babaye, ug gihimo pinaagig puwersa, paghulga, paghadlok, o paglansis.

Si Jehova nagpasidaan sa mga sangpotanan nga modangat sa Israel kon ang katawhan mosupak sa iyang balaod. Gawas sa mga sakit ug mga katalagman nga ilang maagoman, iyang gitagna nga sila mahulog sa mga kamot sa ilang mga kaaway, ug siya miingon: “Masinayoran ka sa usa ka babaye, apan laing tawo ang molugos [porma sa sha·ghalʹ] kaniya.” (Deu 28:30) Nahitabo kini sa dihang gikuha ni Jehova ang iyang panalipod gikan sa nasod tungod sa ilang pagkadili-masinugtanon, ug giilog sa paganong mga kaaway ang ilang mga siyudad. (Itandi ang Zac 14:2.) Gitagna usab nga ang Babilonya makaagom niini, ug kini nahitabo sa dihang ang Babilonya nahulog ngadto sa mga Medianhon ug mga Persianhon. (Isa 13:​1, 16) Sumala sa Balaod, dili kini mahitabo sa mga nasod nga sakopon sa Israel, kay ang kasundalohan gidid-an sa pagpakigsekso panahon sa kampanya militar.​—1Sa 21:5; 2Sa 11:6-11.

Tungod sa usa ka kaso bahin sa usa ka babayeng gitabangan paglugos didto sa siyudad sa Gibea sa Benjamin sa mga adlaw sa mga Maghuhukom, nahitabo ang sunodsunod nga mga pagpanimalos, nga misangpot sa halos pagkapuo sa tribo ni Benjamin. Ang walay pulos nga mga tawo sa siyudad, nga higal sa sekso, namugos nga makigsekso sa usa ka bisita nga Levihanon. Inay nga mosugot, iyang gihatag kanila ang iyang puyopuyo nga kanhi nakasala ug pakighilawas batok kaniya. Gilugos sa mga tawo ang babaye sa tibuok gabii hangtod nga siya namatay. Ang Hebreohanong termino nga ʽa·nahʹ, nga gihubad ug ‘paglugos’ niini nga asoy, nagkahulogan usab nga “paantoson,” “pakaulawan,” ug “lupigan.”​—Huk kap 19, 20.

Ang anak nga lalaki ni Haring David nga si Amnon naglugos kang Tamar nga iyang igsoon sa amahan, ug tungod niini ang igsoong lalaki ni Tamar nga si Absalom nagpapatay kang Amnon. (2Sa 13:1-18) Sa dihang ang daotang laraw ni Haman nga Agagihanon giyagyag atubangan sa Persianhong hari nga si Ahasuero, tungod sa iyang pagkamalinglahon batok sa mga Hudiyo ug ilabina batok sa rayna ni Ahasuero nga si Ester, ang hari nasuko pag-ayo. Kay nahibalo nga siya dili gayod kaluy-an sa hari, walay laing nahimo si Haman kondili miubo na lang sa lingkoranan nga gilingkoran ni Ester, ug nagpakiluoy kaniya. Sa dihang ang hari misulod pagbalik sa lawak, iyang nakita si Haman didto ug misinggit: “Lugoson ba usab diay ang rayna, nga ako ania sa balay?” Dihadiha iyang gisentensiyahan si Haman sa kamatayon. Ang sentensiya gipatuman, ug dayag nga human niana si Haman gibitay sa estaka nga gipatindog ni Haman nga mao untay bitayan sa ig-agaw ni Ester nga si Mardokeo. (Est 7:1-10) Diha sa teksto nga naghisgot sa gipamulong sa hari (Est 7:8), ang gigamit mao ang Hebreohanong pulong nga ka·vashʹ; kini nagkahulogang “gamhan” (Gen 1:28) apan mahimong magkahulogan usab nga “lugoson.”

Ubos sa Balaod, kon ang sinayorang babaye nakighilawas sa laing lalaki, siya ug ang lalaki pagapatyon. Apan kon ang babaye misinggit alang sa tabang, kini maoy pamatuod nga siya inosente. Ang lalaki pagapatyon tungod sa iyang sala sa paglugos kaniya, ug ang babaye ipahigawas.​—Deu 22:23-27.