REHOB

[Plasa; Halapad nga Dapit].

1. Amahan ni Hadadezer nga hari sa Zoba kinsa gibuntog ni David sa pagpakiggubat.​—2Sa 8:3-12.

2. Usa sa mga Levihanon o ang katigulangan sa usa nga nagpamatuod pinaagig timbre sa usa ka pakigsaad sa panahon ni Nehemias ug Esdras.​—Neh 10:​1, 9, 11.

3. Usa ka dapit o siyudad nga gihisgotan sa dihang gisuhid ang Canaan sa 12 ka Hebreohanong mga espiya nga gipadala ni Moises. (Num 13:21) Tingali kining dapita mao ra usab ang “Rehob” ug “Bet-rehob” nga gihisgotan sa 2 Samuel 10:​6, 8.​—Tan-awa ang BET-REHOB.

4. Ang ngalan sa usa o lagmit sa duha ka siyudad sa teritoryo sa Aser. (Jos 19:​24, 28, 30) Bisan tuod giisip sa pipila ka eskolar nga kining duha ka paghisgot nagtumong sa samang siyudad, ang ubang nalangkit nga mga teksto daw nagtumong sa magkalahi nga mga dapit. Busa, ang Maghuhukom 1:​31, 32 nag-ingon nga “wala mag-abog si Aser sa mga molupyo sa . . . Rehob,” mao nga ang mga Asernon napugos sa pagpuyo taliwala sa mga Canaanhon sa maong yuta, samtang ang Josue 21:​27, 31 ug 1 Cronicas 6:​71, 75 nag-ingon nga ang Rehob gihatag ngadto sa mga anak ni Gersom (Gerson) ingong usa ka Levihanong siyudad. Kadtong mipabor nga may usa lamang ka Rehob nag-isip nga kining mga tekstoha nagkahulogan nga ang pagpapahawa sa mga Canaanhon gikan sa Rehob nababagan sa sinugdan apan nalampos ra sa ulahing panahon, mao nga kini napuy-an sa mga Levihanon. Kadtong mipabor nga may duha ka Rehob nagsugyot nga ang usa ka lungsod nagpabilin sa Canaanhong mga kamot, ang lain maoy lakip sa unang nailog ni Aser ug gihatag ngadto sa mga Levihanon. Maylabot sa duha ka Rehob, ang pipila nagsugyot nga kini mao ang Khirbet el-ʽAmri, mga 4 km (2.5 mi) sa AS sa Akzib, alang sa Rehob sa Josue 19:28; ug alang sa Rehob sa ubang mga teksto, ilang gisugyot ang Tell el-Bir el-Gharbi (Tel Bira), mga 10 km (6 mi) sa SHS sa Aco. Kining ulahi nga dapit mao ang gipalabi niadtong nag-isip nga ang Rehob nagtumong sa usa lamang ka lungsod.