REGIO

Usa ka siyudad sa habagatang Italya nga karong adlawa gitawag nga Reggio o Reggio di Calabria. Ang barko nga gisakyan ni apostol Pablo ingong binilanggo mihapit sa Regio sa dihang siya mipaingon sa Roma aron moatubang kang Cesar niadtong mga tuig 59 K.P.

Ang Regio nahimutang diha sa Strait of Messina, nga nag-ulang sa Italya ug Sicilia. Didto sa A sa Regio, kinahanglang sayloan sa barko nga gisakyan ni Pablo ang habog nga lawis sa Scylla nga nahimutang sa hiktin nga dagat dapit sa Italya ug ang lilo sa Charybdis dapit sa Sicilia, nga parehong giisip nga peligroso sa karaang mga marinero. Usa ka adlaw human sa ilang pag-abot sa Regio, ang hangin gikan sa H mihuros ug gipadpad sila niini nga hilwas latas niining hiktin nga dagat sa Messina ug sa AAK ngadto sa Puteoli.​—Buh 28:13.