RIBLA

1. Usa ka wala mahibaloing dapit sa sidlakang utlanan sa “yuta sa Canaan.”​—Num 34:​2, 10, 11.

2. Usa ka lungsod sa A sa Israel “sa yuta sa Hamat.” (Jer 52:9) Ang dapit nga kasagarang gituohan nga mao ang Ribla mao ang mga kagun-oban nga duol sa modernong Ribleh daplin sa S nga tampi sa Suba sa Orontes, mga 60 km (37 mi) sa AS sa Baalbek, diha sa walog taliwala sa kabukiran sa Lebanon ug Anti-Lebanon. Lagmit nga si Paraon Neko nagkampo sa Ribla human pildiha si Haring Josias niadtong mga 629 W.K.P. Niadtong panahona siya miasdang paingon sa A aron makig-away sa mga Babilonyanhon, kinsa nianang tungora naggahom sa Asirya. Si Jehoahaz mipuli kang Josias, apan human sa tulo ka bulan si Eliakim (Jehoiakim) maoy gipuli ni Neko kang Jehoahaz. Gisugo ni Neko nga dad-on si Jehoahaz ngadto kaniya sa Ribla sa dili pa dad-on kining haria ingong binihag ngadto sa Ehipto. (2Ha 23:29-34) Ang Ribla maoy usa ka maayong pagkapuwesto nga dapit ingong kampohanan sa kasundalohan. Maayo kaayo ang nahimutangan niini sanglit anha man moagi niini ang A-H nga ruta sa mga negosyante ug ingon man ang ruta sa kasundalohan tali sa Ehipto ug sa Euprates. Ang tubig sayon rang mabatonan, ug ang pagkaon ug sugnod mabatonan gikan sa palibot nga walog ug kalasangan.

Ang samang mga bentaha sa pagpakiggubat nakatabang sa mga Babilonyanhon sa ulahi. Sa usa ka panahon, human masugdi ang paglikos sa Jerusalem sa ulahing bahin sa 609 W.K.P., si Nabucodonosor lagmit nagtukod ug usa ka kampo didto sa Ribla aron didto manukad ang iyang operasyon militar. Kini magpaarang kaniya sa pagsulong sa Damasco o sa pagbalik dayon sa Babilonya kon gikinahanglan. Sa dihang nadakpan si Zedekias niadtong 607 W.K.P., gidala siya ngadto kang Nabucodonosor sa Ribla, sama sa gihimo ngadto sa pipila ka hinungdanong mga tawo sa siyudad wala madugay human niadto.​—2Ha 25:​1, 5-7, 18-21; Jer 39:5; 52:9-11, 26, 27.

Daghang eskolar ang naghinapos nga ang “Dibla” sa Ezequiel 6:14 angayng basahon nga “Ribla,” nga nagtumong sa Ribla duol sa Orontes.​—Tan-awa ang DIBLA.