SAKONG PANAPTON

Usa ka gaspangon nga panapton nga gigamit sa paghimog mga sako, o mga puyo, sama nianang sa mga sudlanan ug mga lugas. Sagad kini maoy hinablon gikan sa balhibo sa kanding nga itom ug kolor. (Pin 6:12; Isa 50:3) Ang Hebreohanong pulong alang sa sakong panapton (saq) gigamit usab sa pagtumong sa mga sudlanan nga ginama gikan niini.​—Gen 42:25; Jos 9:4.

Kini maoy naandang besti sa pagbangotan, ug una natong mabasa ang paggamit niini sa dihang si Jacob nagbangotan kay nagtuong namatay ang iyang anak nga si Jose, ug siya nagbutang ug sakong panapton diha sa iyang balat-ang. (Gen 37:34; 2Sa 3:31) Sa pipila ka kahimtang ang mga nagbangotan migamit niini aron lingkoran o higdaan. (2Sa 21:10; Isa 58:5; Joe 1:13) Ang mga alagad ni Ben-hadad, sa pagpakiluoy alang sa kinabuhi sa ilang hari atubangan kang Ahab, miadto nga nagsul-ob ug sakong panapton diha sa ilang mga balat-ang ug may mga pisi diha sa ilang mga ulo. (1Ha 20:​31, 32) Usahay kini ang unang isul-ob, nga sapawan ug laing besti (Job 16:15; Isa 32:11; 1Ha 21:27; 2Ha 6:30), samtang sa ubang mga kahimtang kini lagmit ‘ibakos’ lamang ibabaw sa pang-ilalom nga mga besti.​—Eze 7:18; Joe 1:8.

Ingong resulta sa pagsangyaw ni Jonas, ang hari sa Nineve nagpagula ug mando nga dili lamang ang tanang katawhan sa siyudad mosunod sa iyang pananglitan sa pagsul-ob ug sakong panapton kondili bisan ang ‘binuhing mga hayop’ sul-oban usab niini.​—Jon 3:6-8.

May mga higayon nga ang Hebreohanong mga manalagna magsul-ob ug sakong panapton. Gihimo nila kini uyon sa pasidaang mga mensahe ug mga panawagan sa paghinulsol nga gisugo kanila nga ipahayag, o sa dihang sila mag-ampo uban ang mga pahayag sa paghinulsol alang sa katawhan. (Isa 20:2; Dan 9:3; itandi ang Pin 11:3.) Kini isul-ob sa hari ug sa katawhan sa mga panahon sa dakong kalisdanan o sa dihang makadawat ug mga balita sa katalagman.​—2Ha 19:1; Isa 15:3; 22:12.