SELA

1. [Heb., Sheʹlach, lagmit, Udyong].

Anak nga lalaki ni Arpaksad ug apo ni Sem, kinsa natawo niadtong 2333 W.K.P. ug namatay niadtong 1900 W.K.P., sa edad nga 433. Si Sela ug ang usa sa iyang mga anak nga lalaki, si Eber, maoy lakip sa mga gigikanan sa 70 ka banay human sa Lunop; miagi kang Eber ang linya sa kaliwatan gikan kang Sem ngadto kang Abraham ug sa kataposan ngadto kang Jesus.​—Gen 10:​22, 24; 11:12-15; 1Cr 1:​18, 24; Luc 3:35.

2. [Heb., She·lahʹ, lagmit, Pangaliya]. Ang ikatulo nga anak nga lalaki ni Juda sa iyang Canaanhong asawa. (1Cr 2:3) Si Tamar angay untang ihatag kang Sela ingong asawa pinaagi sa kahikayan sa kaminyoon sa bayaw nga lalaki, apan siya wala ihatag. (Gen 38:1-5, 11-14, 26) Ang mga kaliwat ni Sela, nga ang pipila kanila gitala sa ngalan uban sa ilang mga pinuy-anan, nahimong tribonhong banay sa mga Selahanon. Ang pipila kanila namalik gikan sa pagkadestiyero sa Babilonya.​—Num 26:20; 1Cr 4:21-23; 9:5; Neh 11:5.

3. [Dakong Bato]. Usa ka dapit sa utlanan sa Amorihanong teritoryo human panag-iyaha sa mga Israelinhon ang Yutang Saad. (Huk 1:36) Kini nga dapit wala mahibaloi karong adlawa. Gituohan sa pipila nga kini nga Sela mao ang Sela sa Edom (2Ha 14:7), apan walay ebidensiya nga ang Amorihanong teritoryo nakaabot sa H ngadto pa sa rehiyon nga gigamhan sa mga Edomhanon.

4. Usa ka pangunang siyudad sa Edom nga nailog sa Judeanhon nga si Haring Amazias ug giilisdan ug ngalan nga Jokteel. (2Ha 14:7) Ang Sela lagmit mao ang wala hinganli nga “kinutaang siyudad” nga gihisgotan sa Salmo 108:10.

Kini nga siyudad gituohan sa pipila nga mao ang Umm el-Biyara, nga mga 100 km (60 mi) sa AAS sa amihanang tumoy sa Gulpo sa ʽAqaba. Kining batoon nga kapatagan nahimutang 300 m (984 p) ibabaw sa kasadpang ngilit diin didto gitukod sa ulahi ang Nabataeanhong siyudad sa Petra. Kay maabot agi sa usa ka hiktin, naglikoliko nga lugot ug gilibotan sa titip nga mga pangpang nga sandstone, kini nga kapatagan protektado kaayo. Ang dagkong kagun-oban sa Petra, lakip ang mga templo, lubnganan, ug mga pinuy-anan nga gikubkob diha sa mga bato, dili bahin sa karaang Edomhanon nga siyudad sa Sela. Niining bag-o pa lang, mas gituohan sa mga eskolar nga ang Sela mao ang es-Selaʽ, mga 4 km (2.5 mi) sa AAK sa Bozra.

5. Usa ka dapit nga gihisgotan sa usa ka pahayag batok sa Moab. (Isa 15:1; 16:1) Dili matino kon kini nga dapit mao ra ba usab ang Num. 4.