SAMMAH

1. Usa ka sultan nga Edomhanon; apo nga lalaki ni Esau pinaagi kang Reuel.​—Gen 36:​10, 13, 17; 1Cr 1:37.

2. Magulang nga lalaki ni Haring David, gitawag usab nga Simea ug Simei. (1Cr 2:13; 2Sa 13:3; 21:21) Ingon nga ikatulong anak nga lalaki ni Jese, si Sammah mao ang ikatulong posible nga pilionon nga gisalikway ni Samuel ug wala dihogi ingong hari. (1Sa 16:6-9) Didto siya uban sa kasundalohan ni Saul nga gitamay ni Goliat sa dihang si David nagdala ug mga pagkaon. (1Sa 17:​13, 14, 20, 23) Usa sa mga anak nga lalaki ni Sammah, si Jonatan, ang nagpatay sa usa ka higanteng Filistehanon. (2Sa 21:​20, 21; 1Cr 20:​6, 7) Ang pipila nagtuo nga ang anak nga lalaki ni Sammah nga si Jonatan gitawag usab nga Jehonadab ug mao ang malalangong magtatambag ni Amnon.​—2Sa 13:​3, 32.

3. Usa sa tulo ka hawod nga manggugubat ni David; anak nga lalaki ni Age nga Hararnon. Sa usa ka higayon, gipanalipdan ni Sammah ang usa ka tibuok luna sa yuta batok sa mga Filistehanon, ug daghan kanila ang iyang gipatay. (2Sa 23:​11, 12) Siya ug ang laing duha ka pangunang gamhanan nga mga tawo miadto sa atabay sa Betlehem (niadtong panahona gipanag-iya sa mga Filistehanon), aron sa pagkuha ug tubig alang kang David, apan si David nagdumili sa pag-inom niini. (2Sa 23:13-17) Ang pagtandi sa samang mga talaan sa 1 Cronicas 11:​33, 34 ug 2 Samuel 23:​32, 33 (diin niining ulahi nga teksto ang kasagarang gisugyot nga hubad maoy “si Jonatan nga anak nga lalaki ni Sammah nga Hararnon”) nagpakita nga ang Sage maoy laing ngalan ni Sammah, ug nga si Sammah may anak nga lalaking si Jonatan nga nahimong inila usab nga manggugubat ni David.

4. Usa sa 30 ka gamhanang tawo ni David; usa ka Harodnon. (2Sa 23:​8, 25) Ang magkalahi nga mga espeling sa iyang ngalan daw mipatim-aw sa 1 Cronicas 11:27 (Samot) ug sa 1 Cronicas 27:8 (Samhut), diin ang ulahing teksto nagpaila kaniya ingong pangulo sa ikalimang dibisyon sa binulan nga pag-alagad.