SEBNA

[lagmit pinamubo sa Sebanias].

Usa ka opisyal ni Haring Ezequias. Dihay higayon nga si Sebna mao ang “piniyalan . . . nga nagdumala sa balay,” lagmit iya ni Ezequias​—usa kini ka dungganon nga posisyon. Apan si Jehova nagsugo kang Isaias sa pagsaway kang Sebna, nga nagtagna nga siya ‘palagpoton gikan sa iyang posisyon,’ dayag nga tungod kini sa iyang garbo ug pagpangitag himaya, nga gipakita pinaagi sa pagtukod ug kaugalingong bantaaw nga lubnganan. Ang iyang taas nga besti, paha, ug dominyo, lakip “ang yawi sa balay ni David,” gihatag hinuon ngadto sa ‘alagad sa Diyos nga si Eliakim.’​—Isa 22:15-24.

Hinuon, si Sebna wala tangtangi sa tanang pribilehiyo, kay sa dihang gihulga ni Senakerib ang Jerusalem niadtong 732 W.K.P. ug si Eliakim nahimong piniyalan, si Sebna mao ang sekretaryo sa hari nga gipadala uban kang Eliakim ug sa tigtala aron makigsulti kang Rabsake. Ilang gitaho ngadto kang Ezequias ang maong mga gipamulong nga ginisi ang ilang mga besti, ug dayon gipaadto sila kang Isaias aron magpakisayod kang Jehova.​—2Ha 18:18–​19:7; Isa 36:3–​37:7.