SIMON

[gikan sa lintunganayng pulong nga Heb. nga nagkahulogang “pamati; patalinghog”].

1. Si Simon Iskariote, ang amahan ni Judas nga nagbudhi kang Jesus.​—Ju 6:71; 13:​2, 26.

2. Laing ngalan ni apostol Pedro.​—Mar 3:16; tan-awa ang PEDRO.

3. Usa ka apostol ni Jesu-Kristo, nga gipalahi gikan kang Simon Pedro pinaagi sa terminong “Kananeyo.” (Mat 10:4; Mar 3:18) Bisan tuod nga posibleng si Simon sakop kanhi sa mga Zealot (o mga Masiboton), nga usa ka Hudiyohanong partido nga batok sa mga Romano, tingali maoy tungod sa iyang relihiyosong kasibot nga siya gitawag nga “ang masiboton,” o “ang zealot.”​—Luc 6:​15, ftn sa Rbi8; Buh 1:13.

4. Usa ka manghod nga igsoon ni Jesus sa inahan. (Mat 13:55; Mar 6:3) Bisan tuod dili pa siya magtutuo sa wala pa ang Pista sa mga Tabernakulo niadtong 32 K.P. (Ju 7:2-8), lagmit siya nahimo rang tinun-an sa ulahi. Ang unodnong mga igsoon ni Jesus maoy lakip sa panon sa mga 120 ka tinun-an didto sa Jerusalem panahon sa Pentekostes 33 K.P., bisan tuod si Simon wala nganli sa espesipiko nga diha nianang tungora.​—Buh 1:​14, 15.

5. Usa ka Pariseo nga sa iyang balay mikaon si Jesus. Didto sa ilaha nga ang usa ka babayeng makasasala nagpakita kang Jesus ug dakong kalulot ug pagtahod, nga naghaplas sa iyang mga tiil ug pinahumotan nga lana.​—Luc 7:36-50.

6. Usa ka molupyo sa Betania, nga gihisgotan ingong usa ka “sanlahon” (lagmit mao ang giayo ni Jesus), diin sa iyang balay mikaon si Kristo ug ang iyang mga tinun-an, ingon man ang nabanhawng si Lazaro ug ang iyang mga igsoong babaye nga si Maria ug Marta. Didto si Jesus gidihogan ni Maria ug mahalong pinahumotan nga lana.​—Mat 26:6-13; Mar 14:3-9; Ju 12:2-8.

7. Usa ka lumad nga taga-Cirene ug ang amahan ni Alejandro ug Rufo. Ingong usa ka lumalabay nga gikan sa banika, si Simon gipugos sa pag-alagad aron motabang sa pagpas-an sa estaka sa pagsakit ni Jesus.​—Mat 27:32; Mar 15:21; Luc 23:26; tan-awa ang CIRENE, TAGA-CIRENE.

8. Usa ka salamangkero sa siyudad sa Samaria kinsa nakapahibulong pag-ayo sa nasod pinaagi sa iyang mga kalaki sa salamangka nga tungod niana ang mga tawo nakaingon mahitungod kaniya: “Kining tawhana mao ang Gahom sa Diyos, nga matawag ug Bantogan.” Tungod sa ministeryo ni Felipe, si Simon “nahimong magtutuo” ug nabawtismohan. Sa ulahi, sa dihang nadawat sa mga magtutuo ang balaang espiritu ingong resulta sa pagpandong ni apostol Pedro ug Juan sa ilang mga kamot diha kanila, si Simon nagpakitag daotang motibo, nga nagtanyag ug salapi alang sa awtoridad nga gikinahanglan aron nga kadtong pandongan niya sa iyang mga kamot makadawat ug balaang espiritu. Si Pedro kusganong nagbadlong kaniya, nga nagsulti kang Simon nga ang iyang kasingkasing dili matul-id sa panan-aw sa Diyos ug nag-awhag kaniya nga maghinulsol ug mag-ampo aron mapasaylo. Sa pagtubag, gihangyo ni Simon kini nga mga apostoles nga mangamuyo kang Jehova alang kaniya.​—Buh 8:9-24.

9. Usa ka magtitinag-panit sa Jope nga sa iyang balay, nga daplin sa dagat, giabiabi si apostol Pedro sulod sa ubay-ubayng mga adlaw niadtong 36 K.P.​—Buh 9:43; 10:​6, 17, 32.