SMIRNA

[Mira].

Usa ka karaang siyudad sa K nga kabaybayonan sa Asia Minor; karon gitawag ug Izmir. (HULAGWAY, Tomo 2, p. 946) Unang gipuy-an sa mga Grego, kini gilaglag niadtong mga 580 W.K.P. sa Lydianhon nga si Haring Alyattes. Kapin sa duha ka siglo sa ulahi, giplano ni Alejandrong Bantogan nga tukoron kini pag-usab ingong usa ka Gregong siyudad, kini gihimo sa iyang mga manununod didto sa laing dapit. Human niadto ang Smirna nahimong usa ka iladong siyudad sa komersiyo. Sa dihang kini nahimong bahin sa Romanhong lalawigan sa Asia, ang Smirna nailado tungod sa maanindot nga publikong mga tinukod niini. Kini adunay templo ni Tiberio Cesar ug busa gipasiugda ang pagsimba sa emperador.

Ang Smirna mao ang ikaduha sa pito ka Kristohanong mga kongregasyon sa Asia Minor nga ang hinimayang si Jesu-Kristo nagsugo kang apostol Juan sa pagsulat ug mensahe. (Pin 1:11) Ang kongregasyon gikaingong kabos sa materyal apan dato sa espirituwal. Kini nasulayan pinaagig kasakitan, dayag nga pinaagi ug mga paglutos, ug gipasipalahan sa pipila nga nagtawag sa ilang kaugalingon nga mga Hudiyo, apan kinsa sa pagkamatuod maoy ‘usa ka sinagoga ni Satanas.’ Apan, bisan pa sa ilang kakabos ug kasakitan, ang mga Kristohanon sa kongregasyon sa Smirna gidasig nga dili mahadlok sa mga butang nga ila pang antoson apan nga sila angayng ‘magmatinumanon hangtod sa kamatayon’ aron ilang madawat “ang purongpurong sa kinabuhi.”​—Pin 2:8-11.