SUCOT

[Mga Balongbalong].

1. Usa ka dapit diin, human sa iyang pagpakigkita kang Esau, si Jacob nagtukod ug usa ka balay alang sa iyang kaugalingon ug naghimog mga balongbalong o inatopan nga mga kuwadra alang sa iyang panon sa kahayopan; sa ingon namugna ang ngalang Sucot. (Gen 33:​16, 17) Sa dihang giingon nga ang Sekem, ang dapit nga iyang sunod gihunongan, “anaa sa yuta sa Canaan,” gipaila niini nga ang Sucot wala mahimutang sa sentro sa Canaan.​—Gen 33:18.

Ang ubang mga teksto nagpakita usab nga nahimutang kini sa S sa Suba sa Jordan, sanglit kini tingali nagtumong sa samang dapit. Busa ang Sucot gihisgotan nga usa sa mga siyudad diha sa panulondon sa tribo ni Gad, sa S sa Jordan. (Jos 13:​24, 25, 27) Si Gideon, sa dihang naggukod sa nahibiling kasundalohan sa Midian, mitabok sa Jordan ug miabot sa Sucot, diin ang mga prinsipe sa siyudad wala mohatag ug pagkaon alang sa iyang kasundalohan, sama sa gihimo sa mga tawo sa kasikbit nga Penuel. Sa iyang pagbalik, gikuha ni Gideon ang mga ngalan sa 77 ka prinsipe ug sa mga ansiyano sa Sucot (nga nagpakitang usa kini ka dako nga siyudad) ug gisilotan sila tungod kay wala sila mopaluyo sa iyang pagpakiggubat nga tinultolan sa Diyos. (Huk 8:4-16) Sa dihang ang templo gitukod ni Solomon, ang mga butang nga tumbaga gihulma didto sa Distrito sa Jordan, taliwala sa Sucot ug sa Zaretan.​—1Ha 7:46.

Pinasukad niining maong mga teksto, ang Sucot sagad nga gituohan nga mao ang usa ka dapit didto sa o duol sa Tell Deir ʽAlla (gitawag ug Sukkot karong adlawa), mga 5 km (3 mi) sa S sa Suba sa Jordan ug A lamang ug diyutay sa Jabok sa dapit diin kini miagos gikan sa kabungtoran. Ang haduol nga Tell el-Ekhsas lagmit nagpreserbar sa orihinal nga ngalan, kay kini mao ang Arabiko nga katumbas sa Hebreohanong Sucot. Ang Tell Deir ʽAlla nag-umbaw sa usa ka tabunok nga patag nga lagmit mao “ang ubos nga patag sa Sucot” nga gihisgotan sa Salmo 60:6; 108:7.

2. Ang unang dapit nga gihisgotang gihunongan sa mga Israelinhon sa ilang pagpanaw paingon sa Pulang Dagat. (Ex 12:37) Sanglit ang nahimutangan sa Rameses, ang dapit diin nagsugod ang pagpanaw, ug nianang sa Etam, ang dapit nga gikampohan human sa Sucot, wala na mahibaloi karong adlawa, ang nahimutangan sa Sucot dili usab matino. (Ex 13:20) Bisan pa man, ikaingon nga ang Sucot dayag nga maoy usa ka adlaw nga panaw (32 ngadto sa 48 km; 20 ngadto sa 30 mi) gikan sa Kamingawan sa Etam, nga gituohang moabot ubay sa amihanan-kasadpang kiliran sa Peninsula sa Sinai.