TAPUA

[(Kahoyng) Mansanas].

1. Usa sa upat ka anak nga lalaki ni Hebron ug kaliwat ni Caleb. (1Cr 2:​42, 43) Gituohan sa pipila nga ang iyang ngalan nalangkit sa Bet-tapua, usa ka lungsod nga duol sa Hebron.​—Tan-awa ang BET-TAPUA.

2. Usa ka lungsod sa rehiyon sa Sepela nga gipahat ngadto sa tribo ni Juda. (Jos 15:​20, 33, 34) Busa lahi kini sa Bet-tapua nga nahimutang sa Hebron. Gituohan nga ang nahimutangan niini lagmit mao ang Horvat Bet Natif nga anaa sa biniyaang balangay sa Beit Nattif, mga 20 km (12 mi) sa K sa Betlehem.

3. Usa ka lungsod diha sa utlanan tali sa Epraim ug Manases. (Jos 16:8) Ang palibot nga dapit, “ang yuta sa Tapua,” gipahat ngadto kang Manases, apan ang siyudad gipahat ngadto kang Epraim. (Jos 17:8) Ang En-Tapua (Jos 17:7) mopatim-aw nga nagtumong sa usa ka kasikbit nga tubod (Heb., ʽAʹyin, o En, nga nagkahulogang “tuboran [tubod],” kon gamiton ingong usa ka prefix) ug lagmit maoy usa ka mas kompleto nga ngalan nga gigamit alang sa siyudad sa Tapua.

“Ang hari sa Tapua” gihisgotan nga lakip sa mga magmamando nga gibuntog ni Josue sa pagsakop sa Canaan (Jos 12:17), ug ang “Tapua” dinhi lagmit nga nagtumong sa siyudad sa Epraim. Ang Tapua sa Epraim gituohan nga mao ang Tell Sheikh Abu Zarad (Tel ʼAbu Zarad), mga 13 km (8 mi) sa HHK sa Sekem ug nahimutang ubos lamang sa lungsod sa Yasuf.