DALUGDOG

Ang dahunog nga mosunod sa kilat. Tungod kini sa kalit nga pagsulbong sa hangin nga miinit gumikan sa maong pagpagawas sa koryente, nga nagpahinabo sa hangin nga kusog kaayong mopalayo gikan sa agianan sa kilat ug dayon mobalik sa naandang nahimutangan niini.​—Job 28:26; 38:25.

Ang Hebreohanong berbo nga ra·ʽamʹ (nagkahulogang “dalugdog”) usahay gihisgotan maylabot kang Jehova (1Sa 2:10; 2Sa 22:14; Sal 18:13), ang Usa kinsa sa popanahon migamit ug dalugdog sa pagtuman sa iyang kabubut-on. Pananglitan, sa panahon ni Samuel, giguliyang ni Jehova ang mga Filistehanon pinaagig dalugdog (Heb., raʹʽam). (1Sa 7:10; itandi ang Isa 29:6.) Ang laing Hebreohanong pulong, qohl, nga usahay gihubad nga “dalugdog” (1Sa 12:​17, 18, ftn sa Rbi8), sa paninugdan nagkahulogang “tingog.”​—Ex 32:​18, 19; Deu 21:18; 1Ha 19:12.

Ang makalilisang nga dahunog sa dalugdog gilangkit sa tingog ni Jehova. (Job 37:​4, 5; 40:9; Sal 29:3-9) Sa dihang ang pipila ka Hudiyo nakadungog kang Jehova nga misulti kang Jesus gikan sa langit, dihay nagkalainlaing opinyon kon kaha ang tingog maoy dalugdog o tingog sa usa ka manulonda. (Ju 12:​28, 29; itandi ang Pin 6:1; 14:2; 19:6.) Ang dahunog sa dalugdog sagad maoy abanteng timailhan sa nagsingabot nga unos, ug ang “mga dalugdog” mahimong magpaila sa mga pasidaan sa Diyos, sama nianang sa Pinadayag 8:5; 10:​3, 4; 16:18.

Alang sa mga Hudiyo nga didto sa tiilan sa Bukid sa Sinai, ang dalugdog nga ilang nadungog maoy usa ka pagpadayag sa presensiya sa Diyos. (Ex 19:16; itandi ang Pin 4:5; 11:19.) Kini nga hitabo o kaha ang pagpanguna sa Diyos sa Israel pinaagi sa usa ka haligi nga panganod (usa ka dapit sa dalugdog) mahimong mao ang gipasabot sa mga pulong sa salmista: “Gitubag ko [Jehova] ikaw sa tago nga dapit sa dalugdog.”​—Sal 81:7.