TIMNAH

1. Usa ka dapit nga nahimutang sa utlanan sa Juda ug Dan. (Jos 15:​1, 10; 19:40-43) Gituohan sa pipila nga mao kini ang usa ka dapit nga kokaamgid sa karaang ngalan, ang Khirbet Tibnah, mga 6 km (3.5 mi) sa K sa Bet-semes, apan walay nakubkoban nga nahibiling mga butang una pa sa Romanhong kapanahonan ang nakaplagan sa maong dapit. Daghan ang mipabor sa pagtuo nga mao kini ang Tell el-Batashi (Tel Batash), mga 7 km (4.5 mi) sa KAK sa Bet-semes, nga nahimutang sa H nga tampi sa bul-oganang walog sa Sorek.

Gipili ni Samson ang usa ka Filistehanong babaye nga taga-Timnah ingong pangasaw-onon sa dihang siya “nangita ug higayon batok sa mga Filistehanon,” kinsa niadtong panahona mao ang nagmando sa Israel. Sa pagpaingon ngadto sa siyudad, iyang gipatay ang usa ka leyon pinaagi lamang sa iyang mga kamot didto sa kaparasan sa Timnah. (Huk 14:​1-6) Sa panahon ni Haring Ahaz, nailog sa mga Filistehanon ang Timnah ug ang sakop nga mga lungsod niini.​—2Cr 28:​16-19.

2. Usa ka siyudad sa bukirong rehiyon sa Juda. Gituohan sa mga eskolar nga kini nga Timnah mao ang Khirbet et-Tabbana (Horvat Tibnah), mga 3 km (2 mi) sa AK sa Gibea (El Jabʽa). (Jos 15:​20, 48, 57) Mopatim-aw nga duol niini nga Timnah nga si Juda nagplano sa pagtupi sa iyang mga karnero, ug didto sa Enaim (nga nahimutang paingon sa Timnah) siya nakigdulog kang Tamar, kinsa naalaan niya nga usa ka pampam.​—Gen 38:12-18.