DIYOS NGA WALA MAILHI

Usa ka bahin sa inskripsiyon diha sa usa ka halaran nga nakita ni apostol Pablo samtang siya didto sa Atenas. Ang mga taga-Atenas nagpasundayag sa ilang kahadlok sa mga bathala pinaagi sa pagtukod ug daghang templo ug mga halaran. Gani ilang gipakadiyos bisan ang dili mga persona ug gipatindog ang mga halaran alang sa Kabantog, Pagkamakasaranganon, Enerhiya, Pangdani, ug Kaluoy. Kay nahadlok tingali nga ilang masayloan ang usa ka diyos ug sa ingon makaagom sa iyang kasuko, ang mga tawo sa Atenas nagpatindog ug usa ka halaran nga gisulatan sa mga pulong, “Alang sa Usa ka Diyos nga Wala Mailhi.” Sa pagsugod sa iyang pakigpulong ngadto sa mga Estoiko, mga Epicureo, ug sa uban pa nga nagkatigom didto sa Areopago (Bungtod ni Mars), mataktikanhong gikuha ni Pablo ang ilang pagtagad ngadto niini nga halaran, nga nagsulti kanila nga mao kini ang Diyos nga iyang gisangyaw nga hangtod niadtong higayona wala nila mailhi.​—Buh 17:​18, 19, 22-34.

Gipamatud-an sa Gregong mga magsusulat nga si Philostratus (170?-245 K.P.) ug Pausanias (ikaduhang siglo K.P.) nga dihay mga halaran nga ingon niini didto sa Gresya. Si Pausanias naghisgot ug mga halaran sa “mga diyos nga ginganlag Wala Mailhi.” (Description of Greece, Attica I, 4) Si Philostratus, diha sa iyang libro nga The Life of Apollonius of Tyana (VI, III), misulat: “Ang pagdayeg sa tanang diyos maoy pagpakita gayod ug kaalam ug pagkamakataronganon, ilabina didto sa Atenas, diin ang mga halaran gitukod aron sa pagpasidungog bisan sa mga diyos nga wala mailhi.”