URIYAS

[Ang Akong Kahayag Mao si Jehova].

1. Usa ka saserdote panahon sa paghari ni Haring Ahaz sa Juda (761-746 W.K.P.). Sa dihang si Ahaz miadto sa Damasco aron sa paghatag ug tributo kang Tiglat-pileser III, iyang gipadala kang Uriyas ang disenyo ug sumbanan sa dakong halaran nga iyang nakita didto ug giingnan siya nga magtukod ug sama niini, ug sa ulahi gisugo siya nga gamiton kini puli sa halaran ni Jehova. Gisunod kini ni Uriyas. (2Ha 16:8-16) Si Uriyas (Urias) nakasaksi usab sa usa ka sinulat ni Isaias. (Isa 8:​1, 2) Bisan tuod wala ipaila, lagmit siya mao ang hataas nga saserdote, tungod sa iyang pagkaprominente ug kay walay laing tawo nga gihisgotan nga naghupot sa maong titulo niining higayona.

2. Usa ka manalagna ni Jehova ug anak nga lalaki ni Semaias gikan sa Kiriat-jearim. Panahon sa paghari ni Jehoiakim, si Uriyas mitagna batok sa Juda ug Jerusalem sama sa gihimo ni Jeremias. Apan sa dihang nahibaloan ni Uriyas nga si Jehoiakim nagtinguha sa pagpatay kaniya, siya mikalagiw ngadto sa Ehipto, apan siya gidala pagbalik ug gipatay, ug gitambog ang iyang lawas sa usa ka komon nga lubnganan.​—Jer 26:20-23.

3. Anak nga lalaki ni Hakoz; usa ka saserdote kansang anak nga lalaking si Meremot maoy usa sa mga saserdote nga gipiyalan ni Esdras sa bulawan ug plata ug mga sudlanan sa templo nga gidala sa Jerusalem. Ang anak ni Uriyas nga si Meremot sa ulahi mitabang sa pag-ayo sa paril sa Jerusalem.​—Esd 8:33; Neh 3:​4, 21.