ZEBEDEO

[lagmit gikan sa lintunganayng pulong nga Heb. nga nagkahulogang “naggasa”].

Amahan sa mga apostoles ni Jesus nga si Santiago ug Juan. (Mat 4:​21, 22; 10:2; 26:37; Mar 3:17; 10:35; Luc 5:10; Ju 21:2) Si Salome gituohan sa kadaghanan nga mao ang asawa ni Zebedeo ug igsoon sa inahan ni Jesus nga si Maria. Kini magkahulogan nga si Zebedeo maoy uyoan ni Jesus tungod kay naminyo kini sa iyang iyaan, ug si Santiago ug Juan maoy mga ig-agaw ni Jesus.​—Mat 27:56; Mar 15:40; Ju 19:25; tan-awa ang SALOME Num. 1.

Ang panginabuhi ni Zebedeo maoy pagpangisda sa Dagat sa Galilea ug lagmit nga miasenso tungod niini, kay dihay mga tawong sinuholan nga nagtrabaho uban kaniya. (Mar 1:​16, 19, 20) Ang iyang asawa nga si Salome nakaalagad kang Jesus sa materyal nga paagi. (Mar 15:​40, 41) Bisan tuod wala hisgoti nga si Zebedeo mismo misunod kang Kristo, ang iyang banay kinabubut-ong mibuhat niana.​—Mat 20:20.