ZELOPEHAD

[lagmit nagkahulogang “Landong (Silonganan) Gikan sa Kalisang”].

Usa ka kaliwat ni Manases pinaagi kang Makir, Gilead, ug Heper. (Num 26:29-33) Si Zelopehad namatay panahon sa 40 ka tuig nga paglatagaw sa kamingawan, dili uban ‘niadtong nakigbatok kang Jehova sa katigoman ni Kore, kondili . . . tungod sa iyang kaugalingong sala.’ (Num 27:3) Wala siyay mga anak nga lalaki apan may lima ka buhing mga anak nga babaye: si Mala, Noa, Hogla, Milca, ug Tirza, nga ang tanan nakasulod sa Yutang Saad.​—Num 27:1; 1Cr 7:15.

Kining linain nga kahimtang nagpatunghag mga suliran labot sa panulondon. Sa dihang gipangayo sa mga anak nga babaye ni Zelopehad ang bahin sa ilang amahan sa yuta sa Manases, gidala ni Moises ang ilang kaso sa atubangan ni Jehova. Ang hudisyal nga desisyon sa Diyos mao nga ang mga anak nga babaye nga walay igsoong lalaki angayng makadawat ug panulondon sa pamilya. (Num 27:1-9; Jos 17:​3, 4) Sa ulahi, gihikay nga kining mga anak nga babaye magminyo sa mga lalaki sa tribo sa ilang amahan aron ang panulondon magpabilin sa ilang tribo.​—Num 36:1-12.