ZERED, BUL-OGANANG WALOG SA

Usa ka bul-oganang walog nga gikampohan sa mga Israelinhon sa dihang sila milibot sa utlanan sa Moab sa kataposan sa dugang pang 38 ka tuig nga paglatagaw sukad sa panahon sa pagrebelde didto sa Kades-barnea. (Num 21:12; Deu 2:​13, 14) Gituohan sa kadaghanan nga kini mao ang Wadi el-Hasaʼ, ang kinatumyang sapa dapit sa habagatan nga nag-agos paingon sa Patayng Dagat. Kini nga walog nahimong utlanan tali sa Moab ug Edom, ug sa kapin sa 56 km (35 mi) nga gilay-on kini midulhog ug mga 1,190 m (3,900 p), nga miabot sa Patayng Dagat sa HS nga tumoy. Ang gilapdon sa walog diha sa ibabaw niini maoy mga 5 ngadto sa 6 km (3 ngadto sa 4 mi). Adunay pamatuod nga may naglumbay nga Edomhanong mga kuta didto nga nagsilbing bantay sa kinaiyanhong agianan sa H sa Wadi el-Hasaʼ.