ZIV

Ang ngalan sa ikaduhang lunar nga bulan sa sagradong kalendaryo; ang ikawalong bulan sa sekular nga kalendaryo sa mga Israelinhon. (1Ha 6:​1, 37) Kini katumbas sa bahin sa Abril ug bahin sa Mayo. Ang komento sa 1 Hari 6:1 diha sa Soncino Books of the Bible nag-ingon bahin sa bulan sa Ziv: “Nailhan karon ingong Iyyar, kini ang ikaduhang bulan sunod sa Nisan. Kini gitawag ug Ziv (kasanag) tungod kay kini moabot sulod sa panahon sa tuig nga ang yuta ‘gipasanag’ tungod sa daghang mga bulak.” (Giedit ni A. Cohen, London, 1950) Ang ngalang Iyyar makaplagan diha sa Hudiyohanong Talmud ug sa uban pang mga sinulat human sa pagkadestiyero.

Niini nga bulan ang pagpangani sa sebada moabot sa kabungtoran ug ang pagpangani sa trigo magpadayon diha sa ubos nga kayutaan. Ang mga bungtod sa Galilea mapuno sa mga bulak. Ang ting-init magsugod niining bulana, ug ang panganod sa kabuntagon inanayng mahanaw tungod sa kainit sa adlaw. Sulod niini nga panahon ang mga tanom mag-agad sa mga yamog nga maporma panahon sa kagabhion, ug kini magpaabot sa pagkatapos sa ting-init sa Oktubre.​—Os 6:4; Isa 18:4.

Ang ika-14 nga adlaw sa Ziv naghatag sa mga Israelinhon ug laing kahigayonan sa pagsaulog sa Paskuwa kon pananglit wala nila kana masaulog sa Nisan 14 tungod kay sila dili presente o mahugaw sa seremonyal nga paagi.​—Num 9:9-13; 2Cr 30:​2, 3.

Panahon sa bulan sa Ziv nga gisugdan ni Solomon ang pagtukod sa templo, ug duolan sa 500 ka tuig sa ulahi sa samang bulan, gisugdan ni Zorobabel ang buluhaton sa pagtukod pag-usab sa templo.​—1Ha 6:1; Esd 3:8.