PLUMA

Usa ka gamit sa pagsulat nga may tinta o susamang pluwido. Sa dihang ang mga tawo sa kakaraanan mosulat diha sa yutang-kulonon, talo, o humokon nga metal sila mogamit ug usa ka dagang (tan-awa ang DAGANG), apan ang pagsulat gihimo usab diha sa pergamino o sa papiro pinaagi sa pluma ug tinta. (3Ju 13; 2Ju 12) Ang Gregong pulong nga gihubad nga “pluma” (kaʹla·mos) nagtumong sa usa ka tangbo nga sa literal mahimong hubaron nga “pangsulat nga tangbo.” Sa karaang mga Ehiptohanon, ang pluma nga tangbo gigama nga may lapad nga pormag-tigib nga tumoy nga giputol o gihiwa aron kini magsilbing pangsulat. Ang mga tangbo lagmit nga gibulad ug gipagahi pinaagi sa pagtabon niini ug pundok sa mga kinalibang sulod sa ubay-ubayng mga bulan, nga sama sa gibuhat sa dili pa dugayng katuigan. Ang mga Grego ug mga Romano migamit ug mga pluma nga tangbo nga tinalinsan ug may gilis, sama sa ulahing mga pluma ug sama usab sa mga tumoy sa pluma sa dili pa dugayng mga panahon.