Buhi ang Pulong sa Diyos

Gipabilhan ni Ruth ang Katawhan sa Diyos

ANG maanyag nga batan-ong babaye dinhi mao si Ruth, kinsa nagpuyo sa Moab, silangan sa Patay nga Dagat. Bisag gimatuto taliwala sa mga Moabihanon nga nagsimba sa bakak nga mga diyos, siya maikagon nga moalagad sa matuod nga Diyos, si Jehova, duyog sa iyang katawhang Israel. (Numeros 25:1-5) Sa nabatonan niya kining higayona, gipahimuslan niya kana nga tim-os nga nahimo siyang minahal sa ubang magsisimba ni Jehova nga nakaila kaniya ingong “labing maayo nga babaye.”—Ruth 3:11.

Ang usa ka gutom sa Israel mitagana kang Ruth sa maong higayon sa pag-alagad kang Jehova. Ingong sangpotanan sa gutom, usa ka pamilya sa upat gikan sa lungsod sa Bethlehem milalin ngadto sa yuta sa Moab. Sila mao ang pamilyang makita dinhi—si Elimelech, iyang asawa si Noemi ug ilang mga anak lalaki si Mahlon ug Chilion. Apan wala madugay tapos niana si Elimelech namatay. Sa ulahi si Mahlon naminyo kang Ruth ug si Chilion naminyo sa laing Moabihanong babayeng ginganlag Orpah. Busa tungod kay may bana ug ugangang-babaye nga nagsimba kang Jehova, nailhan ni Ruth ang matuod nga Diyos.

Apan, wala madugay tapos niadto si Mahlon ug Chilion namatay, nga nagbilin sa tulo ka babaye nga walay bana o mga anak. Dako gayod ang ilang kasubo. Unsay ilang buhaton? Nasayran ni Noemi nga natapos na ang gutom sa Israel. Busa mihukom siya nga mobalik sa iyang katawhan sa Bethlehem. Gihigugma pag-ayo ni Ruth ug Orpah ang ilang ugangang-babaye ug sila mikuyog kaniya. Apan tapos sa kadiyut nga pagpanaw sa dalan, si Noemi, sumala sa imong makita, miingon ngadto sa iyang mga binalaye: ‘Pamauli kamo ug ipon sa pagpuyo sa inyong mga inahan.’

Gihagkan sila ni Noemi sa panamilit ug misugod sila sa paghilak. “Dili, apan mokuyog kami kanimo sa imong pagpauli ngadto sa imong katawhan,” sila mibakho. Miawhag si Noemi: ‘Kinahanglan mopauli kamo, mga anak ko.’ Busa si Orpah misugod sa paglakaw pauli. Apan si Ruth wala molakaw.

Miliso si Noemi kang Ruth ug miingon: “Kumuyog ka sa imong balo nga bilas nga babaye.” Apan si Ruth mitubag nga may hugot nga kasibot: “Ayaw ako paghangyoa nga mobiya kanimo, nga motalikod sa pagkuyog kanimo; kay diin ikaw moadto ako moadto, ug kon diin ikaw mogugol sa kagabhion ako mogugol sa kagabhion. Ang imong katawhan mahimong akong katawhan, ug ang imong Diyos akong Diyos.” (Ruth 1:1-17) Busa si Ruth mikuyog kang Noemi ug nahimong bahin sa katawhan sa Diyos ang Israel.

Ikaw ba, sama kang Ruth, nakaila sa matuod nga Diyos, si Jehova, ug sa katawhang nagaalagad kaniya? Kon mao, hinaot ikaw may samang determinasyon sa paghatag ug maunongong pagpaluyo sa mga alagad ni Jehova karong adlawa sama gayod kang Ruth sa kanhiay!

[Mapa sa panid 8]

(Alang sa bug-os nga pagkahan-ay sa teksto, tan-awa ang publikasyon)

PATAY NGA DAGAT

MOAB