Lihok Dayon Tungod sa “Ilhanan”!
“Managtukaw kamo, tungod kay kamo wala mahibalo sa adlaw o sa takna.”—MATEO 25:13, Byington.
1. Nganong dili maalamon ang mahisama sa buangbuang nga mga ulay sa sambingay ni Jesus?
SA KAHAYAG sa umaabot bulawanong panahon alang sa kalibotan sa linukat nga katawhan, pagkadili-maalamon nga mahisama sa lima ka buangbuang nga ulay sa sambingay ni Jesus! Sila milihok nga ulahi na kaayo ug wala makaapas sa pagsulod sa “gingharian sa mga langit.” Ang maong mga buangbuang wala mag-alagad nga mga kahayag sa gikinahanglang panahon. (Mateo 25:1-12) Sa dihang “kining maayong balita sa gingharian” gikawali na “sa tibuok gipuy-ang yuta alang sa usa ka pamatuod” ug panahon na unya sa “kataposan,” sila unya mawad-an sa ilang higayon nga moapil nianang dili-na-gayod-masubling pribilehiyo sa pag-alagad.—Mateo 24:14.
2, 3. (a) Uban sa unsang tambag gitapos ni Jesus ang sambingay sa napulo ka ulay? (b) Nganong ang maong tambag sa gihapon tukma sa panahon, ug busa ang ‘maalamong ulay’ nga matang kinahanglang kanunay magbaton sa unsa?
2 Kana ang hinungdan gitapos ni Jesu-Kristo ang iyang sambingay uban niining tambaga: “Busa, managtukaw kamo, tungod kay kamo wala mahibalo sa adlaw o sa takna.”—Mateo 25:1-13.
3 Kanang mga pulonga sa Pamanhonong si Jesu-Kristo maoy tukma kaayo sa panahon, ilabina karon, nga 71 ka tuig na ang milabay niining “konklusyon sa sistema sa mga butang.” Bisan pa niining ulahing petsa ang nahibilin sa ‘maalamong ulay’ nga matang wala mahibalo sa adlaw o sa takna sa dihang “ang pultahan” pagatak-opan alang sa dugang higayon sa pagsulod sa langitnong Gingharian aron mahauban sa Pamanhonon nga kaniya sila gikasaad sa kaminyoon. Kanunay gikinahanglan nga kadtong matinguhaon sa pagpamatuod nga sila maalamong mga ulay kanunay magbaton sa espirituwal nga lana. Sa pagbuhat niana ilang ginapadan-ag ang ilang kahayag pinaagi sa pagsabwag “niining maayong balita sa gingharian” alang sa tibuok-yuta, internasyonal nga pagpamatuod hangtod moabot “ang kataposan.”—Mateo 24:14; Marcos 13:10; Pinadayag 14:6, 7.
Ang “mga Karnero” ug “mga Kanding” Karon Ginabulagbulag
4. Sumala sa asoy ni Mateo, unsang kataposang sambingay ni Jesus ang kinahanglang matuman ingong bahin sa “ilhanan” sa Iyang “presensiya”?
4 Una moabot “ang kataposan” sa “konklusyon sa sistema sa mga butang,” ang laing buluhaton sa pagbulagbulag sa katawhan kinahanglang mahitabo ug magaalagad nga bahin sa “ilhanan” nga magapailang kita ania na sa “panahon sa kataposan.” (Daniel 12:4) Kini ang katumanan sa sambingay ni Jesus sa mga karnero ug sa mga kanding, nga pinaagi niana gitapos ni Mateo ang iyang asoy sa dakong tagna ni Kristo mahitungod sa “ilhanan” sa Iyang dili-makitang “presensiya” ug sa “konklusyon sa sistema sa mga butang.”
5. Kanus-a mahitabo ang pagbulagbulag sa katawhan sama sa mga karnero ug mga kanding?
5 Matikdi karon kon unsay gitagna ni Jesus mahitungod niini, sumala sa nahitala sa Mateo 25:31-46. Iyang gisugdan ang sambingay sa pag-ingon: “Inig-abot sa Anak sa tawo diha sa iyang himaya, ug ang tanang manulonda uban kaniya, nan siya molingkod sa iyang mahimayaong trono. Ug ang tanang kanasoran pagatapokon sa iyang atubangan, ug iyang pagabulagbulagon ang katawhan gikan sa usag usa, sama sa pagbulagbulag sa usa ka magbalantay sa mga karnero gikan sa mga kanding. Ug iyang ibutang ang mga karnero sa iyang tuong kamot, apan ang mga kanding sa iyang wala.” Unsay mosunod? Mipadayon si Jesus:
6. Unsay igaingon sa Magbalantay-Hari ngadto sa katawhan sa iyang tuo?
6 “Unya ang hari magaingon sa anaa sa iyang tuo, ‘Umari kamo, kamong gipanalanginan sa akong Amahan, panunda ninyo ang gingharian nga giandam alang kaninyo sukad sa pagkatukod sa kalibotan. Kay ako gigutom ug ako inyong gihatagag makaon; ako giuhaw ug ako inyong gihatagag mainom. Ako usa ka dumuloong ug ako inyong giabiabi; hubo, ug ako inyong gibistehan. Ako nagmasakiton ug ako inyong giatiman. Ako nabilanggo ug ako inyong giduaw.’
7. Unsang pangutana ang himoon sa matarong, karnerohong katawhan, ug unsay itubag sa Hari?
7 “Unya ang mga matarong motubag kaniya sa mga pulong, ‘Ginoo, kanus-a ka ba namo nakitang gigutom ug gipakaon ka, ug giuhaw, ug gihatagan kag mainom? Kanus-a ka ba namo nakitang usa ka dumuloong ug giabiabi ka, ug hubo, ug gibistehan ka? Kanus-a ka ba namo nakitang masakiton ug gibilanggo ug giduaw ka namo?’ Ug sa pagtubag ang hari magaingon kanila, ‘Sa pagkamatuod ako magaingon kaninyo, Sa gidak-on nga inyong gibuhat kini ngadto sa labing gamay niining akong mga igsoon, kini inyong gibuhat kanako.’”
8. (a) Ang samag-kanding nga katawhan wala dayon molihok sa pagbuhat sa unsa? (b) Busa asa sila paadtoa sa Hari nga lahi sa matarong, karnerohong mga tawo?
8 Ang “mga kanding” wala molihok dayon tungod sa “ilhanan.” Sila wala magbuhat sa mga butang gibuhat sa “mga karnero” nga matang. Sa ingon atong mabasa: “Unya siya magaingon, sa baylo, ngadto sa anaa sa iyang wala, ‘Pamahawa kamo kanako, kamo nga tinunglo, ngadto sa walay-kataposang kalayo nga giandam alang sa Yawa ug sa iyang mga demonyo. Kay ako gigutom, apan wala ninyo ako hatagig makaon, ug ako giuhaw apan wala ninyo ako hatagig mainom. Ako dumuloong apan wala ninyo ako abiabiha; hubo, apan wala ninyo ako bistehi; masakiton ug gibilanggo, apan wala ninyo ako atimana.’ Unya sila motubag usab sa mga pulong, ‘Ginoo, kanus-a ka ba namo nakitang gigutom o giuhaw o usa ka dumuloong o hubo o masakiton o gibilanggo ug wala kami mag-alagad kanimo?’ Unya sila motubag kanila sa mga pulong, ‘Sa pagkamatuod ako magaingon kaninyo, Sa gidak-on nga wala ninyo kini buhata ngadto sa usa niining labing gagmay, kini wala ninyo buhata kanako.’ Ug kini sila mopaingon ngadto sa walay-kataposang pagkaputol, apan ang mga matarong ngadto sa kinabuhing walay kataposan.”
9. Tungod sa pagbuhat sa unsa panahon sa presenteng-adlawng pagkatuman sa sambingay ni Jesus sa “mga karnero” ug sa “mga kanding” nga ikaw mahimong maglipay?
9 Lagmit nakig-ambit ka sa pagtuman niining matagnaong ilustrasyon. Namatikdan mo ba ang maayong mga butang gihisgotan ni Jesus? Nabuhat ba nimo kining mga butanga ngadto sa iyang “mga igsoon”? Malipayon ka kon ikaw nakalihok nga sama sa usa ka “karnero” ngadto kanila!
10. Giunsa pagpaila ni Jesus ang kalainan tali sa iyang “mga igsoon” ug kadtong gihulagwayan sa “mga karnero” ug “mga kanding,” ug unsay pasikaranan niini diha sa Bibliya?
10 Gipaila ni Jesus ang kalainan tali sa iyang espirituwal nga “mga igsoon” ug kadtong nagapamatuod nga samag mga karnero o mga kanding. Panahon sa pagkatuman niining sambingaya, ang iyang “mga igsoon” mao kadtong nagasundog kaniya pinaagi sa walay-pag-ukon-ukong paghatag sa ilang kaugalingon ngadto sa Diyos. Sama kang Jesus, sila nagatanyag ug dayag nga ebidensiya niini pinaagi sa pagpabawtismo sa tubig. Dugang pa, si Jehova, ang Amahan sa Haring Jesu-Kristo, nahimong ilang langitnong Amahan tungod sa pagpanganak kanila pinaagi sa Iyang balaang espiritu ug sa ingon naghimo kanilang espirituwal nga “mga igsoon” sa iyang Anak. Kini nagahan-ay kanila alang sa usa ka dapit sa langitnong Gingharian kauban sa ilang Magulang nga Igsoon, si Jesu-Kristo, ang “Hari sa mga hari ug Ginoo sa mga ginoo.” (Pinadayag 19:16) Mahitungod niini kini nahisulat mahitungod kaniya: “Kay siya nga nagabalaan ug sila nga ginabalaan ngatanan nagagikan sa usa, ug tungod niini siya dili maulaw sa pagtawag kanila nga ‘mga igsoon,’ sumala sa iyang ginaingon, ‘Igapahayag ko ang imong ngalan ngadto sa akong mga igsoon; sa taliwala sa kongregasyon pagadayegon ko ikaw uban sa awit.’” (Hebreohanon 2:11, 12) Dinhi ang Salmo 22:22 mapadapat ngadto sa hinimayang Anak sa Diyos, si Jesu-Kristo.
11. Daghan pa ba ang espirituwal nga “mga igsoon” ni Jesus karon sa yuta, ug sila naglangkob sa unsang matang, o “kongregasyon”?
11 Anaa pa sa yuta ang usa ka nahibilin nianang espirituwal nga “mga igsoon” sa nagamandong Haring Jesu-Kristo. Ingong usa ka matang, o “kongregasyon,” sila naglangkob sa “matinumanon ug maalamong ulipon” nga gitagna ni Jesus diha sa iyang tagna mahitungod sa “konklusyon sa sistema sa mga butang.” Matud niya: “Kinsa ba gayod ang matinumanon ug maalamong ulipon nga gitudlo sa iyang agalon sa pagdumala sa mga sakop sa iyang panimalay, aron sa paghatag kanila sa ilang pagkaon sa hustong panahon? Malipayon ang maong ulipon kon sa pag-abot ang iyang agalon makaplagan siyang nagabuhat sa ingon. Sa pagkamatuod ako magaingon kaninyo, Igatudlo niya siya sa ibabaw sa tanan niyang katigayonan.”—Mateo 24:45-47.
12. (a) Sukad 1919 ang “ulipon” nga matang maoy talagsaon sa pagbuhat sa unsa? (b) Ibabaw sa unsang “katigayonan” nga ang “ulipon” gitudlo? (c) Ang “ulipon” nga karon nagalihok maoy bahin sa unsa?
12 Ang makasaysayanhong mga kamatuoran nagatubag sa pangutana ni Jesus mahitungod sa ilhanan nianang “ulipona.” “Ang kongregasyon” nga nagaalagad nga “ulipon” nalangkoban sa iyang hinatag-sa-Diyos nga “mga igsoon” nga ania pa sa yuta. Mao man usab sa ‘maalamong ulay’ nga matang. Sukad 1919 ang maong “ulipon” talagsaon sa pagdulot sa bag-ong espirituwal nga pagkaon gikan sa Bibliya ngadto sa “mga sakop sa panimalay” sa Agalon, nga nagabuhat niana sa panahong labing “husto” alang niana. Busa, ang dili-makitang Agalon nagtudlo niining kasaligang “ulipon” nga matang “ibabaw sa tanan niyang katigayonan” sa espirituwal nga matang. Ilabinang matuod kini bahin sa pagwali “niining maayong balita sa gingharian” sa tibuok yuta, nga ibabaw niana siya magamando. Hangtod karon kining pagpamatuod sa Gingharian nagmauswagon! “Ang matinumanon ug maalamong ulipon” nga nagalihok maoy usa ka iladong bahin sa “ilhanan” nga nagapakita kanato kon unsa na ang takna karon.
13. Sukad kanus-a ang “tanang nasod” natigom atubangan sa Hari, ug kanus-a ang “ulipon” nagsugod sa pagtigom sa “mga karnero” sa Iyang tuong kiliran?
13 Maoy nganha sa mga sakop sa “ulipon” nga matang nga ang matarong nga “mga karnero” nagabuhat sa maayong mga butang. Ang simbolikong mga karnero ug mga kanding maoy katawhan sa tanang nasod nga kanila ang pamatuod sa Gingharian karon ginahatag. Busa, sumala sa gihawasan sa maong mga karnero ug mga kanding, ang “tanang nasod” gitigom atubangan sa Hari nga naglingkod sa iyang langitnong trono sukad sa kataposan sa Hentil nga mga Panahon sa 1914. Nahiuyon nianang gitagnang pagkatigom, ang tuig 1935 mamatikdan. Ang Watch Tower Bible and Tract Society, nga gigamit sa “ulipong” matang, niadto may mga 49 ka sangang buhatan sa tibuok yuta. Nianang samang tuig ang pagtagad sa “ulipon” gitumong ilabina ngadto sa yutan-ong mga samag-karnero, uban ang hunahuna sa pagtigom kanila ngadto sa tuong kiliran sa nagamandong Haring Jesu-Kristo. Sa ingon, kini sila nga gikan sa tanang kanasoran suod nakig-uban sa “ulipon” nga matang.
14. Sa kahayag sa Juan 10:16, unsang bag-ong pagtuo ang nabatonan bahin sa matarong nga mga karnerohon, ug pila ka sangang buhatan sa Watch Tower Society ang karon nagaalagad kanila?
14 Ang maong matarong, samag-karnerong mga tawo dili na hatagan sa malangkobong klasipikasyon ingong “mga tawong may maayong kabubut-on.” (Lucas 2:14, Douay Version) Dili na sila isipong walay-tino, dili-organisadong matang sa mahadlokon-sa-Diyos nga katawhan sa tanang nasod—ang nahisalaag nga mga karnero, ingnon ta. Si Jesus miingon nga siya magatigom sa “ubang mga karnero” ug himoon silang “usa ka panon” uban sa nahibilin sa “ulipon” nga matang. (Juan 10:16) Ang pagtigom sa maong “mga karnero” sukad niadto paunahan maoy talagsaong bahin sa “ilhanan” nga magatimaan sa “konklusyon sa sistema sa mga butang.” Ug aron sa pag-alagad kanila ang Watch Tower Society karon dunay 95 ka sangang buhatan.
Tukma sa Panahong Aksiyon Tungod sa “Ilhanan” Pagagantihan
15. Sa “pagpanunod sa gingharian,” unsang mga kinahanglanon ang kinahanglang kab-oton sa “mga karnero”?
15 Sumala sa sambingay ni Jesus, ang matarong nga “mga karnero” kinahanglang makakab-ot sa pipila ka kinahanglanon panahon sa “konklusyon sa sistema sa mga butang.” Kinahanglang ilang ilhon ug dawaton ang espirituwal nga “mga igsoon” ni Kristo nga naglangkob sa “matinumanon ug maalamong ulipon” nga matang. Ang “mga karnero” kinahanglang mobuhat sa maayong mga butang ngadto sa “ulipon” nga matang, bisan sa pagduaw kanila sa dihang sila bilanggoon nga dili makataronganon. Kini kinahanglang buhaton sa “mga karnero” aron makapahimulos sa panalangin sa langitnong Amahan ug dapiton sila sa Haring Jesu-Kristo aron “panundon ang gingharian nga giandam alang [kanila] sukad sa pagkatukod sa kalibotan.”—Mateo 25:34.
16. Pinaagi sa mga pulong “panunda ang gingharian,” ang Hari nagadapit sa “mga karnero” sa pagsulod sa unsa, nga makalabang-buhi sa unsang “gubat”?
16 Sanglit ang maong “mga karnero” dili mao ang espirituwal nga “mga igsoon” sa Hari, siya dili magdapit kanila sa paglingkod sa langitnong mga trono ug pagmando uban kaniya sulod sa espesyal usa ka libo ka tuig sa iyang pagmando. Pinaagi sa iyang mga pulong “panunda ninyo ang gingharian,” siya nagadapit kanila sa pagsulod sa panahon sa Gingharian tapos sa iyang paglaglag sa tanang dili-diyosnong gingharian niining kalibotana panahon sa “gubat sa dakong adlaw sa Diyos nga Makagagahom sa Tanan” sa Har–Magedon. (Pinadayag 16:13-16) Daghan sa mga karnerohon karon nga buhi ang makalabang-buhi nianang gubat sa tanang gubat ug mosulod sa Usa ka Libong Tuig nga Pagmando ni Kristo nga dili na mamatay.
17 Busa ang Haring Jesu-Kristo nagapakigsulti niining “mga karnero” nga samag ngadto sa iyang mga anak kansang panahon miabot na sa pagpapanunod sa usa ka panulondon gikan kaniya. Pinaagi sa iyang kamatayon ingong hingpit nga tawo aron sa pagtagana sa usa ka halad-lukat alang sa tanang tawo, iyang gibiyaan ang tanang kalaoman sa pagtagamtam nga personal sa yutan-ong Paraiso. (Lucas 23:39-43) Niining bahina si Jesus, “ang kataposang Adan,” maoy lahi sa “unang tawong si Adan” kinsa nakasala ug nagwala sa yutan-ong Paraiso alang sa tanan niyang kaliwat. Sa ingon ang gibanhawng Jesu-Kristo, kinsa mahimong “Amahang Walay Kataposan” sa tibuok linukat nga kalibotan sa katawhan, may butang ikahatag ngadto niining mga karnerohon sa yuta. (1 Corinto 15:45; Isaias 9:6, 7) Ang tawhanong pamilya natukod diha sa “unang tawo si Adan,” uban sa tanan niyang Paraisonhong mga kalaoman ug kahigayonan. Apan kadtong nawala nga Paraiso igapasig-uli pinaagi sa Gingharian sa Diyos diha sa mga kamot sa “kataposang Adan,” si Jesu-Kristo.
18. Sa unsang diwa ang dominyo sa Gingharian “naandam alang sa [mga karnero] sukad sa pagkatukod sa kalibotan”?
18 Maoy tapos sila papahawaa sa unang Paraiso nga si Adan ug Eva nagsugod sa pagpanganak. Ang ikaduha nilang anak, ang matarong nga si Abel, gipatay sa una nilang anak, si Cain. Busa ang ilang anak si Seth giisip nga mipuli sa dapit ni Abel. Sa pagkatawo sa maong mga anak, natukod ang kalibotan sa katawhan. Apan una pa niini, sa gipapahawa ang mga ginikanan sa kalibotan sa katawhan gikan sa Paraiso, gihimo ni Jehova nga Diyos ang iyang maluluy-ong saad mahitungod sa usa ka “binhi” nga magasamad, o magadugmok sa ulo sa simbolikong Bitin, si Satanas nga Yawa. Ang maong “binhi” mao unyay usa ka harianong Binhi, ug kini naglangkit sa usa ka Gingharian, sumala sa katuyoan ug panan-awon sa Diyos. (Genesis 3:15) Busa, sa dihang si Satanas ang Bitin ug ang iyang binhi pagawagtangon na, ang linukat nga mga tawo makasulod na ngadto sa dominyo sa Gingharian sa yuta, ilalom sa langitnong kagamhanan sa madaogong Binhi nga magadugmok sa Bitin ug sa iyang binhi. Niining paagiha “ang gingharian” nga “panundon” sa mga karnerohon gikan sa ilang Amahang Walay Kataposan, si Jesu-Kristo, mao ang dominyo sa Gingharian nga “naandam alang [kanila] sukad sa pagkatukod sa kalibotan.”
19. Unsang matang sa pagsugod ang mabatonan sa tapos-Armageddon nga sistema sa mga butang sa yuta?
19 Sanglit ang simbolikong mga kanding pagaputlon sa kalaglagan sa Armageddon, ang makalabang-buhi nga “mga karnero” maoy mohatag ug matarong nga sinugdanan sa tapos-Armageddon nga sistema sa mga butang sa usa ka Paraisong yuta. Mahitungod niini, si Jesus miingon: “Kini sila [nga kandingon] moadto sa walay-kataposang pagputol, apan ang mga matarong ngadto sa kinabuhing walay kataposan.”—Mateo 25:46.
20. Sa unsang paagi kita makalikay sa paghubad nga sayop sa mga bahin sa “ilhanan”?
20 Sulod niining “konklusyon sa sistema sa mga butang” sukad sa pagkatapos sa Hentil nga mga Panahon sa 1914, “ang mga karnero” ug “ang mga kanding” magkalahi sa paagi sa ilang paghubad sa “ilhanan” sa “presensiya” ni Jesus. Sanglit kita sa walay duhaduha anaa na sa panahon sa paghukom, kining pangutanaha bililhon kaayo: Unsay ipasabot sa “ilhanan” alang kanato? Kon pasagdan sa atong kaugalingong paghukom, basin masayop kita sa paghubad sa mga bahin sa maong “ilhanan.” Busa maayong mangutana: Unsay ginaingon ni Jesu-Kristo nga angay ipasabot kanato niining daghag-bahing “ilhanan”? Sumala kaniya, kini angay magpasabot nga ang presenteng sistema sa mga butang sa dili madugay matapos na sa “dakong kasakitan” nga labi pang malaglagon kay sa tibuok-yutang Lunop sa adlaw ni Noe.—Mateo 24:21.
21. (a) Bisan pag ang “dakong kasakitan” anaa sa unahan, nganong kita magkalipay? (b) Unsang kahigayonan ug posibilidad ang nagalungtad alang sa “mga karnero” nga matang karong adlawa?
21 Bisan pa niana, magkalipay, kay kining maong “ilhanan” nagapasabot usab nga ang Milenyong Pagmando ni Jesu-Kristo haduol na, nga andam mosugod sa pagkalaglag sa sistema sa mga butang ni Satanas sa yuta. (Lucas 21:28) Busa, ilalom sa balaang panalipod ikaw dunay bililhong kahigayonan sa paglabang-buhi nianang “dakong kasakitan” ngadto sa bag-ong sistema sa mga butang, nga niana ang pagkamatarong magapabilin sa walay kataposan. Sa pagkamatuod, gibutang sa imong atubangan ang posibilidad nga dili na gayod mamatay kondili mabuhi sa walay kataposan ug binulahan sa usa ka paraisong yuta ilalom sa unibersohanong pagkasoberano ni Jehova nga Diyos!
22. (a) Kon kita molihok sa gilayon ug sa tukma tungod sa “ilhanan,” unsay atong pagabuhaton? (b) Maylabot sa “ilhanan,” sa unsang paagi si Jesu-Kristo mabayaw?
22 Kon kaha kita espirituwal nga “mga igsoon” ni Kristo o matarong nga “mga karnero,” nan manlihok kita tungod sa “ilhanan” sa gilayon ug sa tukmang paagi. Atong batonan ang dugang bahin sa pagkatuman sa iladong bahin niini: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod.” Unya kita walay kahadlokan dihang moabot ang “kataposan.” Hinunoa, magaawas ang atong kalipay! Unya, si Jesu-Kristo, usab, mabayaw ingong kasaligang tigtagna sa daghag-bahing “ilhanan . . . sa konklusyon sa sistema sa mga butang.”—Mateo 24:3–25:46.
Makatubag Ka Ba?
◻ Kanus-a ang katawhan gibulagbulag samag mga karnero ug mga kanding?
◻ Ikaw mahimong malipayon tungod sa pagbuhat sa unsa panahon sa pagkatuman sa sambingay ni Jesus sa mga karnero ug sa mga kanding?
◻ Kinsa ang “mga igsoon” sa Hari ug “ang matinumanon ug maalamong ulipon”?
◻ Aron sa “pagpanunod sa gingharian,” unsang mga kinahanglanon ang kab-oton sa mga karnerohon?
◻ Unsay atong buhaton aron kita molihok dayon ug sa tukma tungod sa “ilhanan” sa “presensiya” ni Jesus?
17. Sa unsang paagi ang Hari nagapakigsulti ngadto niining “mga karnero,” ug sa unsang paagi siya may nabatonan aron ipapanunod kanila?
[Blurb sa panid 23]
Lihok dayon tungod sa “ilhanan” sa “presensiya” ni Jesus. Ang pagbuhat niana mahimong magkahulogan sa kinabuhing dayon sa Paraiso
[Hulagway sa panid 20]
Sama sa usa ka magbalantay nga magabulagbulag sa mga karnero gikan sa mga kanding, si Jesu-Kristo usab nagabulagbulag sa katawhan karong adlawa. Ikaw ba usa ka karnerohong tawo?