Mga Magmamantala sa Gingharian Nagtaho
Pagsul-ob sa Bag-ong Pagkatawo
ANG Bibliya nagasugo: “Hukasa ninyo ang daang pagkatawo uban ang mga batasan niini, ug isul-ob ninyo ang bag-ong pagkatawo, nga pinaagi sa tukmang kahibalo ginabag-o sumala sa dagway sa usa nga naglalang niana.” (Colosas 3:9, 10) Daghan sa mga Saksi ni Jehova karong adlawa sa nangagi maoy bahin sa limbongan nga kalibotan ni Satanas. Sa pagkabatog tukmang kahibalo sa gikinahanglan sa Diyos sa mga Kristohanon, sila nagbag-o, nagsul-ob sa bag-ong pagkatawo. Ang mosunod nga mga kasinatian nagailustrar sa unsang paagi ang maong mga kausaban mahimo.
◻ Usa ka anad nga kawatan sa Espanya nga may kleptomaniac nga mga hilig nagsugod sa pagtuon sa Bibliya uban sa mga Saksi ni Jehova. Ang iyang balay napuno sa kinawat nga mga butang. Samtang nagpadayon siya sa pag-uswag sa tukmang kahibalo sa mga prinsipyo sa Bibliya, misugod ang iyang konsensiya sa pagsamok kaniya ug midesidir siya sa pag-uli sa mga butang iyang kinawat ngadto sa mga tag-iya.
Iyang giduol ang iyang kanhi nga amo ug gisugid nga nakakawat siyag bag-ong makina sa panglaba gikan kaniya. Kining tawhana, kay nakadayeg sa mga hinungdan sa nabag-o niyang tinamdan, misugot nga siya bayran sa bili sa makina sa panglaba, nga maoy $292 (U.S.), ug miingon nga dili niya pahibaloon ang kapolisan.
Sunod giduaw niya ang alkalde sa lungsod ug mikompisal nga iyang gibuak ang duha ka mahal nga bombilya sa siyudad, ug mitanyag siya sa pagbayad niana. Sa pagkakita nga ang maong tawo nagsul-ob na sa “bag-ong pagkatawo” tungod sa pagtuon sa Bibliya, gipasaylo siya sa alkalde ug wala dawata ang bayad.
Ang tawo miduaw sa uban pa diha sa iyang silinganan nga nag-uli sa kinawat nga mga butang, ug silang tanan nagpahayag sa katingala tungod sa dakong kausaban sa iyang tinamdan tungod sa pagpadapat sa mga prinsipyo sa Bibliya.
Apan ang mga tag-iya sa daghang butang nga diha pa kaniya wala niya hiilhi. Busa tapos sa pag-ampo kang Jehova, miadto siya sa hedkuwarter sa kapolisan ug gihatag ang unom ka stereo radio cassette players nga iyang kinuha gikan sa nagparking nga mga kotse. Natingala ang mga polis kay siya may hinlong rekord uban kanila. Gipabayad nila siyag multa ug gipasilbi kadiyut sa prisohan.
Karon siya may hinlo na nga konsensiya atubangan ni Jehova. Nahiuyon sa Efeso 4:28, “Ayaw na papangawata ang kawatan,” ug kay nag-ila nga ang mga kawatan dili “magapanunod sa gingharian sa Diyos,” siya mihunong sa pagpangawat ug nagsul-ob na sa “bag-ong pagkatawo.”—1 Corinto 6:9, 10.
◻ Ang pagkamatinud-anon niadtong may samag-Kristong mga pagkatawo kadaghanan giila sa mga tagagawas, sumala sa giilustrar sa usa ka eksperyensiya sa Italya. Ang usa ka grabe kaayong aksidente sa kotse nasaksihan sa usa sa mga Saksi ni Jehova. Miduol siya sa usa sa mga kotseng nalangkit sa pagtan-aw kon siya may ikatabang, ug sa pagmatikod sa usa ka lalaking grabeng nasamdan ug naghinugo, siya nakigsulti ngadto kaniya nga mihisgot sa ngalan ni Jehova. Ang lalaki mipataas sa iyang ulo ug nangutana kon siya usa ba sa mga Saksi ni Jehova, nga niana siya mitubag nga oo. Miingon siya: “Miss, daotan ang akong gibati. Ako dunay bag sa kotse nga may minilyong [lira] salapi. Palihog pagdala niana ngadto sa inyong balay. Ako nasayod nga kana maanaa sa maayong mga kamot. Kay kon dili kanang tanang salapi mahanaw ra. Kon mamaayo na ako ikauli nimo ang salapi kanako!” Gidala sa Saksi ang salapi ug giuli kana kaniya sa naulian na siya. Siya mapasalamaton kaayo.
Si Jehova nagapanalangin niadtong “nagahukas sa daang pagkatawo” ug “nagasul-ob sa bag-ong pagkatawo.”—Efeso 4:22-24.
“Ayaw na papangawata ang kawatan, kondili pabudlaya siya, nga magabuhat pinaagi sa iyang mga kamot kon unsay maayong buhat, aron siya dunay ikahatag ngadto sa usang nagkinahanglan.”—Efeso 4:28