Buhi ang Pulong sa Diyos

Nagpaubos ang Tawong Mapahitas-on

ANG mapahitas-ong pangulo sa kasundalohan sa Sirya nga si Naaman ug ang iyang mga sulugoon dinhi nagpadulong sa Israel diin didto naglaom si Naaman nga maayo sa sanla. Nakadungog si Naaman gikan sa sulugoon sa iyang asawa nga batang Israelita bahin sa katingalahang mga milagro nga nahimo sa manalagna ni Jehova sa Israel.

Nagdala si Naaman ug sulat nga gikan sa hari sa Sirya nga nagpailaila kaniya ngadto sa hari sa Israel. Ang sulat naghangyo nga ipaayo si Naaman sa iyang sanla. Sa pag-abot sa Israel, gipakita ni Naaman ang sulat ngadto kang Haring Jehoram, nga naguol kaayo kay dili siya makaayo niining tawhana. Si Jehoram miingon, ‘Ang hari sa Sirya nangita lamag paagi sa pagpakig-away kanako.’ Sa nahibaloan kini sa managlana ni Jehova nga si Eliseo, siya mihangyo nga ipadala ngadto kaniya si Naaman.

Busa si Naaman, uban sa iyang mga kabayo ug mga karro sa gubat, miadto sa balay ni Eliseo. Apan wala mogawas si Eliseo aron sa pagsugat kaniya. Nagpadala lamang siya ug mensahero kinsa misugo kang Naaman: ‘Aron mamaayo ka kinahanglang moadto ug maligo ka makapito sa Suba sa Jordan.’ Nasilo ang mapahitas-ong Naaman ug mibiya nga nasuko. ‘Bisan na lang unta ug sugaton niya ako,’ ug moingon, ‘pag-ampo kang Jehova ug iwarawara ang iyang kamot ibabaw sa may sakit nga dapit. Maayo pang maligo ako sa kasubaan sa Sirya.’ Apan gipakalma si Naaman sa usa sa iyang sulugoon pinaagi sa pagpangatarongan: ‘Ginoo, kon ang manalagna nagsugo kanimo sa pagbuhat ug malisod nga butang, imong buhaton gayod kini. Nganong dili ka na lang maligo, sumala sa iyang gisugo ug mamaayo?’

Namati si Naaman sa iyang sulugoon. Miadto siya sa Jordan ug misalom sa tubig. Ug, sa milagroso, human nga nakaligo sa makapito, nawala ang iyang sanla! Mapasalamaton kaayo si Naaman ug mibiyahe ug balik ngadto kang Eliseo sa pagpasalamat kaniya, usa ka pagbiyahe nga tingali 30 milya (48 km) ang kalay-on.

Mihatag si Naaman kang Eliseo ug mahalong mga gasa ug dayon siya mihangyo: ‘Tagai ako ug duha ka kargang yuta diha sa mula aron akong madala sa pagpauli.’ Alang sa unsa nga katuyoan? Aron didto makahalad siya kang Jehova sa yuta sa Israel. Sa pagkatinuod, nanaad si Naaman nga dili na gayod siya magahalad ug halad nga mga sinunog ni maghalad sa laing diyos gawas kang Jehova.—2 Hari 5:5-17.

Pagkatagsaong kausaban ang gihimo ni Naaman! Tinuod nga usa kini ka maayong pananglitan alang kanato sa pagpalandong. Apan makakat-on kita ug laing pagtulon-an gikan ning hitaboa, nga maoy atong tagdon sa umaabot nga isyu ning magasina.