Buhi ang Pulong sa Diyos

Usa ka Tawong Nadaot Tungod sa Pagkahakog

MAPASALAMATON kaayo si Naaman nga naayo sa iyang sanla. Iyang gipakita ang iyang pagkamapasalamaton pinaagi sa pagtanyag kang Eliseo ug libolibong mga bulawan ug salapi, ug napulo ka ilisang sapot. Apan gibalibaran ni Eliseo ang mga gasa. Si Jehova sa tinuod ang mihimo sa milagrosong pag-ayo, ug si Eliseo midumili sa pagdawat sa dungog pinaagi sa dili pagdawat sa gasa.

Apan komusta ang sulugoon ni Eliseo nga si Geisi? Mahakugong gitan-aw niya kadtong matahom nga mga sapot ug mga salapi. Unsay mahitabo kon magpadayon sa pagpangandoy si Geisi sa pagbaton niining mga butanga? Ang dili tukmang pangibog miagak sa iyang pagkadaldal ug pagkahaylo nga gumikan niana nakahimo siyag daotan.—Santiago 1:13-15.

Buweno, sa ulahi nanamilit sa Naaman ug ang iyang mga sulugoon ug migikan padulong sa ilang mga balay sa Sirya. Apan wala mohunong si Geisi sa paghunahuna bahin niadtong matahom nga sapot ug mga salapi. Tan-awa didto! Nagdagan si Geisi. Asa siya paingon?

Gigukod ni Geisi si Naaman ug nakaapas kaniya. Gitagbo ni Naaman si Geisi, ug nangutana: ‘Maayo ba ang tanan?’ ‘Oo,’ mitubag si Geisi. ‘Apan gipaanhi ako ni Eliseo sa pagsulti kanimo nga adunay duha ka bisitang miabot. Ug buot ni Eliseo nga imong hatagan sila ug duha ka ilisang sapot ug pipila ka salapi.’ Apan bakak kini. Gitinguha ni Geisi kining mga butanga. Apan, si Naaman, wala mahibalo niini, ug busa nalipay siya sa paghatag ning mga gasaha. Miinsister gani siya sa pagpadala kang Geisi ug daghan pang salapi kay sa iyang gipangayo.

Sa mipauli si Geisi sa balay, nangutana si Eliseo: ‘Diin ka gikan?’

‘Oh, diha lang,’ siya mitubag. Apan, gipadayag ni Jehova kang Eliseo ang daotang butang nga gihimo ni Geisi. Busa si Eliseo miingon: ‘Dili kini panahon sa pagdawat sa salapi ug sapot! Busa ang sanla ni Naaman moabot kanimo ug sa imong kaliwat.’ Dihadiha gisanla si Geisi, ug kining makalilisang nga sakit nagpabilin kaniya sa tibuok niyang kinabuhi. Ang nahitabo kang Geisi nagpakita kon sa unsang paagi ang pagkahakog moresultag kadaotan.—2 Hari 5:5, 15-27.