Kinabuhi ug Ministeryo ni Jesus

Pagkatawo ni Jesus—Diin ug Kanus-a?

KAY nagsingabot na ang panahong si Maria manganak, nganong gihimo ni Jose ang hataas nga panaw? Aw, ang emperador sa Romanhong Imperyo, si Cesar Agosto, mihimog balaod nga ang tanan kinahanglang mobalik sa siyudad nga iyang natawhan aron sa pagparehistro. Busa si Jose moadto sa iyang dapit-natawhan, ang siyudad sa Bethlehem.

Didto na sa Bethlehem ang daghang tawo aron magparehistro, ug ang dapit lamang nga hikit-an ni Jose ug Maria nga kasak-an mao ang usa ka kuwadra. Didto, diin gihuptan ang mga asno ug ubang hayop, si Jesus natawo. Giputos siya ni Maria sa bakbak ug gibutang siya sa usa ka pasungan, ang dapit nga butanganan sa pagkaon sa mga hayop.

Tinong sa pagtultol sa Diyos nga gibuhat ni Cesar Agosto ang iyang balaod sa pagparehistro. Kadto mipahinabo sa pagkatawo ni Jesus sa Bethlehem, ang siyudad nga dugay nang gitagna sa Kasulatan nga mahimong dapit-natawhan sa gisaad nga hari.

Pagkabililhon kadto nga gabii! Didto sa kapatagan ang usa ka dan-ag nga kahayag misidlak palibot sa usa ka pundok sa mga magbalantay sa karnero. Kadto ang himaya ni Jehova! Ug giingnan sila sa manulonda ni Jehova: ‘Natawo karon alang kaninyo sa Bethlehem ang usa ka manluluwas, nga mao ang Kristo ang Ginoo. Inyo siyang makaplagang nagahigda sa usa ka pasungan.’ Sa kalit mitungha ang daghan pang manulonda ug miawit: “Himaya sa Diyos sa kahitas-an, ug ibabaw sa yuta pakigdait taliwala sa mga tawong may maayong kabubut-on.”

Sa namiya ang mga manulonda, isig-ingon ang usag usa sa mga magbalantay: ‘Mangadto kita sa Bethlehem sa pagtan-aw niining butanga nga gipahibalo kanato ni Jehova.’ Sila nagdali sa paglakaw ug nakaplagan si Jesus sa dapit gayod nga gisulti sa manulonda. Sa giasoy sa mga magbalantay sa karnero kon unsay gisulti kanila sa manulonda, ang tanang nakadungog niana natingala. Gitipigan ni Maria kadtong tanang panultihon ug gihambin kana sa iyang kasingkasing.

Daghang tawo karong adlawa nagtuo nga si Jesus natawo sa Disyembre 25. Apan ang Disyembre maoy ting-ulan ug tugnaw sa Bethlehem. Ang mga magbalantay sa karnero dili mahimong tua sa gawas sa kapatagan uban sa ilang mga panon nianang panahona sa tuig. Usab, ang Romanong Cesar lagmit dili magbaod sa katawhang nakiling sa pagrebelde batok kaniya sa pagpanaw sa dakong tingtugnaw aron magparehistro. Dayag si Jesus natawo sa usa ka panahon sa sayong tinghunlak sa tuig. Lucas 2:1-20; Miqueas 5:2.

◆ Nganong si Jose ug si Maria miadto sa Bethlehem?

◆ Unsang kahibulongang butang ang nahitabo sa gabiing natawo si Jesus?

◆ Unsaon nato pagkahibalong si Jesus wala matawo sa Disyembre 25?

[Bug-os panid nga letrato sa panid 9]