Pagpasakop Kang Jehova Pinaagi sa Pagpahinungod
KITA nahibalo nga kini nagagikan sa Diyos, apan ang tibuok kalibotan nahiluna sa gahom sa usa nga daotan.” Nianang mga pulonga giestablisar ni apostol Juan ang wala-kahinangpi nga kamatuoran sa kadaghanang tawo, nga mao, nga ang tibuok kalibotan nahiluna sa gahom sa “usa nga daotan,” si Satanas. Bisan pa niana, si Satanas “wala makagahom” niadtong nagagikan sa matuod nga Diyos, si Jehova. Sa ingon ang tibuok tawhanong pamilya kinahanglang mailalom kaha sa pagmando ni Satanas ug sa pagmando ni Jehova. Kini butang nga pagapilion sa personal. Kang kinsa ka magpasakop? Kang Satanas kun kang Jehova?—1 Juan 5:18-20; New International Version; Today’s English Version.
Labaw kay sukad masukad karon ang panahong ang matag usa magapili. (Lucas 21:31, 32) Gipadayag ni Jesus nga dili mahimong adunay tungatunga nga posisyon, o pagduhaduha. Siya mipahayag, “Siya nga dili dapig kanako maoy batok kanako, ug siya nga wala motigom ngari kanako matibulaag.” (Mateo 12:30) Sa unsang paagi kita makatinong kita nagatigom uban kang Kristo? Daghang kaayong nabahinbahin ug nagkadaiyang relihiyon nagaangkong Kristohanon, nga “naluwas na” ug “gipanganak pag-usab,” ug kining mga pulonga nahimong kasagaran na. (Mateo 19:16-26; Juan 3:3; 10:9) Ang lagda mao: Nagtuo ug nagmantala ba kita sa butang gituohan ug gimantala ni Jesus? Ingong Hudiyo, siya tinong wala magsulay sa paghimaya sa iyang kaugalingon pinaagi sa pagtudlog misteryosong doktrina sa Trinidad. (Juan 14:28; 17:1-5) Apan siya mimantala sa usa ka tin-awng mensahe, ang mensahe sa Gingharian sa Diyos. Kay mahunahunaon sa gisugo kaniya, si Jesus miingon: “Igapahayag ko usab ang maayong balita sa gingharian sa Diyos ngadto sa ubang siyudad, tungod kay alang niini ako gipadala.”—Lucas 4:43.
“Itugot Lang Kini Karon”
Una mosugod sa iyang dayag nga ministeryo sa pagpahayag sa Gingharian sa Diyos, iyang gikuha ang usa ka hinungdanong lakang nga nagasilbing panig-ingnan alang sa tanan niadtong si kinsa, sama kaniya, magpasakop sa ilang kaugalingon ngadto sa iyang Amahan. Ang asoy ni Mateo nagasugid kanato: “Unya si Jesus gikan sa Galilea miadto sa Jordan ngadto kang Juan, aron sa pagpabawtismo kaniya.” Sa mitutol si Juan nga siya ang angay pagabawtismohan, ang tubag ni Jesus mao: “Itugot lang kini karon, kay nianang paagiha angay natong pagabuhaton ang tanan nga matarong.”—Mateo 3:13-15.
Kay nakahatag sa panig-ingnan diha sa “tanan nga matarong” pinaagi sa pagpabawtismo sa Jordan, si Jesus sa ulahi nakahatag sa sugo ngadto sa iyang mga tinun-an: “Busa panlakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang akong gisugo kaninyo.” (Mateo 28:19, 20) Apil sa ubang mga butang, kining lakang sa bawtismo magpaila niadtong nagpili sa pagpasakop sa matuod nga Diyos, si Jehova, inay sa pagpasakop kang Satanas. Sulod sa miaging tuig sa pag-alagad (Septiyembre 1983–Agosto 1984) duolag 180,000 ka tawo sa tibuok kalibotan ang nagpaila sa ilang pagpili pinaagi sa bawtismo sa tubig. Ilang gipadayag nga ilang gipalabi ang pagkasoberano ni Jehova kay sa iya kang Satanas.—Proverbio 27:11.
Desisyong Gipasukad sa Kahibalo
Sa susama karong tuiga libolibo ang nagaplano sa lakang sa bawtismo panahon sa “Mga Maghuhupot sa Integridad” nga Kombensiyon nga himoon sa daghang dapit sa tibuok kalibotan. Una makadangat niining punto sa bawtismo, ang tanang kandidato maampingon nga nakasubli uban sa mga ansiano sa kongregasyon sa prinsipal nga mga doktrina ug mga lagda alang sa Kristohanong kagawian sa pagtino nga sila takos na gayod nga bawtismohan. Sa ingon ang desisyon sa pagpabawtismo dili gayod kalit emosyonal nga reaksiyon. Hinunoa, ang matag usa ‘nakasuta sa iyang kaugalingon sa maayo ug dalawaton ug hingpit nga kabubut-on sa Diyos’ ug buot mopasakop sa maong kabubut-on.—Roma 12:2.
Sa pagkatapos sa pakigpulong sa bawtismo sa kombensiyon, ang mga kandidato sa bawtismo makatubag na uban ang lalom nga pagsabot ug kinasingkasing nga apresasyon sa duha ka yanong pangutana nga nagapamatuod nga ilang nasayran ang mga ipasabot sa pagsunod sa panig-ingnan ni Kristo. Ang unang pangutana mao:
Sa pasikaranan sa halad ni Jesu-Kristo, naghinulsol ka na ba sa imong mga sala ug nagpahinungod sa imong kaugalingon kang Jehova sa pagbuhat sa iyang kabubut-on?
Ang ikaduha mao:
Nasabtan ba nimo nga ang imong pagpahinungod ug bawtismo nagapaila nga ikaw usa sa mga Saksi ni Jehova nga nakig-uban sa tinultolan sa espiritu nga organisasyon sa Diyos?
Kay mitubag ug oo sa maong mga pangutana, ang mga kandidato anaa sa matarong kahimtang sa kasingkasing nga mohimo sa Kristohanong bawtismo.
Tukma nga Kagawian
Usahay ang mga pangutana ipatungha mahitungod sa tukmang biste alang niadtong pagabawtismohan. Ang pagkakasarangan angay gayong maglungtad sa matang sa humdonon nga gamiton. Kini hinungdanon karong adlawa dihang ang mga magdedesinyo sa urog morag buot magpasundayag sa pagkaseksi ug mokab-ot sa halos bug-os nga kahubo. Ang laing butang pagakonsiderahon mao nga ang pila ka biste nga mopatim-awng ligdong o kasarangan kon uga dili ingon kon basa. Walay mausa nga nagapabawtismo ang buot mahimong hinungdan sa pagkahisalaag sa hunahuna o kapandolan panahon sa usa ka okasyong seryoso sama sa bawtismo.—Filipos 1:10.
Sa nangagi, ang pipila nagpasobra sa paghatag ug mahal nga mga regalo ug pag-andam sa dagkong mga parti alang sa bag-ong nabawtismohang mga tawo. Ang bawtismo maoy usa ka okasyon sa dakong kalipay nga maambitan, apan tingali ang pahimatngon angay dinhi. Ang Bibliya nagaingon: “Labi pang maayo ang kataposan sa kaulahian sa usa ka butang kay sa sinugdanan niini.” (Ecclesiastes 7:8) Ang bawtismo maoy usa ka sinugdanan—ang sinugdanan sa Kristohanong lumba alang sa kaluwasan ngadto sa kinabuhi. Tinong wala pay nahimong hataas nga rekord sa matinumanong pag-alagad. Busa nganong pabation ang bag-ong mga kinabig nga sila importante kaayo?—Itandi ang 1 Timoteo 3:6.
Unsay ginaingon sa talaan sa Bibliya nga nahitabo tapos ang tulo ka libo nabawtismohan sa Pentekostes 33 K.P.? “Sila nagpadayon sa paghalad sa ilang kaugalingon ngadto sa pagtulon-an sa mga apostol ug sa pag-ambitay sa usag usa, sa pagpangaon ug sa mga pag-ampo.” Gibutang nila ang bug-os nilang hunahuna sa espirituwal nga mga butang ug nag-abiabihay sa usag usa. (Buhat 2:41, 42) Ang bawtismo maoy panahon sa pagpalandong ug sa ugdang nga paghunahuna. Kita malipay sa pagtan-aw nga ang atong mga estudyante sa Bibliya mihimo niining kinahanglanon nga lakang. Ug ang atong kagawian sa dapit sa bawtismo angay magpaila sa mga tumatan-aw nga nahimo na ang usa ka hinungdanong desisyon—ang pagpasakop ngadto sa Diyos ingong Soberanong Ginoo ug, ingong usa ka saksi ni Jehova, nga mahimong dili bahin sa kalibotan nga nahiluna “sa gahom sa usa nga daotan.”—1 Juan 5:19; Mateo 4:10.
[Blurb sa panid 30]
Sukad sa Hunyo 1984, ang total nga 808 “Pag-uswag sa Gingharian” nga mga Kombensiyon sa mga Saksi ni Jehova gihimo sa tibuok yuta. Ang katibuk-ang tumatambong nga gitaho maoy 5,002,684. Sa maong gidaghanon 63,556 ang nabawtismohan.