Madaogon sa “Ulahing Bahin sa mga Adlaw”

“Adunay usa ka Diyos sa langit nga Tigpadayag sa mga tinago, siya nagpahibalo . . . sa mga butang manghitabo sa ulahing bahin sa mga adlaw.”—DANIEL 2:28.

JEREMIAS, EZEKIEL, DANIEL—pagkakulbahinam sa mga tagna nga atong mahinumdoman niadtong mga ngalana! Hapit 2,600 ka tuig kanhi, kadtong tulo ka maisogong mga alagad sa Soberanong Ginoong Jehova nabuhi sa katibuk-an sa ulahing bahin sa apostatang Jerusalem, nga nag-alagad sa nagkalainlaing mga lugar ug ilalom sa lahi kaayong mga sirkumstansiya. Apan ang matag usa sa iyang kaugalingong panan-aw nanagna bahin sa mga hitabo nga matapos sa “ulahing bahin sa mga adlaw.” Kadtong dinasig nga mga sulat napreserbar sa pagdasig sa tanan nga nahigugma sa Diyos ug sa pagkamatarong, ug nagatinguha nga maluwas sa “dakong kasakitan” nga mahitabo sa atong panahon.—Mateo 24:3-22; Roma 15:4.

² Nanagna si Jeremias sa Jerusalem. Sa nagsingabot ang kalaglagan, ang mga magmamando ug mga katawhan nangahulog sa pagkamalapason ug pagkadaotan. Busa, gipabaskog ni Jehova ang iyang manalagna sama sa “usa ka linig-on nga kuta nga tumbaga” aron makabarog nga malig-on taliwala sa ilang pagkadaotan.—Jeremias 15:11, 20; 23:13, 14.

Mga Manalagna sa Pakigdait

³ Mahitungod sa balikong relihiyosong mga pangulo sa Jerusalem, gisultihan ni Jehova si Jeremias: “Ayaw pagpatalinghog sa mga pulong sa mga manalagna nga nagapanagna kaninyo. Gihimo nila kamong mga walay kapuslanan. Ang panan-awon sa ilang kaugalingong kasingkasing maoy ilang gipamulong—ug dili gikan sa baba ni Jehova. Ginabalikbalik nila kini pagsulti ngadto sa mga walay pagtahod kanako, ‘Si Jehova miingon: “Makabaton kamo ug pakigdait.”’” Kadtong mini nga mga manalagna nanag-ingon, “Adunay pakigdait! Adunay pakigdait!” nga sa pagkatinuod walay pakigdait.—Jeremias 23:16, 17; 6:14.

⁴ Maingon man, sa apostatang Kakristiyanohan karon, adunay mga manalagna sa pakigdait. Daghan kanila milaom nianang gibatbat ni Papa Paulo VI ingong “ang kataposang paglaom sa kahusay ug pakigdait,” ang Hiniusang Kanasoran. Sa dili madugay, kanang lawasa modeklarar sa 1986 ingon nga mao ang Internasyonal nga Tuig sa Pakigdait. Sa pagpahayag sa katuyoan niini sa pakigbahin sa Tuig, ang Santa Sede mideklarar nga kini “nagahambin ug paglaom nga kining Tuiga mopatunghag ginatinguhang mga resulta ug magtimaan sa usa ka hinungdanong yugto sa pagpatunghag makigdaitong relasyon tali sa katawhan ug kanasoran.” Apan realistiko ba ang paglaom sa mga nasod sa pagtukod ug tinuod nga pakigdait?

⁵ Gibatbat sa Diyos mismo ang mahitabo: “Tan-awa! Ang unos sa kaligutgot ni Jehova migula, ingon sa bagyong nagaalimpulos. Mohapak kini diha sa mga ulo sa daotan. Ang kasuko ni Jehova dili mosibog hangtod nga iyang ikapakanaog kini ug hangtod nga iyang mabuhat ang tuyo sa iyang kasingkasing. Sa ulahing bahin sa mga adlaw inyo kining hatagan ug pagtagad uban sa pagsabot [o, “bug-os ninyong masabtan,” The New English Bible].” (Jeremias 23:19, 20; tan-awa usab ang 30:23, 24.) Oo, ang mga pangulo sa bakak nga relihiyon makadangat sa pagsabot kon unsay kahulogan alang kanila sa “ulahing bahin sa mga adlaw.” Apan ulahi na unya kaayo ang ilang paghatag ug pagtagad!—Itandi sa Pinadayag 18:10, 16; 19:11-16; Mateo 24:30.

⁶ Apan, makalilipay, daghang indibiduwal nga nabihag kanhi sa bakak nga relihiyon ‘mihatag ug pagtagad niini.’ Ilang gitubag ang panawag: “Gumula kamo kaniya [bakak nga relihiyon], katawhan ko,” sanglit dili sila buot nga makabahin sa ilang kasal-anan o makaambit sa silot sa Diyos batok kaniya. Kon usa ikaw kanila, hinaot nga magpadayon ka sa pagpatalinghog sa gipamulong sa Pulong sa Diyos bahin sa “ulahing bahin sa mga adlaw” ug sa mahimayaong yugto sa pakigdait nga mosunod.—Pinadayag 18:2, 4, 5; 21:3, 4.

Pag-atake ni Gog

⁷ Unsay kahimtang sa katawhan sa Diyos sa panahon sa “ulahing bahin sa mga adlaw”? Pasagding suginlan kita sa manalagnang Ezekiel. Sa bata pa, sa walay duhaduha nakaila siya kang Jeremias, apan niadtong panahona nabihag si Ezekiel sa Babilonya. Didto, sa suba sa Chebar, gisugo siya sa 613 W.K.P. sa paglihok ingong manalagna ni Jehova ug magbalantay alang sa nabihag nga mga Hudiyo, usa ka pag-alagad nga matinumanon niyang gituman labing menos 22 ka tuig. Apan, ang iyang mga tagna misaylo pa sa iyang kaugalingong panahon. Sa mga kapitulo 38 ug 39, siya nagsugilon bahin sa ‘Gog sa Magog.’

⁸ Kinsa kining ‘Gog sa Magog’? Buweno, kinsa ang pangunang kaaway ni Jehova nga kaniya siya makighusay sa dakong isyu sa “ulahing bahin sa mga adlaw,” sa unibersal nga pagkasoberano? Siya mao si Satanas nga Yawa, nga maoy gitambog sa Magbalantay-Hari, si Jesu-Kristo, gikan sa langit tapos sa Iyang paglingkod ingong hari sa 1914. Ang naus-os ug nasukong Gog karon gipahimutang sa pinugngang espirituhanong gingharian, “ang yuta sa Magog,” nga duol niining yutaa. Nahimong “alaut sa yuta” niini tungod kay nasayod ang Gog nga mubo na lamang ang iyang panahon sa pagpadayon sa iyang daotang plano sa ‘pagmando o sa paglaglag.’—Ezekiel 37:24-28; 38:1, 2; Pinadayag 11:18; 12:9-17.

⁹ Gikutlo ni Ezekiel ang Soberanong Ginoong Jehova nga nagaingon: “Ako batok kanimo, O Gog, ikaw nga pangulo [magmamando sa kalibotan] . . . Ug pabalikon ko ikaw ug sab-itan ko sa mga taga ang imong mga apapangig ug pagulaon ko ikaw ug ang tanan mong kasundalohan, . . . ang daghang katawhan uban kanimo.” (Ezekiel 38:3-6; Juan 12:31) Oo, si Gog adunay daghang katawhan nga uban kaniya, kay “ang tibuok kalibotan anaa sa gahom sa usa nga daotan.” (1 Juan 5:19) Apan, si Jehova makahimo sa pagsab-it sa mahulagwayong mga taga sa mga apapangig ni Gog sa pagmaniobra kaniya. Apan ngano, ug sa unsang paagi?

¹⁰ Ilalom sa paghulhog ni Gog, ang dagkong mga gahom karon nangatarongan nga nagadepende ang pakigdait sa kalibotan sa ilang pagtumpig dugang pang makalilisang nga nukleyar nga mga armamento. Ug mipaluyo kanila ang ubang mga nasod. Apan, ang katawhan sa Diyos nga “ginatigom gikan sa mga nasod” misalikway sa mga hinagiban sa kapintasan. Ang mga Saksi ni Jehova mao lamang ang “nasod” sa yuta nga matinud-anong makaingon, “Sa Diyos kami mosalig.” (Isaias 2:4; 31:1; Proverbio 3:5) Kining makigdaitong mga saksi ni Jehova “nanagpuyo sa kasegurohan, silang tanan nanagpuyo nga walay kuta, ug sila walay mga trangka ni mga ganghaan.” Sila “nanagpuyo sa kinapusoran sa yuta,” alang sa tanang mga nasod, sila nahimong talan-awon ingon nga mao ang katawhan nga dili mabitik ni Gog. (Ezekiel 38:11, 12) Busa, giagak sa nasukong Gog sa Magog ang tibuok demonyohanong organisasyon sa panggubatan. Sama sa leon nga nagangulob, ang naus-os nga Satanas nangandam sa bug-os nga pag-atake. Aron maluwas, kita kinahanglang ‘mosukol batok kaniya, malig-on sa pagtuo.’—1 Pedro 5:8, 9.

¹¹ Gisugo ni Jehova si Ezekiel: “Busa panagna, O anak sa tawo, ug umingon ka sa Gog, ‘Mao kini ang giingon sa Soberanong Ginoong Jehova: “Niadtong adlawa sa diha nga ang katawhan [espirituwal] nga Israel magapuyo sa kasegurohan, dili ba ikaw mahibalo niini?”’” Si Gog ug ang iyang panon nasina sa kasegurohan ug sa kauswagan nga ilang nakita sa mga Saksi ni Jehova karon. Nangasuko sila sa paghimo nila nga “dili bahin sa kalibotan” ni Satanas. Sa ingon gibiaybiay ni Jehova si Gog, nagaagda kaniya sa pag-atake sa walay ikasukol nga mga Saksi. Gisultihan ni Jehova si Gog: “Ikaw motungas batok sa akong katawhan nga Israel, ingon sa mga panganod nga motabon sa yuta. Sa ulahing bahin sa mga adlaw kini mahitabo, ug dad-on ko gayod ikaw batok sa akong yuta, aron ang mga nasod makaila kanako sa diha nga ako pagabalaanon atubangan sa imong mga mata, O Gog.”—Ezekiel 38:14, 16; Juan 17:14, 16.

¹² Ang nasukong Gog moasdang sa mauswagong “yuta” sa katawhan ni Jehova. Apan, si Gog ba lamang ang masuko? Komusta ang kasuko sa Soberanong Ginoong Jehova batok kang Gog ug sa iyang mga panon? Diha sa Ezekiel 38:18-23 gibatbat ni Jehova kon unsaon niya sa ‘pagbalaan sa iyang kaugalingon atubangan sa mga mata sa mga nasod’ pinaagi sa paglaglag kang Gog ug sa pagluwas sa iyang maunongong mga alagad. Gitapos ang iyang taho sa iyang kadaogan batok kang Gog ug sa iyang mga panon, ang Soberanong Ginoo mismo mipahayag: “Sila makaila nga ako mao si Jehova.” Ang iyang mahimayaong ngalan mabindikar!

‘Nabutyag ang mga Tinago’

¹³ Samtang nanagna si Ezekiel taliwala sa nabihag nga mga Hudiyo duol sa Babilonya, ang batan-ong Daniel, nga kaliwat sa Hudiyohanong mga hari, giedukar sa harianong korte ni Nabucodonosor. Didto, ingong maghuhupot sa integridad, siya mihatag ug maayong panig-ingnan sa tanang batan-ong mga alagad ni Jehova karon.—Daniel 1:8, 9.

¹⁴ Sa ikaduhang tuig sukad sa pagkapukan sa Jerusalem, gitugaw si Nabucodonosor sa usa ka damgo. Sa pagmata, walay siyay nahinumdoman sa iyang damgo. Apan ang mahadlokon sa Diyos nga Daniel mipadayag sa hari sa damgo ug sa kahulogan niini. Sa pagbuhat sa ingon, iyang gipasidunggan ang Diyos, nga nagaingon ngadto sa hari: “Adunay usa ka Diyos sa langit nga Tigpadayag sa mga tinago, ug siya nagpahibalo kang Haring Nabucodonosor kon unsay mahitabo sa ulahing bahin sa mga adlaw.” (Daniel 2:28). Unsay atong makat-onan niining damgoha ug sa aplikasyon niini sa “ulahing bahin sa mga adlaw”?

¹⁵ Dinhi atong makita ang dako, habog nga larawan, nga sa dakong bahin hinimo sa nagkalainlaing mga metal nga nagkasunodsunod. Gibatbat ni Daniel nga naglarawan kini ug sunodsunod nga mga gingharian ug gisultihan si Nabucodonosor, “Ikaw mao kadtong ulo nga bulawan,” nga naghulagway sa gingharian sa Babiloniya. Dihay misunod nga ubang mga gahom sa kalibotan, ang dughan ug mga bukton nga salapi naglarawan sa Medo-Persia, ang tumbagang tiyan ug mga paa sa Gresya, ug ang puthawng mga batiis sa Roma ug, ang ulahi, ang gahom sa kalibotan nga Britanya ug Amerika. (Daniel 2:31-40) Hangtod sa “tinudlong panahon sa kanasoran,” gikan sa 607 W.K.P. ngadto sa 1914 K.P., kining mga gahoma nagmando sa gingharian sa ‘diyos niining kalibotana.’—Lucas 21:24; 4:5, 6; 2 Corinto 4:4.

¹⁶ Apan, sa “ulahing bahin sa mga adlaw” nga “ang anak sa katawhan,” ang komung tawo, ang mangibabaw. Diha sa daghang kayutaan ang mga hari, mga kaiser, (emperador sa Alemanya), ug mga czar (emperador sa Rusya) gipulihan sa bag-o ug demokratikanhong mga magmamando. Ang sayop nga pagmando sa tawo sa yuta nahimong kalangkoban sa mabangis nga pagmando sa mga diktador ug sa matugoton demokratikanhong mga porma sa kagamhanan. Sama sa puthaw ug yutang kolonon, dili kini masagol. Bisan diha sa Tinipong Kanasoran wala silay paghiusa, hinunoa, nakigbahin sa mainit nga paglantugiay ug mga binaharay. Tinuod, ‘ang gingharian nakitang nagkabahinbahin.’—Daniel 2:41-43.

¹⁷ Busa, sa “ulahing bahin sa mga adlaw,” ang isyu sa pagmando sa kalibotan modangat sa iyang kataposan. Ug unsa ang sulbad? Tan-awa! Nagalihok na sukad sa 1914 mao ang Mesiyanikong Gingharian sa Diyos. Kini mao ang “bato” nga gisapsap gikan sa “bukid” sa unibersal nga pagkasoberano ni Jehova. Walay tawhanong politiko ang makabahin niana! Ania siya miabot, sa tinakdang panahon, uban sa bug-os nga pagkatukma. Sa tinudlong panahon sa Diyos, kini mohagsa sa tiil sa larawan ug modugmok sa tibuok higanteng larawan sa pagkapulbos. Sama sa tahop nga ipalid sa hangin, mapalid ang pagmando sa tawo, nga walay mahibiling lama. Apan ang “bato”—ang Gingharian sa dakong Diyos ug sa iyang Kristo—mahimong dakong bukid nga magapuno sa tibuok yuta. Ang gingharian ‘dili gayod malumpag ug dili gayod kini mabilin sa laing katawhan.’ Kini molungtad sa walay kataposan. Pagkadako sa atong pasalamat kang Jehova sa iyang abanteng ‘pagbutyag’ niini nga mga tinago!—Daniel 2:29, 44, 45.

Ang Modernong Adlawng “Pagtinuloray”

¹⁸ Apan, aduna pay dugang butang nga buot ipadayag ni Daniel bahin sa tawhanong kagamhanan ug sa “ulahing bahin sa mga adlaw.” Hapit 70 ka tuig tapos gipadayag ang damgo ni Nabucodonosor, ang tigulang nga Daniel diha gihapon sa Babilonya apan nag-alagad ilalom ni Siro, nga hari sa Persia. Samtang diha siya sa tampi sa suba nga Hiddekel, mipakita kaniya ang usa ka manulonda, nga nagaingon: “Karon ako mianhi sa pagpasabot kanimo sa manghitabo sa imong katawhan sa ulahing bahin sa mga adlaw, kay ang panan-awon alang pa sa daghang adlaw nga moabot.” (Daniel 10:14) Mipadayon ang manulonda sa pagbatbat sa dagkong mga detalye sa mga magmamando ug mga hitabo nga motungha sa kasaysayan sa Persia, Gresya, Ehipto, Roma, Alemanya, Anglo-Amerikano, ug sa sosyalistikong mga porma sa pagmando. Pagkatagsaon nga kining tanang kasaysayan, nga mikabat ug kapin sa 2,500 ka tuig, nasulat nga abante! Nakahatag kini kanato ug dakong pagsalig sa dinasig matagnaong Pulong ni Jehova nga Diyos!a

¹⁹ Nagsugilon kining tagnaa kanato nga, sa maglakat ang panahon, ang duha ka dagkong gahom motungha, “ang hari sa habagatan” ug “ang hari sa amihanan.” Sa kataposan, ang manulonda miingon, ang hari sa amihanan “magpadako sa iyang kaugalingon ibabaw sa tanang diyos; ug magasultig katingalahang mga butang batok sa Diyos sa mga diyos”—dili maayong mga butang, kay ‘siya magapasidungog sa diyos sa mga kuta.’ Batok sa mapahitas-ong “hari,” makig-parang “ang hari sa habagatan,” nga gamhanan usab sa militar. Sumala sa gitagna, kining duha ka hari “magtinuloray.” Ang modernong adlawng tago nga gubat tali sa dagkong mga gahom maayo kaayong pagkailustrar niini. May mga panahon nga kusog silang ‘magtinuloray’ samtang magdebatehay sila sa pagtupong sa nukleyar nga mga armamento, ug sa samang higayon ginapakusgan ang ilang bug-os nga pagpangandam sa gubat.—Daniel 11:36-45.

²⁰ Bisan pa nga gitagna nga “ang hari sa amihanan” mosulong samag baha sa daghang kayutaan, dili kana magtino sa sangpotanan. Ang butang nga magtino gipamulong sa Daniel 12:1: “Ug niadtong panahona si Miguel motindog, ang dakong prinsipe nga nagatindog alang sa mga anak sa imong katawhan.” Kining si Miguel mao si Jesu-Kristo, nga ‘nagatindog’ sa iyang Gingharian sa 1914, sa madali sa pagtambog kang Satanas gikan sa langit. Ug kining maong “Hari sa mga hari” ang molihok sa Armageddon sa pagpakanaog ug kalaglagan sa “mga hari sa yuta,” lakip niadtong hari sa “amihanan” ug sa “habagatan.”—Pinadayag 12:7-10; 19:11-19.

²¹ Didto, sa kataposan sa “ulahing bahin sa mga adlaw,” makita unya ang sangpotanan, sa kadaogan sa Gingharian sa Diyos. Dugang nga gibatbat kini sa manulonda niining mga pulonga: “Ug moabot ang usa ka kasamok nga ang ingon wala pa gayod mahitabo sukad nga may usa ka nasod hangtod nianang mao nga panahon.”—Daniel 12:1; itandi sa Jeremias 25:31-33; Marcos 13:19.

²² Kahadlokan ba nato kanang panahon sa kasakitan ug kasub-anan? Dili kon kita anaa sa kiliran ni Jehova, kay ang manulonda mipadayon sa pagsulti: “Niadtong panahona ang imong katawhan makalingkawas, ang tanan nga hingkaplagan nga nahisulat sa basahon.” (Daniel 12:1) Busa, hinaot nga kitang tanan, magkugi sa atong pagtuon sa Bibliya ug manlimbasog sa pag-alagad kang Jehova. Busa, sa “ulahing bahin sa mga adlaw,” hinaot nga makita ang atong mga ngalan nga masulat sa “basahon sa handomanan” sa Diyos nga “gisulat sa atubangan niya alang kanila nga may kahadlok kang Jehova ug nanagpalandong sa iyang ngalan.” (Malaquias 3:16) Sa pagbuhat sa ingon, makapribilehiyo kita sa pakigbahin sa iyang kadaogan “sa ulahing bahin sa mga adlaw.”

[Mga footnote]

May kalabotan sa “ulahing bahin sa mga adlaw”—

◻ Unsay gitagna ni Jeremias nga maoy dangatan sa pakigdait sa kalibotan?

◻ Ang pag-atake ni Gog moresulta sa paghusay sa unsang isyu, ug sa unsang paagi?

◻ Nagatudlo sa unsang dakong kataposan ang damgo ni Nabucodonosor?

◻ Sa unsang paagi matapos ang pag-ilogay sa gahom tali sa duha ka “hari”?

[Mga Pangutana nga Pagatun-an]

1. (a) Sa unsang paagi ang mga tagna ni Jeremias, Ezekiel, ug Daniel hinungdanon kanato karon? (b) Nganong gipreserbar kadtong dinasig nga mga sinulat?

2. Nganong nagkinahanglan si Jeremias ug kalig-on gikan kang Jehova?

3. Unsang bakak nga mga pulong ang gipahayag sa mga manalagna?

4. Unsang paglaom ang gisaligan sa kadaghanan sa Kakristiyanohan?

5. Unsay gitagna ni Jehova, ug sa unsang paagi matuman kini sa “ulahing bahin sa mga adlaw”?

6. Unsang malipayong resulta ang modangat alang sa daghan?

7. Ilalom sa unsang mga sirkumstansiya nga nanagna si Ezekiel?

8, 9. (a) Unsang dakong isyu ang kinahanglang husayon, ug kanus-a? (b) Kinsa si Gog, kinsa ang misunod kaniya, ug unsay iyang plano? (c) Unsay buhaton ni Jehova kang Gog?

10. (a) Lahi sa kanasoran, diin gibutang sa mga Saksi ni Jehova ang ilang pagsalig? (b) Nganong si Gog ug ang iyang panon nangasuko? (c) Unsay atong kinahanglang buhaton aron maluwas?

11. Sa unsang paagi ‘dad-on [ni Jehova] si Gog batok sa Iyang yuta,’ ug alang sa unsang katuyoan?

12. Sumala sa Ezekiel 38:18-23, unsay dangatan sa pag-atake ni Gog?

13. Sa unsang paagi nahimong maayong panig-ingnan si Daniel sa batan-ong mga Saksi?

14. Unsang mga butanga nga gipasidunggan ni Daniel ang Diyos?

15, 16. Unsay kahulogan sa damgo ni Nabucodonosor?

17. Sa unsang paagi natuman ang tagna sa “ulahing bahin sa mga adlaw”?

18. (a) Unsang panan-awon ang gihatag kang Daniel sa ulahi? (b) Unsa ang tagsaong butang niini nga panan-awon?

19. Unsang modernong mga hitabo ang gipahayag sa tagna?

20. Unsay motino sa sangpotanan, ug sa unsang paagi nalangkit niini si Miguel?

21. Nan, unsay dangatan sa “ulahing bahin sa mga adlaw”?

22. Ingong katawhan sa Diyos, unsay atong reaksiyon niining mga tagnaa ug uban sa unsa nga palabuton?

[Letrato sa panid 27]

Gipadayag ni Daniel ang dangatan sa “kaulahiang bahin sa mga adlaw”