Ang Tinuod nga mga Kristohanon mga Magwawali sa Gingharian

“Kining maayong balita sa gingharian igawali sa tanang pinuy-anang yuta sa pagpamatuod sa tanang kanasoran; ug unya moabot ang kataposan.”—MATEO 24:14.

NAGAPAHAYAG SA GINGHARIAN NI JEHOVA. Sa daghang katuigan, mao kana ang pangunang tumong niining basahona. Kini maoy bahin sa ngalan sa magasin. Ug hinungdanon nga ang balita sa Gingharian iwali karon sa tibuok kalibotan. Ngano? Tungod sa gipamulong ni Jesu-Kristo human sa pagkutlo sa ubang mga bahin nga naglangkob sa “ilhanan” sa iyang dili-makitang “presensiya” ug sa kataposan niini nga sistema. Si Jesus miingon: “Kining Maayong Balita sa gingharian kinahanglang igawali sa tibuok kalibotan sa pagpamatuod sa tanang kanasoran. Ug unya moabot ang kataposan.”—Mateo 24:3, 14, The Jerusalem Bible.

² Karon, “ang kataposan” haduol na. Busa, maayong mangutana ang tanang dedikadong saksi ni Jehova: Unsay akong pagbati bahin sa buluhaton sa pagsangyaw sa Gungharian? Regular ba akong nakigbahin niini? Ug gihimo ko ba ang akong ministeryo uban ang katakos ug kadasig?

Ang Sugo sa Pagwali

³ Walay tinuod nga Kristohanon ang makasalikway sa pribilehiyo sa buluhaton sa pagmantala sa “maayong balita” ngadto sa uban. Gisultihan ni Jesus ang iyang mga tinun-an: “Kamo mao ang kahayag sa kalibotan. Ang siyudad nga mahimutang sa ibabaw sa bungtod dili gayod mahisalipdan. Ang mga tawo dili usab magdagkot ug suga aron ibutang kini sa ilalom sa gantangan, kondili sa ibabaw sa lamparahan, ug kini magaiwag kanilang tanan nga anaa sa sulod sa balay. Busa pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit.” (Mateo 5:14-16) Kana nagpaila nga ang mga tinun-an ni Jesus kinahanglang mga magwawali sa Gingharian.

⁴ Mahitungod sa pangunang magwawali sa Gingharian, kini ang gikaingon: “Samtang ang atong Ginoo nagwali sa gingharian Siya mipadayon . . . sa pag-andam ug sa pag-organisar sa Ministeryo niini . . . Iyang gisugdan ang matagnaong ministeryo . . . ug gihimo ang Napulog-duha ug ang Kapitoan nga mga mag-aambit niini. Samtang Iyang giwali ang umaabot nga gingharian ug naghimog ‘mga ilhanan,’ Iyang gipatawag sila atubangan sa Iyang nawong nga adunay managsamang balita ug managsamang mga gahom. Pinaagi sa katingalahang kurso sa masangkarong pagpanudlo, . . . Iyang gibansay sila alang sa mas hataas nga posisyon nga ihatag sa kaulahian.”—A Church History, ni Milo Mahan.

⁵ Mihatag si Jesus ug maayong instruksiyon alang sa iyang mga apostoles ug sa 70 ka tinun-an nga iyang gipadala. (Lucas 6:12-16; 10:1-22) Dugang pa, ang atong Sulondan mismo “miadto sa kasiyudaran ug kabalangayan, nga nagwali ug nagpahayag sa maayong balita sa gingharian sa Diyos.” Uban kaniya mao ang mga apostoles ug pila ka babaye “nga nag-alagad kanila pinaagi sa ilang mga katigayonan.” (Lucas 8:1-3) Oo, si Jesus maoy usa ka madasigong magwawali sa maayong balita ug mihimog mga lakang aron masugdan ang organisasyon sa pagwali sa Gingharian.

⁶ Human sa tulo ug tunga ka tuig nga ministeryo, gitapos ni Jesus ang iyang yutan-ong kurso. Apan sa wala pa siya mokayab sa langit, siya mihatag sa iyang mga sumusunod niini nga sugo: “Panglakaw kamo . . . ug paghimog mga tinun-an sa katawhan sa tanang kanasoran, sa pagbawtismo kanila sa ngalan sa Amahan ug sa Anak ug sa balaang espiritu, sa pagtudlo kanila sa pagtuman sa tanang mga butang nga akong gisugo kaninyo. Ug, tan-awa! ako magauban kaninyo sa tanang adlaw hangtod sa konklusyon sa sistema sa mga butang.” (Mateo 28:19, 20) Sa pagkatinuod, sila nahimong mga magwawali sa Gingharian.

⁷ Sa hapit nang mobiya si Jesus sa yuta, nangutana ang iyang mga tinun-an: “Ginoo, imo bang ipasig-uli ang gingharian sa Israel niining panahona?” Sa pagtubag, iyang gisultihan sila: “Dili alang kaninyo ang pagkasayod sa mga panahon o mga kahigayonan nga gitudlo sa Amahan pinaagi sa iyang kaugalingong kagahom.” Bisan ug kulang niadto ug tukmang kahibalo ang mga tinun-an bahin sa Gingharian, makatudlo si Jesus kanila nga mahimong mga magmamantala niini, kay madawat nila ang gikinahanglang tabang aron matuman ang ilang sugo. “Apan kamo makadawat ug gahom sa diha nga kakunsaran na kamo sa balaang espiritu,” si Jesus midugang, “ug kamo unya mahimong akong mga saksi sa Jerusalem ug sa tibuok Judea ug Samaria ug hangtod sa kinatumyang bahin sa yuta.” (Buhat 1:6-8) Ilalom sa pagtultol sa balaang espiritu, mahibaloan ra sa ulahi sa mga sumusunod ni Jesus nga ang Gingharian maoy usa ka langitnong kagamhanan. (Juan 16:12, 13) Ug sa ulahi ang mga kamatuoran bahin niana nga Gingharian igawali “hangtod sa kinatumyang bahin sa yuta.”

⁸ Maayo kaayong pagkahimo niadtong mga saksiha ang ilang buluhaton. Siempre, si Jehova nag-uban kanila, ug ilang nabatonan ang pagpaluyo sa gihimayang Jesu-Kristo. (Buhat 8:1-8; 11:19-21) Dili ikatingala nga sayo pa sa 60 ngadto sa 61 K.P. nakaingon si apostol Pablo nga ang “maayong balita” ‘nawali na sa tanang kalalangan ilalom sa langit’!—Colosas 1:23.

⁹ Mahitungod sa buluhaton sa pagsangyaw, kini ang gikasulat: “Ang pagmantala sa ebanghelyo . . . dili kay usa lamang ka kalihokan nga gihimo sa kadaghanan sa Iglesya sa B[ag-ong] T[ugon], kondili kini ang iyang panguna, iyang hinungdanong kalihokan. . . . Matikdi usab, si Jesus wala moingon [sa Buhat 1:8], nga Kamo magasaksi kanako, o, Kamo magapanaksi kanako, kondili, Kamo mahimong akong mga saksi. Ang paggamit sa berbong ‘mahimo’ dinhi adunay kahulogan nga kinahanglang tagdon uban sa bug-os ug literal nga kaugdang. Ang ekspresyon [sa Grego] wala lamang mag-ingon kon unsay himoon sa Iglesya, apan kon mahimong unsa ang Iglesya. . . . Ang Iglesya ni Jesu-Kristo maoy . . . usa ka nagapanaksi nga lawas.” (Pentecost and the Missionary Witness of the Church, ni Harry R. Boer, panid 110-14) Oo, ang pagsangyaw mao ang pangunang buluhaton sa tinuod nga Kristohanong kongregasyon.

Pinaagi sa Kabubut-on sa Diyos

¹⁰ Ang unang-siglong mga magmamantala sa Gingharian nakadawat ug pagtultol gikan sa nagamandong lawas. Ang nagapanawng mga ansiano nag-alagad sulod sa organisasyon, ug ang kongregasyonal nga kaakohan gipangabaga sa mga magtatan-aw ug ministeryal nga mga alagad. (Buhat 15:1, 22-36; Filipos 1:1) Apan komusta kon adunay bag-ong motunghang mga hitabo?

¹¹ Buweno, tagda kon unsay nahitabo human gilayon sa Pentekostes 33 K.P. Misugod sa pagbagolbol ang Gregog-pinulongang mga Hudiyo batok sa Hebreohanog-pinulongang mga Hudiyo “tungod kay ang ilang mga babayeng balo nasayloan sa adlaw-adlawng pag-apod-apod sa pagkaon.” Aron masulbad ang suliran, ang mga apostoles nagtudlo ug “pito ka kasaligang mga lalaki” sa pag-atiman sa pag-apod-apod sa pagkaon. (Buhat 6:1-8) Mahitungod niini atong mabasa: “Sa sinugdan, ang pag-atiman sa adlaw-adlaw nga pag-apod-apod sa pagkaon walay gipalabi, sumala sa gisugilon kanamo, nga alang niini gitudlo ang ‘pito,’ apan, ang ubang mga kaakohan idugang kon may panginahanglan, samtang ang mga prinsipyo sa bag-ong pagtuo dili-mausab, ang mga paagi sa pagdumala kinahanglang matukod ug mapakaylap sa epektibong paagi, nga gisalig sa kaalam ug praktikal nga kasinatian sa sunod nga mga kaliwatan . . . Ang pagpahiangay ug pagbag-o sa dili-hinungdanong mga butang . . . hinungdanon sa tanang dagkong organisasyon.”—Hours With the Bible, New Testament Series, tomo II, ni Cunningham Geikie.

¹² Ang mainampoong pagsalig sa Diyos, lakip sa “kaalam ug praktikal nga kasinatian” sa nagamandong lawas, nakaamot sa kauswagan sa unang Kristiyanidad. Ug tinuod dihay mga butang nga nahitabo tungod sa kabubut-on sa Diyos. Pananglitan, ang unang mga sumusunod ni Jesus gikaingon nga sakop sa “Ang Dalan.” (Buhat 9:1, 2) Apan tingali ingon ka sayo sa 44 K.P. sa Antioquia, Siria, nga “ang mga tinun-an pinaagi sa kabubut-on sa Diyos gitawag nga mga Kristohanon.” (Buhat 11:26) Kini maoy hinatag sa Diyos nga ngalan nga ila dayong gidawat.—1 Pedro 4:16.a

¹³ Taliwala niadtong unang mga Kristohanon, dihay mga hitabo nga mitungha tungod sa kabubut-on sa Diyos. Pananglitan, samtang gigamit karon sa mga Saksi ni Jehova ang modernong mga paagi sa pagprinta, gisugdan sa unang mga Kristohanon ang paggamit sa codex—usa ka dakong tabang sa ilang madasigong buluhaton sa pagwali sa Gingharian. Niining bahina, si C. C. McCown misulat: “Ang relihiyosong mga basahon sa Kristohanon, ang Daang Tugon ug ang bag-ong mga sinulat . . . dili alang sa kalingawan nga basahon sa mga adunahan. Nagtinguha ang kugihang mga negosyante nga makakat-on ug daghan gikan sa usa ka libro. Sila ug ang matinuorong Kristohanong mga misyonero nagtinguha nga makatudlo niini o niana nga pamatuod nga teksto sa madali, nga dili na kinahanglang hikyaron pa ang hataas nga rolyo sa papyrus.”—The Biblical Archaeologist Reader, panid 261.

¹⁴ Ang “pagkahimo nga makatudlo dayon niini o niana nga pamatuod nga teksto” importante kaayo tungod sa mga paagi nga gigamit sa unang mga Kristohanon sa pagsangyaw sa Gingharian. Hinuon, may mga panahon, ilang sangyawan ang mga tawo sa dili pormal nga paagi, sama sa kasagarang ginahimo sa mga Saksi ni Jehova karon. Mahitungod niini kini ang gikaingon: “Ang usa sa tagsaong bahin sa pagsangyaw sa mga apostoles mao ang dili pormal nga paagi. Dili na maghulat pa ang apostol ug dakong higayon. Ang iya lamang pormal nga higayon mao, sama kang Pablo atubangan ni Felix, gidala siya ingong binilanggo atubangan sa magmamando sa nagsul-ob ug purpura sa pagpatin-aw bahin sa iyang kaugalingon ug sa pagtubag sa sumbong sa paglapas sa mga balaod. Siya adunay daghang higayon, siya may higayon sa bilanggoan, sa daplin sa dalan, ug sa timawang mga panimalay diin siya matulog sa kagabhion. . . . Iyang gibati nga ang iyang balita maoy alang sa mga tawo, nga andam sa pagpadayag niini ngadto sa kadaghanan. Relaks siya bisan kinsa pa ang iyang mga mamiminaw. Wala siya makalimot sa panig-ingnan ni Kristo, . . . [kansang] entablado mao ang abugong dalan ug sa naghuot nga karsada, o sa batoong kabaybayonan sa Hudiyohanong Galilea . . . [Ang mga apostoles] wala makalimot nga sa una pa nilang pakig-uban kaniya iyang gihatagan sila ug linaing mga instruksiyon bahin sa labing maayong mga paagi sa pagsangyaw sa iyang mga doktrina, ug napalig-on kining unang mga leksiyon pinaagi sa uban, ug, sa wala pa siya mokayab sa langit, nagtudlo kanila sa kalibotan ingong ilang natad ug ang tanang kalalangan ingong ilang tigpatalinghog.”—History of the Christian Church, ni John F. Hurst, tomo I, panid 96.

“Sa Balay ug Balay”

¹⁵ Sa mga adlaw pagkatapos sa Pentekostes sa 33 K.P., andam na ang mga tinun-an ni Jesus sa paggamit sa labing maayong paagi sa pagwali sa “maayong balita.” Tapos nga gipasipalahan ang gilutos nga mga apostoles tungod sa ngalan ni Jesu-Kristo, unsay ilang gibuhat? Buweno, “sa tanang adlaw sa templo ug gikan sa balay ug balay sila wala mag-undang sa pagpanudlo ug sa pagwali sa maayong balita bahin kang Kristo, Jesus”! (Buhat 5:41, 42) Oo, nagsangyaw ang mga apostoles gikan sa balay ug balay.

¹⁶ Sa ulahi, gipahinumdoman ni apostol Pablo ang tinudlong mga ansiano gikan sa Efeso: “Wala ako maglilong sa pagsulti kaninyo sa bisan unsang butang nga makaayo nga nagapanudlo kaninyo sa atubangan sa katilingban ug gikan sa balay ug balay. Apan bug-os akong nagpanghimatuod sa atubangan sa mga Hudiyo ug sa mga Gresyanhon mahitungod sa paghinulsol ngadto sa Diyos ug sa pagtuo sa atong Ginoong Jesus.” (Buhat 20:20, 21) Wala magpasabot si Pablo nga siya nagapanudlo ug tinudlong mga ansiano sa ilang mga balay. Hinunoa, siya nagsangyaw sa dili-magtutuong mga Hudiyo ug mga Gresyanhon mahitungod sa paghinulsol ngadto kang Jehova nga Diyos ug sa pagtuo kang Jesu-Kristo. Sa walay duhaduha, gitudloan usab ni Pablo kadtong maong mga ansiano kon unsaon sa pagsangyaw gikan sa balay ug balay.

¹⁷ Mahitungod sa ministeryo sa apostol sa Efeso, kini ang gikaingon: “Ang naandang batasan ni Pablo mao ang pagsugod sa iyang trabaho gikan sa pagsubang sa adlaw hangtod sa alas 11 s.b. (Buhat 20:34-35) nga niining orasa nakatapos na si Tirano sa iyang pagpanudlo; dayon gikan sa alas 11 s.b. ngadto sa alas 4 s.h. sa pagsangyaw diha sa tigomanan, maghimog mga komperensiya uban sa mga katabang ug personal nga makigsulti sa mga kandidato, naghimog plano sa pagpakaylap ngadto sa sulod; dayon sa kataposan sa pagsangyaw sa kabalayan nga milungtad gikan sa alas 4 s.h. hangtod sa halawon nga kagabhion (Buhat 20:20-21, 31).” (A. E. Bailey) Ang ubang mga eskolar miingon: “Dili siya kontento sa paghatag lamang ug mga pakigpulong sa katigoman sa publiko, ug sa paggamit sa ubang mga paagi, apan madasigong nagpadayon sa iyang buluhaton sa pribado, sa kabalayan, ug sa literal nagdala pauli sa kamatuoran sa langit ngadto sa kabalayan ug sa mga kasingkasing sa mga taga Efeso.” (A. A. Livermore) “Sa katilingban ug sa balay ug balay, sa siyudad ug sa tibuok lalawigan, siya nakawali sa ebanghelyo.” (E. M. Blaiklock) “Maayong mamatikdan usab nga kining labing dako sa magwawali nagwali gikan sa balay ug balay ug wala maghimo sa iyang mga pagduaw nga sosyal nga mga pagduaw lamang.”—A. T. Robertson.

¹⁸ Ang balay ug balay nga pagsangyaw gihimo sa mga apostoles ni Kristo sa 33 K.P. Kadto maoy bahin sa ministeryo ni Pablo sa Efeso ug sa walay duhaduha sa ubang dapit. Busa adunay lig-on Kasulatanhon nga basehanan sa balay ug balay nga ministeryo sa mga Saksi ni Jehova. Ug tinuod usab kini sa ubang mga paagi nga ilang gigamit sa pagpakaylap sa balita sa Gingharian. Makaikag, ang McClintock and Strong’s Cyclopedia nag-ingon: “Ang atong Ginoo ug ang iyang mga apostoles nakakitag mga dapit sa pagsangyaw bisan asa nga adunay makitang mga tawo nga nagkatigom. Ang kabakiliran, ang kabaybayonan sa kadagatan, ug sa kasubaan, ang publikong mga karsada, pribadong mga balay, ang balkonahi sa Templo, ang Hudiyohanong sinagoga, ug nakita ang nagkalainlaing pang ubang mga dapit sa pagwali sa Ebanghelyo.” (Tomo VIII, panid 483) Sama kang Jesus ug sa iyang unang mga tinun-an, ang mga Saksi ni Jehova nagawali sa balita sa Gingharian sa “publikong karsada, sa pribadong mga balay, . . . ug sa nagkalainlaing pang mga dapit.” Pananglitan, makigbahin sila sa buluhaton sa pagtanyag ug magasin sa kadalanan (uban niini nga basahon ug sa kauban niini nga Ang Bantayanang Torre) ug ilabinang ilado sa ilang pagsangyaw sa kabalayan.

¹⁹ Ang pangunang mga porma sa ministeryo karon nga gigamit sa mga Saksi ni Jehova maayong pagkatukod sa unang siglo, ug, gawas pa niini, tukma alang sa presenteng adlawng Nagamandong Lawas sa dinihogang mga Kristohanon sa pagdesider kon unsang paagi sa pagsangyaw ang angay karong panahona. Ang maong mga desisyon sa lakbit gipasukad sa “kaalam ug praktikal nga kasinatian” niining mga tawhana. Apan, ilabina, sila nagahimog mga desisyon sama sa gihimo sa unang siglong Kristohanong nagamandong lawas. Ang pagtultol ug paggiya sa Diyos sa iyang balaang espiritu ginapangayo diha sa pag-ampo, ug ang Kasulatanhon nga mga panig-ingnan ginasunod sa pagtino kon unsang matanga sa pagsangyaw ang labing takos niining “kataposang mga adlaw.”—2 Timoteo 3:1; Buhat 15:23, 28.

²⁰ Matin-aw nga ang mga paagi sa pagsangyaw nga gigamit sa mga Saksi ni Jehova maoy kabubut-on sa Diyos, kay gipurongpurongan sa Diyos kining mga panlimbasog sa dagayang kalamposan ug panalangin. (Proverbio 10:22) Ang mga panon sa katawhan ang nagadawat sa tinuod nga pagsimba ug nakig-uban sa nanghibilin sa dinihogang mga sumusunod ni Jesus ingong bahin sa bugtong organisasyon nga nagapasidungog sa balaang ngalan ni Jehova ug maisogong nagawali sa maayong balita sa natukod langitnong Gingharian. Hinaot nga ang tanang alagad ni Jehova magkugi sa buluhaton sa paghimog mga tinun-an samtang nagakahiduol na ang kataposan niini nga sistema. Kinahanglang buhaton nato kini sa matinumanon, kay ang tinuod nga mga Kristohanon sa walay duhaduha maoy mga magwawali sa Gingharian.

[Mga footnote]

Unsay Imong Pagsabot?

◻ Nganong kinahanglang iwali karon ang balita sa Gingharian sa tibuok yuta?

◻ Unsa ang pangunang buluhaton sa tanang tinuod nga mga Kristohanon?

◻ Nganong ikaingon nga taliwala sa mga alagad sa Diyos may mga butang nga mahitabo sumala sa kabubut-on sa Diyos?

◻ Unsa ang makataronganong basehanan sa balay ug balay nga buluhatong pagsangyaw sa mga Saksi ni Jehova?

[Mga Pangutana nga Pagatun-an]

1, 2. (a) Nganong kinahanglang iwali karon sa tibuok yuta ang balita sa Gingharian? (b) Unsang mga pangutana ang angay ibangon sa matag Saksi ni Jehova?

3. Unsay gipadayag sa mga pulong ni Jesus nga natala sa Mateo 5:14-16 bahin sa iyang mga sumusunod?

4. Unsay gikaingon bahin sa pangunang magwawali sa Gingharian?

5. Kon mahitungod sa pagwali sa Gingharian, unsay gihimo ni Jesus?

6. Sa wala pa mokayab sa langit, unsang sugo ang gihatag ni Jesus sa iyang mga sumusunod?

7. Bisag kulang ang mga tinun-an ni Jesus sa tukmang kahibalo bahin sa Gingharian, nganong molampos sila sa pagkahimong iyang mga saksi?

8. Unsa ka malamposon ang unang siglong buluhatong pagsangyaw?

9. Sumala sa gipahayag dinhi, unsa ang pangunang buluhaton sa Kristohanong kongregasyon?

10, 11. (a) Sa sinugdan, sa unsang paagi giorganisar ang unang siglong mga magmamantala sa Gingharian? (b) Unsay himoon kon may motunghang dagkong mga hitabo?

12. (a) Unsay nakaamot sa kauswagan sa unang Kristiyanidad? (b) Diin ug kanus-a sugdi nga gitawag ang mga sumusunod ni Jesus nga mga Kristohanon?

13. Samtang ginahimo sa mga Saksi ni Jehova karon ang modernong mga paagi sa pagprinta, unsay gigamit sa unang mga Kristohanon sa ilang buluhaton sa pagsangyaw sa Gingharian?

14. Ilalom sa unsang mga sirkumstansiya nga maikagon ang mga apostoles ni Jesus sa pagsangyaw?

15. Sa unsang paagi gituman sa mga apostoles ang buluhatong pagsangyaw sa mga adlaw pagkatapos sa Pentekostes 33 K.P.?

16. Unsang matang sa buluhatong pagsangyaw nga gibansay ni Pablo ang mga ansiano sa Efeso?

17. Unsa ang nagkalainlaing mga gipamulong sa mga eskolar mahitungod sa balay ug balay nga ministeryo ni Pablo sa Efeso?

18. (a) Nganong ikaingon nga adunay lig-ong Kasulatanhong basehanan ang balay ug balay nga ministeryo sa mga Saksi ni Jehova? (b) Sama kang Jesus ug sa iyang unang mga tinun-an, diin ug sa unsang paagi ginasangyaw sa mga Saksi ni Jehova ang balita sa Gingharian?

19. Sa unsang paagi ginahimo ang mga desisyon bahin sa mga paagi sa pagsangyaw nga gigamit karon sa mga Saksi ni Jehova?

20. (a) Nganong makaseguro kita nga giuyonan sa Diyos ang mga paagi sa pagsangyaw nga gigamit sa mga Saksi ni Jehova? (b) Unsang tukmang tinamdan ang huptan sa tanang mga alagad ni Jehova diha sa buluhaton sa pagsangyaw sa Gingharian.