Imantala sa Bisan Diin ang Gingharian sa Diyos
“Pasagdi ang mga patay nga magalubong sa ilang mga minatay, apan lumakaw ka ug imantala sa bisan diin ang gingharian sa Diyos.”—LUCAS 9:60.
1. Unsang hinungdanong mga pangutana ang gipatungha sa pamulong ni Jesus sa Lucas 9:60?
Ang Gingharian sa Diyos—kana ang labing bililhong butang gikaikagan sa kinabuhi ni Jesus! Mao usab karong adlawa alang kanatong tanan nga matuod niyang mga sumusunod. Ingong mga Kristohanon, kita nagapaningkamot sa pagsunod sa mga lakang ni Jesus pinaagi sa pagkinabuhi sumala sa Bibliya. (1 Pedro 2:21) Apan karon, samtang ania na kita sa tuig 1986, mahimo kahang kinahanglang susihon nato pag-usab ang mga butang pinalabi sa atong kinabuhi? Pananglitan, unsaon nimo pagpatin-aw ang sulti ni Jesus ngadto sa usa ka tawo nga “pasagding ang mga patay magalubong sa ilang mga minatay”? Sa imong hunahuna nganong gipasiugda niadto ni Jesus ang kabililhon sa pagmantala sa mensahe sa Gingharian, nga katugbang sa mga butang mopatim-awng angay kabalak-an sa pamilya? Unsay imong ikasulti?
2. Kanus-a nagsugod ang pagkamagmamando ni Jehova, ug unsa kini ka malungtaron?
2 Dugay na una gamita ni Jesus ang pamulong “ang gingharian sa Diyos,” misulat ang salmistang si David ubos sa balaang pagdasig: “Gitukod ni Jehova nga malig-on ang iyang trono sa kalangitan mismo; ug ang iyang gingharian nagagahom ibabaw sa tanan.” (Salmo 103:19) Ang pagkasoberano o pagkamagmamando ni Jehova nagsugod sa iyang gisugdan ang iyang paglalang. Ang patukoranan sa iyang trono dili gayod matarog. Ang iyang katungod sa iyang unibersohanong pagkamagmamando dili gayod mailog gikan kaniya. Dili katingalahang mitambag ang usa ka salmista: “Ipahayag ang iyang himaya sa taliwala sa kanasoran, . . . kay si Jehova dako ug takos pagadayegon”!—Salmo 96:3, 4; 109:21; Daniel 4:34, 35.
3. (a) Unsang mga hitabo ang mitultol sa usa ka hagit sa pagkamagmamando ni Jehova? (b) Unsay katuyoan sa Diyos aron husayon ang isyu sa unibersohanong pagkamagmamando?
3 Ugaling, dili tanan ang nagpadayon sa pagdayeg kang Jehova. Si Satanas, ang unang apostata, mihagit sa paagi sa pagpadayag ug paggamit ni Jehova sa Iyang pagkamagmamando ngadto sa Iyang mga linalang sa yuta. (Genesis 3:1-5; Job 1:6-12; 2:1-5) Ingong sangpotanan, sa yuta ug sa kaulahian sa langit, ang pila ka linalang natakdan sa rebelyosong tinamdan ni Satanas. Si Satanas nag-impluwensiya usab sa mga tawo sa pagtukod sa sunodsunod tawhanong mga gingharian. Gigamit niya kini sa paghagit sa pagkamatarong sa pagkamagmamando sa Diyos. (Pinadayag 13:1-6) Sa paghusay niining isyu sa unibersohanong pagkasoberano, si Jehova miplano sa usa ka butang talagsaon, sumala sa gitagna sa Daniel 2:44: “Sa mga adlaw niadtong mga haria ang Diyos sa langit magatukod sa usa ka gingharian nga dili gayod malumpag. . . . Kini magadugmok ug magalaglag niining tanang gingharian, ug kini mobarog sa mga panahong walay katinoan.”
Si Jehova Nahimong Hari Ibabaw sa Israel
4. Sa unsang kahulogan nga si David nakaingon nga “Si Jehova nahimo nang hari,” ug ang maong hitabo nagkinahanglan sa unsa?
4 Busa karon matin-aw nga, bisan tuod ang pagkamagmamando ni Jehova nagsugod sukad sa pagsugod niya sa pagpanglalang, maoy iyang katuyoan ang paghimog usa ka tinong pagpahayag sa iyang pagkamagmamando aron husayon sa walay kataposan ang isyu sa pagkamatarong sa iyang pagkamagmamando. Ang maong pagpahayag mao ang langitnong Mesiyanikong Gingharian. Ang yutan-ong gingharian nga gitukod ni Jehova ibabaw sa nasod sa Israel nagsilbing usa ka gamay nga hawas niining Ginghariana “nga dili gayod malaglag.” Busa, sa gidala ni Haring David ang arka sa tugon ngadto sa siyudad sa Jerusalem, siya nakaawit nga malipayon: “Magkalipay unta ang mga langit, ug magkalipay unta ang yuta, ug pasultiha sila taliwala sa mga langit, ‘Si Jehova mismo nahimong hari!’” (1 Cronicas 16:31) Oo, sa usa ka espesyal nga diwa si Jehova “nahimong hari” alang sa tibuok Israel. Kadto usa ka panahon sa dakong kalipay, ug buot ni David nga ipahayag sa bisan diin kadtong kahibulongang hitabo!
5, 6. (a) Sa unsang bahin si David talagsaon taliwala sa mga hari? (b) Kinsa ang gilandongan ni David, ug sa unsang bahin?
5 Ang pagkamagbalantay ni Haring David sa nangagi nagpahiluna sa pasikaranan sa pagkahimong linaing hari taliwala sa mga hari. Siya maoy usa ka magbalantay-hari. Gibatbat sa salmista ang pagpili sa Diyos kang David alang sa maong katungdanan, sa pag-ingon: “[Si Jehova] nagpili kang David nga iyang alagad ug nagkuha kaniya gikan sa mga toril sa mga karnero . . . aron mahimong magbalantay ibabaw kang Jacob nga iyang katawhan ug ibabaw sa Israel nga iyang panulondon. Ug siya mao ang ilang magbalantay sumala sa pagkamatarong sa iyang kasingkasing, ug misugod siya sa pagpanguna kanila pinaagi sa kabatid sa iyang mga kamot.”—Salmo 78:70-72.
6 Ang pag-atiman ni David ingong magbalantay sa iyang katawhan, ang pagkamatarong sa iyang kasingkasing ngadto sa iyang Diyos, ug ang iyang kabatid ingong pangulo naghimo kaniyang takos kaayo sa paghulagway sa umaabot nga Mesiyas, kinsa gigamit sa linaing paagi sa pagpahayag sa unibersohanong pagkahari ni Jehova ug sa pag-alagad nga mahigugmaong Magbalantay-Hari. Ang maong kahibulongang kaugmaran sa mga katuyoan ni Jehova sa ulahi gitagna ni propetang Ezekiel: “Akong bangonon sa ibabaw sa [Israel] ang usa ka magbalantay, ug siya magapasibsib kanila, bisan ang akong alagad si David. . . . Ug ako mismo, si Jehova, mahimong ilang Diyos, ug ang akong alagad si David mahimong prinsipe sa ilang taliwala. Ako mismo, si Jehova, ang namulong.”—Ezekiel 34:22-24.
Mipatim-aw ang Gitagnang Magbalantay-Hari
7, 8. (a) Sa unsang paagi gipaila ang gitagnang Magbalantay-Hari, ug takos sa unsa ang iyang pagtungha? (b) Alang sa unsang katuyoan nga si Jesus “giuyonan” ni Jehova?
7 Ang Usang gitagna ni Jehova mao ang kaugalingon niyang Anak, si Jesus. Mahitungod kaniya, ang manulondang si Gabriel misulti sa ulay nga si Maria: “Tan-awa! ikaw manamkon sa imong tagoangkan ug igaanak mo ang usa ka anak lalaki, ug siya paganganlan nga Jesus. Kini siya mahimong bantogan ug pagatawgon nga Anak sa Labing Hataas; ug igahatag kaniya ni Jehova nga Diyos ang trono ni David nga iyang amahan, ug iyang pagaharian ang balay ni Jacob hangtod sa kahangtoran, ug walay pagkatapos ang iyang gingharian.” (Lucas 1:31-33) Kahibulongan gayod unya kini nga pagpahayag sa pagkahari ni Jehova! Tinuod, ang maong umaabot nga hitabo magkinahanglan sa kinadak-ang tibuok-kalibotang pagmantala: “Si Jehova mismo nahimong hari!”
8 Tapos sa milagrosong pagkatawo ni Jesus ug sa iyang pagtubo hangtod sa pagkahamtong nga lalaki, gipresentar niya ang iyang kaugalingon alang sa bawtismo sa katubigan sa subang Jordan. Niadtong panahona giila sa Diyos nga si Jesus iyang Anak pinaagi sa pagbubo sa espiritu diha kaniya ug miingon: “Ikaw mao ang akong Anak, ang pinalangga; ikaw akong giuyonan.” (Lucas 3:22) Alang sa unsa nga si Jesus “giuyonan”? Ang talaan sa Lucas nagasaysay: “Si Jesus mismo, sa iyang gisugdan ang iyang buluhaton, maoy mga katloan ka tuig sa panuigon.” (Lucas 3:23; Ref. Bi. nga potnot: “O, ‘misugod sa pagpanudlo].’”) Ang Revised Standard Version ug ang New International Version nagaingon, “Sa gisugdan niya ang iyang ministeryo.” Unsa ba ang “buluhaton,” o “ministeryo” ni Jesus? Unsa ba ang iyang “gitudlo”? Ang magsusulat si Mateo naghatag sa tubag: “Gisuroy ni [Jesus] ang tibuok Galilea, nga nagtudlo diha sa ilang mga sinagoga ug nagwali sa maayong balita sa gingharian ug nag-ayo sa tanang matang sa balatian ug sa tanang matang sa kaluyahon sa katawhan.”—Mateo 4:23.
9. Sa unsang mga bahin si Jesus nahisama sa iyang katigulangang si David?
9 Gihalad ni Jesus ang iyang kinabuhi sa ‘pagmantala sa bisan diin sa gingharian sa Diyos.’ Sama sa iyang katigulangang si David, iyang gipasundayag ang pagkamatarong sa iyang kasingkasing pinaagi sa dili pagkompromiso sa iyang pagkamaunongon ngadto sa Gingharian ni Jehova. (Lucas 9:60; 4:3-13; Juan 16:33) Gipamatud-an ni Jesus nga siya mao ang “usa ka magbalantay” nga gisaad ni Jehova nga patindogon. Siya nalipay sa pagpakaon sa espirituwal nga paagi niadtong si kinsa “gipanitan ug nahitibulaag sama sa mga karnero nga walay magbalantay” sa relihiyosong mga pangulo. (Mateo 9:36) Mahitungod sa iyang mahanasong pagbantay sa katawhan ug sa unsang paagi inanay kining mouswag sa umaabot nga katuigan si Jesus miingon: “Ako ang maayong magbalantay, ug ako nakaila sa akong mga karnero ug ang akong mga karnero nakaila kanako . . . Ug ako adunay ubang mga karnero, nga wala mining torila; sila usab akong pagadad-on, ug sila magapatalinghog sa akong tingog, ug sila mahimong usa ka panon, usa ka magbalantay.”—Juan 10:14, 16.
10. Sa unsang paagi kita makakat-on gikan sa nagkalainlaing sanong sa mga Hudiyo ngadto sa pagdapit ni Jesus nga mosunod kaniya?
10 Unsay sanong sa mga Hudiyo ngadto sa pagdapit ni Jesus nga mahimong iyang samag-karnero nga mga sumusunod? Nagkadaiya ang ilang mga sanong. Samtang atong susihon ang pipila sa maong mga sanong, palandonga kon unsa ang imong sanong sukad imong nahibaloan ang mensahe sa Gingharian sa Diyos.
“Mahimong Akong Sumusunod”—Unsay Imong Sanong?
11. Batbata ang sanong ni Simon, Andres, Santiago, Juan, ug Mateo ngadto sa pagdapit ni Jesus, “Sumunod kamo kanako.”
11 Samtang si Jesus naglakaw duol sa Dagat sa Galilea, iyang nakit-an si Simon ug ang iyang igsoong lalaki nga si Andres nga nangisda. “Si Jesus miingon ngadto kanila: ‘Sumunod kamo kanako, ug himoon ko kamong mga mangingisda sa mga tawo.’ Ug dihadiha ilang gibiyaan ang ilang mga pukot ug misunod kaniya. Ug sa nakalakaw ug layolayo iyang nakit-an si Santiago ang anak lalaki ni Zebedeo ug si Juan nga iyang igsoon . . . ug . . . iyang gitawag sila. Sa baylo ilang gibiyaan ang ilang amahan nga si Zebedeo diha sa sakayan kauban sa sinuholang mga tawo ug nanlakaw nga misunod kaniya.” (Marcos 1:16-20) Ang samang positibong pagsanong gipakita sa maniningil ug buhis nga si Levi, o Mateo. “[Si Jesus] miingon kaniya: ‘Sumunod ka kanako.’ Ug sa pagbiya sa tanan siya mitindog ug misunod kaniya.”—Lucas 5:27, 28.
12. Unsay suliran sa tawong miingon kang Jesus: “Mosunod ako kanimo sa bisan asa ikaw moadto”?
12 Ugaling, dili tanan positibong misanong sa pagdapit ni Jesus, “Sumunod ka kanako.” Palandonga kadtong lalaki nga nahibalag ni Jesus samtang mipanaw gikan sa usa ka balangay ngadto sa lain. Siya miingon kang Jesus: “Mosunod ako kanimo sa bisan diin ka moadto.” Ang talaan ni Mateo nagapailang kadtong tawhana usa ka eskriba. Ang mga eskriba gitahod sa katawhan ug gitawag “Rabbi.” Karon matikdi ang tubag ni Jesus: “Ang mga milo dunay mga langob ug ang mga langgam sa kalangitan dunay mga kabatogan, apan ang Anak sa tawo walay kapahulayan sa iyang ulo.” (Lucas 9:57, 58) Si Jesus nagsulti niadtong tawhana nga kinahanglang siya moagig kalisod aron mahimong Iyang sumusunod. Ang ipasabot mao nga kadtong tawhana garboso kaayo nga dili siya makadawat sa maong paagi sa kinabuhi. Ang pagkadili-piho kon asa matulog sa sunod gabii dili niya madawat.
13. Nganong ingon niadto ang tubag ni Jesus ngadto sa lain nga mahimo untang usa ka sumusunod?
13 Gisultihan ni Jesus ang laing tumatan-aw: “Sumunod ka kanako.” Apan, ingong tubag, siya miingon kang Jesus: “Tugoti una ako nga molakaw ug maglubong sa akong amahan.” Matikdi ang tubag ni Jesus: “Pasagdi ang patay nga maoy maglubong sa ilang mga minatay, apan lumakaw ka ug imantala sa bisan diin ang gingharian sa Diyos.” (Lucas 9:59, 60) Ang pasangil niadtong tawhana wala magpasabot nga namatay na ang iyang amahan. Kon ugaling siya namatay, dili unta posibleng ang anak lalaki atua sa dalan nga nagpatalinghog kang Jesus. Dili, gikan sa gipamulong sa lalaki mopatim-aw nga siya nagpaabot sa pagkamatay sa iyang amahan. Siya dili andam sa pagbutang dihadiha sa Gingharian sa Diyos nga una sa iyang kinabuhi.—Mateo 6:33.
14, 15. (a) Unsay gipaila sa hangyo sa ikatulong tawo kang Jesus? (b) Unsang pagtulon-an ang atong makat-onan karong adlawa gikan sa tubag ni Jesus sa maong tawo?
14 Ang talaan nagasugid mahitungod sa ikatulong lalaki, kinsa mibulontaryo: “Mosunod ako kanimo, Ginoo; apan itugot una nga ako manamilit ngadto sa mga sakop sa akong panimalay.” Kadtong tawhana lagmit nangayog mga kondisyon nga ilangkit sa iyang pagkahimong sumusunod ni Jesus. Sa pagkamatuod, siya nag-ingon kang Jesus: ‘Tan-awa! Ako mahimong usa sa imong mga sumusunod, kon . . . ’ Unsa ang tubag ni Jesus? “Walay tawo nga nagbutang sa iyang kamot sa usa ka daro ug molingi sa mga butang sa luyo ang takos gayod sa gingharian sa Diyos.” (Lucas 9:61, 62) Sa dihang ang usa ka magdadaro buot modaro sa tul-id sa uma, kinahanglang siya molantaw sa unahan. Kon iliso niya ang iyang ulo sa pagtan-aw sa luyo, lagmit mahiwi ang tudling. Basin siya matumba pa! Kana matuod sa mga sumusunod sa lakang ni Jesus; ang ilang paglingi niining daang sistema sa mga butang, bisan sa kadiyut lamang, mao ang pagpangayog problema, nga mapandol ang ilang mga till ug mahibulag sa ‘masigpit nga dalan nga motultol sa kinabuhi.’—Mateo 7:14; tan-awa ang Lucas 7:31-35.
15 Nakadungog ka ba sa pagdapit ni Jesus: “Sumunod ka kanako”? Unsa ang imong sanong? Gipakita ba nimo ang samang positibong sanong sama sa mga disipulong si Simon, Andres, Santiago, Juan, ug Mateo? Sama niadtong mga tawhana, andam ka bang mohimog sakripisyo nga gikinahanglan aron mosunod sa mga lakang sa Agalon? Kon oo ang imong tubag, nan makatagamtam ka sa dili-masukod nga pribilehiyo sa pagpakig-ambit sa pagmantala sa bisan diin sa maayong balita sa Gingharian sa Diyos.
16. Sa unsang paagi giandam ni Jesus ang iyang mga disipulo alang sa pagpakig-ambit uban kaniya sa pagwali sa maayong balita?
16 Una ipadala ni Jesus ang iyang mga disipulo sa pagmantala sa Gingharian, mahanason niyang gitudloan sila sa pagbuhat niana pinaagi sa iyang kaugalingong panig-ingnan. Human niadto, gihatagan sila ni Jesus ug detalyadong mga instruksiyon kon unsaon sa pagpangita sa mga karnerohon diha sa usa ka teritoryo. Ang mga instruksiyon ni Jesus mapadapat gihapon niining ika-20ng siglo. Atong susihon ang pipila niini sumala sa nahitala sa kapitulo 10 sa asoy ni Mateo.
Mga Instruksiyon Bahin sa Pagwali sa Gingharian
17. Itandi ang unod sa mensahe sa Gingharian nga giwali sa unang siglo sa mensahe karong adlawa.
17 Ang tema sa mensahe sa mga disipulo sama ra sa tema nga gimantala ni Jesus: “Samtang manglakaw kamo, iwali ninyo, nga magaingon, ‘Ang gingharian sa mga langit haduol na.’” (Mateo 10:7) Ugaling, kanang Ginghariana karon natukod na sa mga langit. Ang Magbalantay-Hari ni Jehova, si Kristo Jesus, karon nagamando na! Busa, ang mga pulong ni David nakabaton karon ug labaw nga kahulogan: “Maglipay ang mga langit, ug magsadya ang yuta, ug pasultiha sila taliwala sa mga nasod, ‘Si Jehova nahimo nang hari!’” (1 Cronicas 16:31) Karong adlawa, kita dili lamang may pribilehiyo sa pagpaluyo niining espesyal nga ekspresyon sa unibersohanong pagkahari ni Jehova kondili ato usab nabatonan ang kalipay sa pagkinabuhi sa panahong ang isyu sa pagkalabaw ni Jehova pagahusayon na sa tanang panahong umaabot.
18. Unsay gipasiugda ni Jesus ngadto sa iyang mga sumusunod sa Mateo 10:8-10, ug kinsa ang makapabili ilabina niini karong adlawa?
18 Ang Mateo 10:8-10 nagabatbat sa tinamdan niadtong nagapakig-ambit sa buluhaton sa pagwali. Ang Gingharian sa Diyos kinahanglang mauna sa ilang kinabuhi, ang pisikal nga mga panginahanglan maoy ikaduha. Ngano man? Si Jesus nag-ingon: “Kay ang mamumuo takos sa iyang pagkaon.” Ang atong langitnong Amahan mag-atiman sa kanunay niadtong nagasalig diha kaniya. Ug ang ginatos ka libong bug-os-panahong mga ministro sa mga Saksi ni Jehova karong adlawa makapamatuod niining kamatuorana.—Numeros 18:30, 31; Deuteronomio 25:4.
19. Sa unsang paagi ginabuhat karong adlawa ang pagpangita sa mga takos, ug ilalom sa kang kansang pagdumala?
19 Si Jesus sunod nagsugo: “Sa bisan unsang siyudad o balangay nga inyong pagaadtoan, pangitaa ninyo kon kinsa ang takos diha niana, ug magpabilin didto hangtod sa inyong pagbiya.” (Mateo 10:11) Takos sa unsa? Takos sa pag-abiabi sa maong alagad ni Jehova ug pagpamati sa mensahe sa Gingharian sa Diyos. Hinuon, niadtong panahona ang mga disipulo lagmit magpabilin sa panimalay niadtong takos nga tawo ug gamiton kadto ingong sukaranan samtang susihon nila ang nahibilin sa teritoryo sa pagpangitag ubang takos. Karong adlawa, ang mga Saksi ni Jehova nagasunod sa susamang paagi. Sila nagagugol ug minilyong oras ug nagabudlay pag-ayo sa pagpangita sa mga takos diha sa nagkalainlaing teritoryo. Unya, dihang sila hikaplagan, ang mga Saksi may dakong kalipay sa pagduaw na usab sa maong mga tagbalay ug pagpatin-aw sa Pulong sa Diyos ngadto kanila. Sa ingong paagi, karong adlawa, si Jesus mahanasong nagatultol sa ubang mga karnerohon ngadto sa iyang matarong nga kiliran nga may pag-uyon.—Mateo 25:31-33.
20. Sa unsang paagi ang panimalay nga takos makasinati sa pakigdait nga gipanghinaot niana sa magwawali sa Gingharian?
20 “Inigsulod ninyo sa balay, timbayaa ang panimalay; ug kon ang balay takos, itugot nga ang kalinaw magpabilin diha niana.” (Mateo 10:12, 13) Ang “Hinaot kining balaya adunay kalinaw” maoy kasagarang timbaya sa adlaw ni Jesus. (Lucas 10:5) Ang mga manulonda miawit sa panahon sa pagkatawo ni Jesus: “Himaya sa Diyos sa kahitas-an, ug sa yuta pakigdait taliwala sa mga tawong may maayong kabubut-on.” (Lucas 2:14) Nasinati sa usa ka takos nga panimalay ang maong gitagnang pakigdait pinaagi sa pagdawat sa mensahe sa Gingharian sa mga disipulo. Karong adlawa, ang maayong balita sa Gingharian may samang epekto. Kini nagadala sa mga tawo ngadto sa makigdaitong mga relasyon uban sa Diyos pinaagi kang Jesu-Kristo, ug kini nagapatungha usab ug pakigdait taliwala sa isigkamagtutuo.—2 Corinto 5:20, 21; Filipos 4:7; Efeso 4:3.
21. Nganong ang tinuig nga teksto sa 1986 tukma kaayo?
21 Sulod sa 1986 kalendaryong tuig, ang mga Kingdom Hall sa mga Saksi ni Jehova sa tibuok yuta magpasundayag sa tinuig nga teksto nga kinuha sa Lucas 9:60: “Lumakaw ka . . . imantala sa bisan diin ang gingharian sa Diyos.” Pagkamaayong pahinumdom ug pagdasig kini alang sa tanang ministro sa Diyos sa pagpakig-ambit nga regular sa pagwali sa Gingharian sa Diyos! Oo, ang maong Ginghariana ania na sukad 1914! Kini ang instrumento sa Diyos diha sa mga kamot sa iyang Mesiyanikong Hari sa pagdugmok sa tanang kalibotanong mga gingharian ni Satanas. Nan, dili katingad-ang ang Gingharian sa Diyos angay nga mao ang labing bililhon diha sa kinabuhi sa matag usa sa mga Saksi ni Jehova. Kami nahibalo nga kini nagkahulogan sa atong kaluwasan ngadto sa kinabuhi!—1 Timoteo 4:16.
[Unsay Imong Tubag?]
□ Unsa na ka dugay ug ka lig-on ang pagkahari ni Jehova?
□ Unsang unibersohanong isyu ang karon kinahanglang mahusay?
□ Ang tanang sumusunod ni Jesus kinahanglang maandam sa pagbuhat sa unsa?
□ Nganong ang pamulong “Si Jehova nahimo nang hari” labaw nga makahuloganon karong adlawa?
□ Unsang katuyoan ang maalagaran sa 1986 nga tinuig nga teksto?