Mga Magmamantala sa Gingharian Nagtaho
“Sila Dili Makadaog Kanimo”
SA USA ka nasod sa Sentral Amerika, 15 ka armadong lalaki nagkuot sa duha ka Saksi ni Jehova sa ilang balay ug nagdala kanila ngadto sa usa ka pundok sa 75 ka lalaking armado sa mga batota ug mga sundang. Ilang gipanamastamasan ang mga Saksi pinaagi sa mga kalaw-ayan ug gitugyan sila ngadto sa laing pundok sa mga 350 susamang armadong mga lalaki. Gidahom nila nga ang duha ka igsoong lalaki mahadlok ug mokompromiso sa ilang Kristohanong neyutralidad pinaagi sa pag-anib sa ilang patrolya. (Isaias 2:4) Apan mibarog nga malig-on ang mga Saksi ug midumili sa pag-apil sa militaryong kalihokan. Busa gibalhog nila sila ngadto sa bilanggoan, samtang ang mga membro sa daghang iglesya mikompromiso ug nanagan ngadto sa kabukiran uban sa patrolya.
Sa sunod adlaw ang mga igsoon gidala ngadto sa dakong lungsod alang sa laing husay. Samtang sila nagbaktas, giingnan sila sa mga guwardiya nga sila gi-brainwash. Mitubag ang mga igsoon: “Tinuod bitaw nga kami gi-brainwash! Karon kami dili na modaot kang bisan kinsa; kami dili na mga kawatan, palahubog, mananapaw.” Sa gihusay sila sa opisyal, siya mipakitag kalulot ug mipahalipay kanila, nga miingon, “Kon ang tanan sama pa unta kaninyo, ang kahimtang lahi unta . . . ug hinaot ang inyong Diyos si Jehova magapanalipod kaninyo.” Unya sila gibuhian.
Nganong ginalutos ang dili-mangdaot, makigdaitong mga Kristohanon nga nagalaban sa mga sukdanan sa Diyos sa pagkamatarong? Tungod kini kay sila “dili bahin sa kalibotan” ug sa politikanhong kalihokan niini. (Juan 17:16) Makalipay gayod ang pagkahibalo nga bisan pag si Satanas ug iyang kalibotan makig-away sa mga alagad ni Jehova, sila dili makadaog! (Jeremias 1:19) Kini napamatud-an diha sa maong nasod, ug ang opisyal nga tinugyanan pagadayegon tungod sa pagsabot sa neyutral nga baroganan sa mga Saksi ni Jehova.
◻ Ang mga pulong ni Jeremias natuman usab diha sa usa ka kasinatian gikan sa usa ka Aprikanhong nasod diin gipiotan ang buluhaton sa mga Saksi ni Jehova. Tapos sa pagbatbat sa kalisdanan nga naagoman sa mga igsoon sa pagsulay sa pagtabang sa katawhan nga makakat-on ug dugang mahitungod sa kahibulongang mga katuyoan ni Jehova, ang taho miingon: “Tungod sa neyutral nga baroganan sa katawhan ni Jehova, gipriso ang kawhakawhaan sa atong mga igsoon, nga kadaghanan sa sunodsunod nga mga tagal. Sila grabeng gibukbok, gibunalan, ug gipit-osan sa tanang paagi aron ilang lapason ang ilang Kristohanong mga konsensiya. Sa usa ka hitabo, tapos mapakyas nga ipalapas ang integridad sa usa ka igsoon pinaagi sa mapintas nga mga pagbukbok, ang pila ka sundalo nagsabutsabot sa pagpatay kaniya. Dihang nasayran sa usa ka superyor nga opisyal ang ilang plano, siya personal nga mibalda ug sekretong mipabalhin kaniya ngadto sa laing siyudad, sa ingon nagluwas ang iyang kinabuhi.”
Ang maong paglutos wala makapugong sa mga Saksi ni Jehova sa pagsangyaw sa maayong balita sumala sa gisugo sa Diyos. (Mateo 24:14) Ginalig-on sila ni Jehova pinaagi sa iyang espiritu ug ginapanalanginan ang ilang matinumanong pagbarog. Ang taho gikan sa maong nasod nag-ingon usab: “Bisan pa sa hilabihang pisikal nga mga kalisdanan, gutom, sakit, mabangis nga gubat sibil, ug paglutos, may 17-porsientong pag-uswag sa aberids nga gidaghanon sa mga magmamantala.” Ang tumatambong sa Memoryal miuswag ug 21 porsiento, ug 21 porsiento sa tanang magmamantala nag-alagad ingong mga payunir sulod sa Abril 1984.
Busa ang atong mga igsoon malipayon bisan pag sila gilutos. Sila nagasalig kang Jehova ug napahinumdoman sa mga pulong ni Jeremias: “Sila makig-away batok kanimo, apan sila dili makadaog kanimo, kay ‘ako magauban kanimo,’ nagaingon si Jehova, ‘sa pagluwas kanimo.’”—Jeremias 1:19.
[Hulagway sa panid 27]
Si Jehova nagalig-on sa iyang gilutos nga mga Saksi