Ikahawhaan ka Siglong mga Maghuhupot sa Integridad Nagkatigom!

SAYO kaayong gisugdan ang mga gubat sa tawhanong kasaysayan. Misugod ang pag-alsa sa espirituhanon ug tawhanong mga gingharian, ug gihagit ang pagkamatarong sa pagkasoberano sa Maglalalang! Kini nakapatunghag moral nga isyu nga nalangkit ang pangutana, Kadto bang maunongon pa kang Jehova nga Diyos nagahimaya sa iyang pagmando pinaagi sa paghupot sa ilang integridad kaniya?​—Genesis 3:1-24; Exodo 9:16; Lucas 22:31.

Si Satanas nga Yawa bakak nga nangangkon nga ang mga magsisimba ni Jehova nagaalagad Kaniya tungod sa mahakugong kaayohan ug dili tungod sa gugma. (Job 1:1-2:10) Apan, sila nagapabiling maunongon sa Diyos bisan pa sa mga paningkamot ni Satanas ug sa iyang nagabatok nga kalibotan sa pagbungkag sa ilang integridad. (Hebreohanon 11:4-38; Pinadayag 12:10-17) Aron madasig ang ika-20ng siglong mga alagad ni Jehova sa pagpadayon sa pagkamatinumanon, ang Watch Tower Society naghikay ug serye sa “Maghuhupot sa Integridad” nga mga kombensiyon sa mga Saksi ni Jehova nga gihimo sa daghang kanasoran, sugod sa ting-init sa miaging tuig sa 1985. Sa matag adlaw gipasiugda ang nahiangayng tema sa Bibliya.

“Maglakaw nga Maunongon”

Kining tema sa unang adlaw sa kombensiyon nakapukaw sa espirituwal nga mga gana. Ang pakigpulong “‘Pamatia, O Akong Katawhan,’ ang Pulong ni Jehova” nag-andam sa ilang hunahuna pinaagi sa pagpahinumdom sa tanan sa pagpaminaw pag-ayo. Nagpakita sa kaalam niana nga rekomendasyon mao ang pakigpulong sa tsirman, “Pasagding Panalipdan Kita sa Integridad.” Sa unsang paagi mahimo kana sa integridad? Ang integridad nagkinahanglan nga bug-os ang atong debosyon sa Diyos, sa pagtipig sa atong mga kasingkasing, mga motibo ug mga pagbati nga maputli. “Kon kini maoy atong determinasyon,” miingon ang tsirman, “nan ang atong integridad mopanalipod kanato.”​—Salmo 25:5; 31:23.

Sunod kita “Madasig sa Panig-ingnan sa Nasulayang mga Maghuhupot sa Integridad.” Human nga mipunting sa makapadasig nga mga panig-ingnan sa nangagi, giinterbiyo sa mamumulong ang sulondang mga maghuhupot sa integridad sa atong panahon. Kadtong maunongon “Dili Maulaw sa Maayong Balita.” Kining pakigpulonga, nga gibase sa Marcos 8:38, nagpatin-aw nga ang maisogong pagpaila sa atong kaugalingon diha sa atong ministeryo, sa atong sekular nga trabaho, ug bisan asa maoy usa ka panalipod. ‘Ug pagkatahom unya kon moatubang na si Jesus atubangan sa langitnong mga manulonda ug sa iyang Amahan, sa pag-ingon nga kita maoy iyang mga disipulo nga nakapabilin sa integridad!’

“Ang mga Butang nga Gipadayag Atoa ug sa Atong mga Anak” maoy bahin sa programa nga nagpakita nga, ingong mahigugmaong Amahan, malipayon si Jehova sa pagpadayag sa iyang katawhan sa “mga butang nga tinago.” (Deuteronomio 29:29; Amos 3:7) Ang makugihong pagtuon niining mga butanga nga gipadayag makalig-on kanato aron makapabilin kita sa atong integridad. Ang sunod nga topiko, “Kalipayi ang Pulong ni Jehova,” nagpasiugda sa punto nga ang mga Saksi ni Jehova kinahanglang mahimong mga estudyante sa Bibliya. (Salmo 1:1, 2) Sa pagkatinuod, “ang pagtuon maoy bahin sa kinabuhi sa matag Kristohanong nagalakaw sa integridad.”

“Pagpangatarongan Gikan sa Kasulatan” maoy paagi nga gigamit sa mga maghuhupot sa integridad sa pag-atubang sa nagkalainlaing matang sa mga tawo nga ilang ginasangyawan. Pananglitan, diha sa sinagoga sa Tesalonica, si apostol Pablo ‘nangatarongan gikan sa Kasulatan, nagpatin-aw ug nagpamatuod pinaagi sa mga reperensiya nga kinahanglang mag-antos si Kristo.’ Malamposon ba si Pablo? Oo, kay ang pila sa iyang mga tigpaminaw nahimong mga magtutuo. (Buhat 17:1-4) Pabilhan ba sa mga kombensiyonista ang tabang sa pagtubag sa mga pangutana nga maatubang sa ilang ministeryo? Pagkadako sa kalipay sa pagdawat niini sa giluwat sa mamumulong ang bag-ong libro sa kanataran nga, Reasoning From the Scriptures!

“Pag-atiman sa Hustong Paagi sa Pulong sa Kamatuoran”

Sa ikaduhang adlaw, makaikag ang pagtan-aw sa daghan kaayong mga payoner​—libolibo diha sa ubang mga kombensiyon​—mibarog sa pagdapit sa mamumulong, nagpamatuod nga daghan ang nagapakigbahin sa bug-os panahong pag-alagad. Niining bahina, “Paningkamot Kamo Diha sa Bug-os Panahong Pag-alagad,” gipasiugda nga takos sa pagkugi ang pagpayoner, bisan tuod gikinahanglan ang paningkamot aron makabahin niini nga kalihokan.​—Lucas 13:24.

Ang dugokang pakigpulong, “Lipaya ang Kasingkasing ni Jehova Pinaagi sa Paghupot sa Integridad,” gibase sa Proverbio 27:11. Kining pakigpulonga nagtuki sa tipiganan sa bahandi nga mao ang Pulong sa Diyos ug nakakita niining bililhong mga bato: “Ang tinuod nga integridad nagpasabot sa dili-mabungkag nga pagmahal ngadto sa usa ka persona​—si Jehova nga Diyos.” “Si Satanas mao ang dakodako sa pagbungkag sa integridad,” ug ang iyang pag-alsa nakabangon sa “isyu sa pagkamatarong sa pagkasoberano sa Diyos.” “Bisag wala magadepende ang pagkasoberano ni Jehova sa paghupot sa integridad sa iyang mga linalang, gikuwestiyon sa maalsahong lihok sa Yawa ang integridad sa tawo nga mahimong hinungdanong bahin sa isyu sa pagkasoberano sa uniberso.” Ang mamumulong nangutana: “Sa unsang paagi makadaog kita ingong maghuhupot sa integridad?” “Mahimo nato kana tungod kay gisunod nato ang Pulong sa Diyos,” siya mitubag.​—Roma 14:8.

Ang pag-una sa espirituwal nga intereses sa atong kinabuhi mao ang gihatagag pagtagad sa sunod nga pakigpulong, “Ang Panalangin ni Jehova​—Nagapadato.” Natabangan kita sa dugang nga pagkaamgo nga bisag mapuslanon ang salapi, ang gugma sa salapi mohatag dakong kadaot. (Ecclesiastes 7:12; 1 Timoteo 6:10) Ang pagkamatinumanon nga mobungag panalangin ni Jehova, mao ang tinuod nga bahandi.​—Proverbio 10:22.

Ang drama “Ang Imong Kaugmaon​—Usa ka Hagit” nagtandi sa dalan sa maghuhupot sa integridad nga mga Nazareo sa hagit nga ginaatubang sa mga batan-ong Saksi sa ilang tinguha nga mahimong mga payoner ug sa pagpabilin sa bug-os panahong pag-alagad imbes sa pagpangagpas ug materyalistikong mga tumong. Giawhag ang mga batan-on sa pagdawat sa hagit ug sa pag-alagad sa Diyos sa bug-os. Gipakita usab sa drama kon sa unsang paagi ang mga ginikanan ug ang uban makatabang.

Gisaysay sa “Pagpugas ug Daghan, Magaanig Daghan,” nga ang prinsipyong ‘atong anihon ang atong ipugas’ maalamon, makataronganon, ug mahigugmaon. Sa pagsundog sa Diyos, kang Kristo, ug sa ‘matinumanong mga ulipon,’ makaani kita ug daghan sa pagtambong sa tigom, pag-ampo, pagsangyaw, ug sa tanan natong relasyon sa pamilya. (Mateo 24:45-47) Kining matanga sa pagpugas nagapasalig kanato nga makaani sa panalangin ni Jehova.​—Hebreohanon 6:10.

Sa pakigpulong “Kon Unsaon Nimo sa Pagtubag sa Matag Usa,” naminaw pag-ayo ang mga tumatambong sa mga sugyot ug mga pasundayag nga gihatag kon unsaon sa paggamit sa bag-ong librong Reasoning From the Scriptures. Gipasiugda mao ang pagbuntog sa pagkawalay kaikag pinaagi sa paggamit sa tukmang mga introduksyon, sa paghatag ug makapukaw nga tubag kon adunay tim-os apan negatibong reaksiyon, ug sa paggamit sa Bibliya nga maoy tuboran sa atong mga tubag.​—Colosas 4:6.

Tapos sa kataposang pakigpulong sa ikaduhang adlaw, “Pagmantala sa Katingalahang mga Buhat ni Jehova,” okupado kita sa paghimo niana pinaagi sa pakigbahin sa pag-alagad sa kanataran. Nianang hapona mismo ang usa ka Saksi nga nagbalaybalay sa Vancouver, Canada, nakahibalag pagsupak: “Kon ang Diyos maoy usa ka Diyos sa gugma, ngano man nga iyang gitugotan ang pagkadaotan?” Natagbaw ang nangutana sa tubag nga gihatag sa bag-ong librong Reasoning, ug gisugdan dihadiha ang pagtuon sa Bibliya.

“Walay Buling Taliwala sa Balikong Kaliwatan”

Mao kini ang makapukaw sa hunahuna nga tema sa ikatulong adlaw. Nianang buntaga, ang pakigpulong “Pagpasidungog Kang Jehova Pinaagi sa Atong mga Bahandi” nagpasiugda nga ang atong gipahinungod nga kinabuhi, ang atong suod nga relasyon kang Jehova, ug ang atong pisikal, hunahuna, espirituwal, ug materyal nga mga kabtangan maoy bililhong mga butang nga angay natong ipasidungog ngadto sa atong langitnong Amahan.​—Proverbio 3:9, 10.

Ang pakigpulong “Pagpasig-uli sa Kusog, nga Walay Pagkakapoy” naghatag tukma sa panahong instruksyon sa pagtabang kanato sa pagsukol sa mga pagsulay ni Satanas sa pagbungkag sa atong integridad pinaagi sa mga pagduhaduha, pagkawala sa pagtuo, materyalismo, mga tentasyon, ug nagkalainlaing mga porma sa pagkaluya sa buut. Ang pagtuon, pagpalandong, pag-ampo, pagtambong sa tigom, ug ang regular nga pakigbahin sa pagsangyaw sa Gingharian mao ang tinong mga paagi sa paggamit sa walay pagkahubas nga Tuboran sa kusog, si Jehova.​—Isaias 40:28-31.

Ang pangunang punto sa diskursong “Pagkinabuhi sa Kabubut-on sa Diyos Karon ug sa Walay Kataposan” mao nga kon atong nabatonan ang panghunahuna ni Kristo, kita “dili na [magkinabuhi] sa mga pangibog sa mga tawo, kondili sa kabubut-on sa Diyos.” (1 Pedro 4:1, 2) Wala gayod itugot ni Jesus ang tawhanong mga tinguha nga maoy mopalayo kaniya nianang dalana. Ang mga kandidato sa bawtismo, namati pag-ayo sa sunod nga tema, “Pagkig-uban Duyog sa mga Maghuhupot sa Integridad ni Jehova.” Sila gisultihan nga ang lakang sa bawtismo maoy sinugdanan lamang sa ilang lumba sa paghupot sa integridad. Aron makadagan ug maayo, kinahanglang ilang pahimuslan ang mga tagana sama sa pag-ampo, Pulong sa Diyos, Kristohanong mga publikasyon, ug aktibong pakig-uban sa kongregasyon. Mibarog ang mga kandidato sa pagtubag sa mga pangutana nga nagpaila kon sila ba nakasabot sa hinungdanong lakang nga ilang gisubay. Misunod ang ilang pagbawtismo sa tubig, ang uban diha sa atubangan sa ubang mga delegado sa kombensiyon.

Nianang hapona, ang pakigpulong “May Kahadlok ba Kita Kang Jehova?” nagpasiugda sa pagtahod sa Soberano sa Uniberso. (Proverbio 8:13) Taliwala sa mahadlokon sa Diyos nga si Haring Jehosaphat sa Juda ug sa naentrono na karong Dakong Jehosaphat, si Jesu-Kristo, adunay katumbas nga sama niini: pagtipig sa pagsimba nga maputli (1 Hari 22:16; Malaquias 3:1-18); pagpanalipod sa kagawasan sa pagsimba (2 Cronicas 17:1, 2, 12-19; Filipos 1:6, 7); pag-organisar sa pagpaedukar sa tinuod nga mga magsisimba (2 Cronicas 17:7-9; Mateo 28:19, 20); ug sa pagtukod ug teokratikanhong hukmanan sa pagpakanaog sa hustisya.​—2 Cronicas 19:6, 7; 1 Corinto 6:5, 6.

Ang bahin nga “Mapuslanon ang Kasulatan sa Pagtul-id sa mga Butang” nagpunting kon sa unsang paagi makatabang kanato ang Bibliya sa pagsubay ug mahusay nga kinabuhi ug sa pagpakitag pagtahod sa organisasyon, sa tinudlong mga magtatan-aw, ug sa mga tigulang. Ang sunod nga bahin, “Determinado sa Pag-alagad Kang Jehova sa Bug-os nga Kasingkasing,” napasilsil kanato ang panginahanglan sa pagbaton ug mahimsog malarawanong kasingkasing, usa nga gitipigang mahinlo​—bug-os​—alang sa pag-alagad ni Jehova.​—1 Cronicas 28:9.

Apan unsay ikasulti bahin sa mata? Ang sunod nga mamumulong mitubag sa pangutana, “Ingong Membro sa Pamilya, ‘Yano’ ba ang Imong Mata?” Sanglit daghan mang mga butang ang gigamit ni Satanas sa pagbalda sa atong espirituwal nga mata, hinungdanon nga ang Kristohanong mga amahan, inahan, ug kabataan maghupot ug timbang nga hunahuna ug sa pag-una sa intereses sa Gingharian. (Mateo 6:33) Ang panginahanglan sa pag-ila sa Dakong Organisador pinaagi sa pagpakitag pagtahod sa tinudlong mga magtatan-aw ug sa kongregasyon gipasiugda sa sunod nga pakigpulong, “Mainampingong Pagsunod sa mga Sugo sa Hari.”​—Proverbio 8:32-36.

Ang adlaw gitapos sa diskursong “Integridad sa Kamatuoran sa Walay Diyos nga Kalibotan.” Lakip sa ubang mga butang, kinahanglang magpabiling maunongon ang mga Kristohanon sa kamatuoran pinaagi sa pagpanalipod sa pagtulon-an sa Bibliya bahin sa paglalang ug sa pagtubag sa dili diyosnong mga teoriya. Nalipay ang tumatambong sa giluwat ang 256-panid nga libro nga latid nga nagatubag sa pangutana nga gibangon sa ulohan niini, Life​—How Did It Get Here? By Evolution or by Creation? Unsa ka epektibo kining basahona? Gibasa sa ebolusyonista niadto, nga karon usa na ka Saksi sa Sweden, ang enterong libro nianang gabhiona ug miingon: “Kon ebolusyonista ako gahapon, mausab gayod ang akong hunahuna sa usa lamang ka gabii.”

“Pagpakitag Maayong Batasan Taliwala sa Kanasoran”

Mao kini ang tema sa kataposang adlaw sa kombensiyon. Ang usa sa mga pakigpulong nga gihatag nianang buntaga nagtubag sa pangutana “May Makabulag ba Kaninyo Gikan sa Gugma sa Diyos?” Kita lamang ang makabulag sa atong kaugalingon gikan sa gugma sa Diyos ug ni Kristo. Apan kon magpabilin kita sa atong pagtuo, walay kapit-osan, walay kahimtang, walay magsusupak ang makakuha sa gugma sa Diyos gikan kanato.​—Roma 8:35-39.

Ang dirkursong “Ayaw Kahikugang Dayon sa Imong Pangatarongan” nagpasiugda sa panginahanglan sa pagpanalipod sa atong dapit diha sa espirituwal nga paraiso. Sa unsang paagi? Sa lakbit, pinaagi sa paglikay sa espiritu sa pagbagulbol ug sa pagsukol sa apostasiya, busa nagsunod sa tambag ni Pablo ‘nga dili makugang dayon sa atong pangatarongan’ pinaagi sa bisan unsang binaba o sinulat nga mensahi nga gituyo sa pagpatunghag mga pagduhaduha ug sa pagdaot sa atong pagtuo.​—2 Tesalonica 2:1, 2.

“Kahadloki ang Diyos, Palayo Gikan sa Daotan” mao ang ikaduhang makaikag nga drama. Naghisgot kini sa maghuhupot sa integridad nga si Job ug nagpakita nga ang paglutos ug pag-antos sa pag-alagad sa Diyos dili bag-o. Bisan pa sa mga paningkamot sa pagpalayo kanato, sama kang Job kinahanglang determinado kita sa paghupot sa atong integridad, mahadlokon kang Jehova ug magpahilayo gikan sa daotan.

Ang pakigpulong sa publiko, “Ang Panahon ug Tempo sa Diyos​—Unsay Gipunting Niini?” nagpahinumdom kanato nga si Jehova “nagatangtang ug nagapalingkod ug mga hari” nga kaharmoniya niining dili mausab nga katuyoan. Busa, inig-abot sa iyang panahon, siya sa walay pagkapakyas motapos sa pagkadaotan ug mopasig-uli sa pagkamatarong.​—Daniel 2:21, 44.

Ang duha ka panapos nga mga pakigpulong tukma gayod. “Pahalipay Alang sa Katawhan sa Integridad” nakalipay kanato uban sa pagsalig nga pinaagi sa iyang Pulong, sa iyang espiritu, ug sa pagtubag sa atong mga pag-ampo, si Jehova sa walay pagkapakyas mopalig-on kanato sa pagsulay. Ug sumala sa gipakita sa kataposang pakigpulong, dili mosibog ang mga Saksi ni Jehova tungod kay sila nagakinabuhi niining masukihong kalibotan. Hinunoa, sila maoy mga “Maghuhupot sa Integridad nga Organisasyon nga Nagalihok”! Tagsaon kining organisasyona sa iyang pagpaluyo sa pagkasoberano ni Jehova ug sa seguradong kadaogan niini ug kaluwasan.

Padayon Ingong mga Maghuhupot sa Integridad!

Dugang pa sa ilang kalipay sa pagdawat sa tugob espirituwal nga pagkaon, lakip sa duha ka bag-ong libro, ang mga tumatambong sa kombensiyon nalipay sa pagluwat sa matahom nga pagkailustrar nga 32-panid nga brochure nga nag-ulohang Ang Kagamhanan nga Mopatunghag Paraiso. Ug pagkadakong kalipay sa pagdawat sa Kingdom Melodies No. 6, usa ka teyp sa cassette sa matahom nga awit nga atong kalipayan!

Napabaskog ug napalanginag dako, ang namauling mga delegado mapasalamaton, tinuod, niining labing magantihong espirituwal nga mga kombira. Napalig-on pa gayod ang atong pagsalig sa Usa kinsa sulod sa 6,000 ka tuig nagapaluyo sa mga tighimaya sa iyang pagkasoberano sa madaogon makakita sa iyang mga saksi sa paglabang niining kinatayoktokang “kataposang mga adlaw” ug luwas nga makalatas ngadto sa Bag-ong Kahikayan, tanan alang sa iyang walay kataposang kahimayaan.​—2 Timoteo 3:1; Pinadayag 7:9-12; 21:1-5.

Uban niini nga pagsalig ug pagtuo sa atong Diyos, si Jehova, unsay atong tinguha? Walay lain kondili determinado kita sa pagpadayon sa unahan nga maisogon ingong organisasyon ni Jehova sa ika-20ng siglong mga maghuhupot sa integridad!

[Kahon sa panid 29]

Unsay Gipamulong sa Uban

Ang usa ka superintendente sa kapolisan, si Leeds, England: “Buot kong pasidunggan kamo, ang inyong kaubanan, ug tanan ninyong sakop nga mitambong . . . sa episyenteng paagi sa pagkahikay ug pagkadumala niadto. Kadungganan alang kaninyo kadtong tanan. Miduaw ako sa Istadyom sa Sabado sa hapon ug sa Domingo sa buntag ug nakakitag palibot ug mga palakat nga labing makapapresko kaayong kasinatian. Sama usab ug komento ang kadaghanan sa akong mga kauban.”

Ang usa ka hepe sa editoryal nga magsusulat sa mantalaan sa Montreal, Canada, ilalom sa ulohang “Baslan natog pahiyom ang katawhan ni Jehova”: “Sa miaging duha ka adlaw, walay duha ka oras, nanuktok sila sa 800,000 ka pultahan sa maong lugar. Usa ka porma sa espirituwal nga pagpangabig sa masa, nga makapikal usahay apan dili gayod tinuod makasamok. . . . Inigdawat nimog mga bisita sa imong mga balay, ayaw lamag tagda ang diyutayng kahasol aron sa pagdawat kanila. . . . Busa, unsa may anaa niana kon dili sama natog pagtuo ang mga Saksi ni Jehova; kita makaambit, sa pila ka adlaw, sa gamayng bahin sa ilang pagkamalinawon, ug maayo pa ang atong bation niana. Kining malinawong katawhan mipili sa pagtigom sa Montreal; paanhia ang daghan pa kanila, tinagpulo ka libo pa kanila.”

Ang usa ka opisyal sa kapolisan sa Dortmund, Pederal nga Republika sa Alemanya: ‘Sa mga dula dinhi labing menos may 200 ka polis nga magbantay; sa inyong mga tigom duha lamang ang among gikinahanglan, duha pa sa pag-atiman sa trapiko.’

Ang manedyer sa istadyom sa potbol sa Norwich, England: “Ang malinawong palibot sa miaging upat ka adlaw . . . madanihon. Imong maeksperyensiyahan ang personal nga kalinaw nga lahi kaayo gikan sa tanang upat ka adlaw sa maipitong kalibotan sa negosyo ug sa adlaw-adlaw nga kinabuhi sa atong palibot. Adunay butang nga nakapalahi sa mga Saksi ug malisod nga ibatbat.”

[Kahon sa panid 30]

Kombensiyon sa Montreal—Tagsaon nga Butang!

Sa unod sa programa, nga “Mga Maghuhupot sa Integridad” nga Distritong Kombensiyon nga gihimo sa iladong sa Olympic Stadium sa Montreal, Quebec, Canada, sama ra sa ubang mga kombensiyon niini nga serye. Apan sa pila ka paagi tagsaon kadto. Lakip sa ubang mga butang, una pa kadto sa usa ka grupo niining mga kombensiyona nga tagsaon sa gidak-on ug sa ubang mga paagi.

Gidak-on: Ang total nga 78,804 ang nagkatigom nga gikan sa sidlakan sa Canada ug sa amihanang-sidlakan sa Tinipong Bansa. Makapalig-on sa pagtuo nga mahimong bahin niining dakong panon sa mga maghuhupot sa integridad nga dungang naminaw, nanganta, ug nag-ampo. Tagsaon kadto!

Bawtismo: Tagsaong kalipay ang pagtan-aw sa 1,004 ka bag-ong nagpahinungod nga mibarog alang sa bawtismo. Aniay makitang ebidensiya sa kauswagan nga nagakahitabo karon taliwala kanato.

Mga Pinulongan: Dihay mga programa sa 11 ka pinulongan​—Arabiko, Intsik, Iningles, Pransis, Grego, Hungariano, Italyano, Koreano, Portuges, Kinatsila, ug Ukrainiano. Diha sa natad-dulaanan sa istadyom, gimuntar ang linain nga sound system aron kadtong anaa sa seksyon sa Pranses makabati sa ilang pinulongan samtang ang pinulongang Iningles makadungog ug una.

Siyudad sa Trailer: Kini maoy laing tagsaong bahin. Aron kapahilunaan sa mga delegado nga nagkinahanglag lugar alang sa mga trailer, mga sakyanan sa lulinghayaw, ug mga tolda, nagsugod silag andam sa Disyembre 1984 aron makuha ang permiso sa paggamit sa duol nga Maisonnueve Park, nga tabok sa dalan gikan sa istadyom. Sa giduol ang mga opsiyal bahin sa pag-abang sa parke, sila nangatawa. Gawas pa, wala pa sukad mahimo ang pagpaabang sa tibuok parke sa siyudad. Apan, sa ulahi, gihatag ang permiso. Ang maayong dungog sa mga Saksi nakatabang.

Sa anam-anam, 4,300 ka yunit ang gitukod, ug duolan sa 20,000 ka kombensiyonista gipahiluna sa lunhawng balili ilalom sa daghang landong sa kahoy. Ug unsay kondisyon sa parke human nga gigamit kini sa hilabihan ka daghang tawo nga duolan sa usa ka semana? Ang natingalang mga opisyal walay nakitang dagkong kadaot bisan asa. Tungod niana, ang bug-os nga kantidad sa lima ka numerong deposito giuli!

Mitambong ang mga Sakop sa Nagamandong Lawas: Kining bahina nakahimo sa kombensiyon sa Montreal nga tagsaon. Samtang ginalikayan sa katawhan ni Jehova ang tanang pagsimba sa linalang, sa walay duhaduha sama silag gibati sa usa ka igsoon kinsa mapabilhong miingon: “Ang presensiya sa pito ka sakop sa minahal nga Nagamandong Lawas, ang pila wala pa nako makita sukad o madunggi nga mihatag ug pakigpulong, makapadasig gayod.” Kining matanga sa panag-uban moresultag espirituwal nga “pagbaloay sa pagdasig.”

Usa ka Maayong Pag-abiabi: Ang mga opisyal ug ang katilingban sa katibuk-an nakig-atubang sa mga Saksi ni Jehova sa dalayegon ug sa walay pagpinig. Tagsaon kadto sa nadumdoman nga dili pa dugayng katuigan ang kanhing Primer Ministro si Maurice Duplessis sa Quebec bukas nga nagpahayag ug “pakiggubat nga walay kaluoy sa mga saksi ni Jehova” hangtod nga mangawala sila. Nan, may maayong katarongan nga ang usa ka reporter sa mantalaan miingon: “Hunahuna lang, kagahapon [Biyernes] dihay 74,846 ka Saksi sulod sa istadyom! Si Maurice Duplessis, nga mibando sa kalihokan, tingali naghigwaos sa iyang lubnganan.”

Dili kini unang higayon nga dagayang gipanalanginan ni Jehova ang mga maghuhupot sa integridad. Apan, sa daghang paagi, ang Montreal nga kombensiyon tagsaon.

[Chart sa panid 28]

Ubang “Mga Maghuhupot sa Integridad” nga mga Kombensiyon

Nasod Kombensiyon Tumatambong Gibawtismohan

Austria 3  23,123 237

Brazil 25 389,387 4,825

British Isles 10 142,859 925

Canada 14 146,897 1,585

Ecuador 4  22,918 394

France 11 119,940 2,002

Germany,

Federal Republic of 17 148,853 904

Greece 3  37,367 368

Italy 25 184,078 4,153

Japan 25 202,221 3,512

Netherlands 1  40,694 151

Portugal 10 52,581 990

Spain 13 90,808 1,628

Sweden 8  27,194 315

Switzerland 3  20,601 213

United States of

America 112 1,189,173 9,851

Venezuela 4  69,843 1,063

[Mga Letrato sa panid 31]

Sa Montreal, W. L. Barry sa Nagamandong Lawas nagluwat sa makaikag bag-ong librong “Life​—How Did It Get Here? By Evolution or By Creation?”

Ang dalan ni Job sa paghupot sa integridad gipasiugda niining dramaha sa Bibliya, gipasundayag sa kombensiyon sa Atenas, Gresya