Mga Magmamantala sa Gingharian Nagtaho
Teokratikanhong Pag-uswag sa Venezuela
SULOD sa daghang adlaw ang kainit sa linain makapaluya. Ang mga lumalabay natingala sa pagkakita nga nagbuhat ang mga trabahante sa naglagiting nga kainit dihang palabihon sa uban ang pagpahulay sa landong o sa kuwartong may air-condition. Sa inanay, ang tigbalayon sa bag-ong tinukod misugod sa pagpatim-aw. Sa tulo ka bulan ug tunga, ang mga lalaki naghuman sa upat-ka-andanang tinukod—ang bag-ong dugang sa tinukod sa sanga sa Watch Tower Society sa La Victoria, Venezuela.
Kadto mao gayod ang ikaduhang panahong gipadak-an ang sanga sa Venezuela sukad sa pagbukas niana sa 1946, dihang may 13 lamang ka magmamantala sa Gingharian sa nasod. Sa pagka 1977 ang ilang gidaghanon mikabat ug kapin sa 13,000. Busa, ang usa ka bag-ong tinukod sa sanga gitapos ug gipahinungod sa La Victoria niadtong tuiga. Sukad niadto, ang gidaghanon sa mga Saksi sa nasod mikapin sa doble. Panahon na niadto sa pagpadako na usab.
Ang bag-ong dinugang (likod nga tuo sa hulagway), nga may kapin ug 20,000 tiil kuwadrado (1,900 sq m) nga luna sa salog, kapin sa doble sa bug-os nga kapasidad sa sanga. Ang agianan sa kotse sa halayong tuong bahin mosangko sa 15-kotse nga garahe sa silong. Ang imprentahan gibalhin gikan sa 1977 nga tinukod (ang taas nga tinukod sa sentro) ngadto sa ubos nga andana sa bag-ong dinugang, diin nahimutang usab ang talyer ug karpenteriya ug ang pila ka opisina. Ang ubang bahin sa bag-ong tinukod mao ang puy-anan sa pamilyang Bethel.
Ang bag-ong tinukod nasangkapan sa kaugalingong tangkeng pondohan sa tubig ug sa generator sa koryente nga pang-emerhensiya, kay subsob ang kanihit sa tubig ug pagkawala sa koryente niining bahina sa kalibotan. Ug sa pagpahimulos sa bug-os sa permeng kainit sa adlaw ug sa huyohoy, ang labhanan gibutang sa ibabaw sa tinukod.
Unsay hunahuna sa lokal nga katawhan sa bag-ong gitukod? Bisan tuod ang pila mireklamo sa pagkawala sa maanindot nga hardin nga dinha sa nangagi, gibati sa daghan nga ang tinukod modugang sa respektableng dagway sa palibot. Ang usa ka iladong arkitekto, kinsa daghag nadungog bahin sa pagtukod nga siya miadto sa pagtan-aw niana sa iyang kaugalingon, misulti sa mga igsoon: “Kini sa walay duhaduha mao ang labing maayong pagkabuhat nga tinukod sa La Victoria.” Samang nakadayeg ang inhenyero sa munisipyo, kinsa malipayong mihatag sa permiso sa pag-okupar ug miingon: “Usa ka kadungganan ang paghatag sa permiso sa pag-okupar sa usa ka tinukod nga sama niini.”
Ang mga Saksi sa Venezuela nalipay niadtong Abril 21, 1985, dihang 15,802 kanila nagtigom sa duol nga Valencia alang sa dedikasyon, ug 38,059 nagtigom sa lima ka laing siyudad sa pagpamati sa programa pinaagi sa mga koneksiyon sa linya sa telepono. Ang maong tumatambong labaw kaayo kay sa bug-os nga gidaghanon sa mga magmamantala sa nasod. Sila mapasalamaton ug malipayon niining balaang tagana sa pagsangkap kanila sa labi pang maayo alang sa bug-os nga pagsangyaw sa maayong balita sa Gingharian una moabot ang kalaglagan niining sistemaha.—Mateo 24:14.